لا بارك الله بالقلم قرطاسي = وإلا الأنامل كلها ملتفه
يروغ مني لأرتمى هوجاسي= كنه سبى كفي والوذ بكفه
لا يخدعك يا حبري المتناسي = رسم الغرور بحاجبيه يزفه
ما زارني يوم الطريق انفاسي = أمد فنجالي ‘غلا ‘ ويدفه!
كان الظلام القمطرير القاسي = وكنت الشعاع الممتلي بالعفه
كنت احشمه من معمعة وسواسي = اهو بكفه والبشر في كفه
كنت احسبه في دنيتي نبراسي = مسك الختام ومركبي والضفه
يا دار صدري يشتكي من ناسي = دايم ربوعي بالطرف والحفه
ما امر وادهى من شقاي وياسي =إلا الزمان اللي طعني شفه
راح وبقت لي صورته في كاسي =لو هو بقالي من الضما ما ارتشفه
قولي له اني ما ذخرت احساسي = قبل السنون يشوفها مصطفه
يوم الزمن أحلا زمن ولباسي = اصغر سديريه ..وثوب الدفه