ياراكب اللي صنعها شد الألمان=هي منوة اللي ياركبها حفلها
ماوردت مع الجميحي ونيسان=ولا جابها اللي سلعتة ما كفلها
ما كنّها إلا يا سحبت فرخ شيهان=عسى الولي يفكّها من خللها
قم يانديبي فوقها فالوعد حان=لغير التوانك لا توقّف عجلها
تلفي على اليامي سلايل كحيلان=طارق ونعم المرجله هو بطلها
ياصاحبي كانك على اخوك زعلان=تر البشر ما نزّهت عن زللها
وحياة ربٍ فارضٍ خمس الأركان=نفسٍ عزيزه ... ما نتحمل زعلها
ياابن الذي للطايله دوم مزبان=من للثقيله ... غير غارب جملها
حنا الخطأ مانقبله وين ما كان=للطيب طيب ... وللمعاني فحلها
ولا نجازي الإحسان إلا بالإحسان=ولا نقبل اللي غيرنا ما قبلها
منك العذر ياصاحبي قِدم الآعيان=النفس ما اخفت عذرها من خجلها
قلته وأنا على الخوي حيل شرهان=من كلمةٍ ياليت ... طارق عدلها
تمت وصلوا عد همّال الأمزان=على الذي عز امّته عن جهلها