ربي خلقك إنسان أغلى من العين=قدرك رفيع وما توفّيك الأبيات
غالي وعزيز وفوق كل المضامين=ويشهد على مقدار حبي لك الذات
عبدالعزيز الله.. أيام وسنين=وحنّا على درب المودة مخاواة
مرتّ بنا الخوّة على العسر واللين=كنت الرفيق الشهم في كل الأوقات
ما خاب ظني فيك خالي من الشين=حزت المراجل ولك معي دوم وقفات
قلي وش أكتب فيك يا كامل الزين=دام المعاني مقصّرة فيك بذّات
يا ولد مِشرِف راعي الخير والدين=راعي الشهامة الشيخ رمز المروات
علمك بذل المال في كف مسكين=وإكرام ضيفك لا لفا وذكر وصلاة
بس العتب يا طيب الذكر بعدين=ذوّقتني بأسبوع نارَ المجافاة
كان الغلا في خافقي يقول: هو وين؟=مو عادته يقطع ولو فيه أزمات
حار الفكر وتلوّن الحال تلوين=وأمسيت من عقبك أعيد الحسابات
بعض الطعون أقوى من طعون سكّين=بذّات جرحٍ يختفي تحت بسمات
جرح الخوي ما تكفكفه دمعة العين=ولو كان فيها علاج باهلّ دمعات
ما جيت أبيك تبيّن العذر قاضين=معذور لو جرحي نزف دمع وآهات
راضين باللي صار وبالجرح راضين=يفداك قلبٍ ما نسى كل ما فات