|
. . عمتي هي الأم الثانية لوالدي لانها ربته مع اولادها وعاش في كنفها وأبوعلي أعتبره الأب الثاني لوالدي أبوي عاش يتيم الأب والأم من صغره ماتت امه ( جدتي ) وهو في أشهره الأولى ومات ابوه ( جدي ) وهو في السنة الرابعه من عمره يقول ابوي كنت العب على البطحاء مع اعيال القرية وكان ابوي وقتها مريض وطريح فراش كنت اروح له كل وقت وانام في حجره في بيتنا الطيني .. اللي ساكنه عمي يقول ابوي .. ان جدك رفض يطلع من بيته في مرضه وكانت عمتك تجيب لنا الاكل والشرب والقهوة والمعاميل يقول ابوي وكنت انا وجدك نسكن البيت يقول .. كان جدك يمثل لي كل حياتي لأنه يمثل لي الأب والأم والأخ وكل شي في حياتي . . |
يقول ابوي : وانا العب على البطحاء مع اولاد القرية جانا واحد من رجال القرية وناداني وحط يده على كتفي وقال يا محمد ترى ابوك ماااااااااااات شد حيلك وترانا كلنا اهلك يقول ابوي .. نزلت من عيني دمعة والله كأنها أحر من الجمره يقول ابوي بكيت وبكيت ورحت اركض ورحت للبيت ولقيت الرجال مجتمعين يقول راحو به للجامع وغسّلوه وصلو عليه العصر وحضرت الصلاة معهم يقول بوم راحو به للمقبره ما استوعبت اللي صار ورحت اركض وفجأهـ اختفيت من القرية وبعد العزاء قام ابو علي وعمك مع اهل القرية يبحثون عني . . سوف أكمل لكم القصه وقت لاحق - ان شاء الله . . |
اكتفي بهذا القدر من السرد ولي معكم عودة - ان شاء الله - . تقبلو فائق محبتي . . |
. . صبــــــــــاح الود لأهل الود .. صبــــاح الخير صباحي بدونكم ما يحلى .. صباحي واياكم غير 18 - 3 - 1430 هــ . . |
أعود لكم مجدداً الى واقع الذكرى : ضـــــــــاع والدي وأختفى تماما عن القرية بعد العزاء في اليوم الأول وبعد ما حل الظلام قام الجميع يسأل ( وين محمد ) أنطلق أهل القرية يبحثون عن الطفل اليتيم واللي فقد كيانه وقلبه وكل حنانه أبوعلي وعمي والعم عبدالله وكل اهالي القرية يبحثون عن ( والدي ) يوم طلعو خارج القرية على مسافه بعيده وجدو ( والدي ) متلملم بمشلح صغير كان جدي مشريه لابوي ايام الحج ولقوه نايم تحت شجره كان ابوي يحبها ويطلع لها مع ابوي وعمتي كان جدي يعلّق على الشجره ( زبيل ) http://www.el-khadra.net/Pictures/29-03-06.gif وكان يمرجح ويلعّب أبوي يوم شافوه قام أبوعلي - الله يرحمه - وبكا عليه بكا ولمه على صدره وحمله بين ذراعيه ودخل به على عمتي وقلبها تفطّر من البكا وقال لها ( هذا ولدنا .. الله الله فيه ) طبعا عمي ( لم يتزوج بعد ) وكان مشتغل في التجاره والسفر . . |
أبوعلي .. وعمتي لهم فضل بعد الله على والدي وكانو هم اهله وناسه أبوي عاش في القرية يتيم وكان أهل القرية يسمونه بـ ( اليتيم ) ولكن الله عوّضه بوالدين وأهل درس والدي في القرية وكان متفوق كان متميّز في العلم والأدب حقق نجاحات في مسيرته الدراسية والتحق بعدها في معهد المعلمين في الرياض وتخرج ليصبح معلماً له مكانته وتقديره . . |
اسمحو لي أن ارجع بكم الى وقائع زيارتنا لبيت عمي - الله يرحمه - ولعلي توسعت كثيرا في جوانب تلمس ذكريات القرية بيت عمي الله يرحمه .. بجانبه بيت العم ابوعبدالله وبجانب البيت أبوعبدالله بيت ( ابوعلي ) الله يرحمهم جميعا يشهد الله على كلامي أنهم كانو بمثابة البيت الواحد وكان يجمعهم حس واحد وروح المحبه واللي ما يعرفهم يقول انهم اهل بيت واحد عزمنا العم ( ابوعبدالله ) على العشـــا طبعا رحنا لهم بعد صلاة المغرب مباشره الرجال فارشين زوالي وجالسين في الخارج شابين النا ( الضو ) وعليها الدلال والبرقات والحريم داخل البيت وأذكر ان زوجة عمي وعمتي وأم عبدالله يطبخون الذبايح ويزهبون القهوة والشاهي والمعاميل |
لم ولن انسى ( بدرية ) بنت العم ابوعبدالله :biggrin: كان عمرها مثل عمري تماما لقيتها تلعب مع فهد ولد عمي في الحوش بنت جريئة وذكية وجميله :biggrin: أذكر يوم رحت للحوش جات وسلّمت علي وقالت .. أنت نواف .. صح قلت ايه قالت انا بدريه وهي تتكلم معي والله لم انسى موقف صار والموقف اللي صار غريب من نوعه بس لا تضحكون :biggrin: واحنا نسولف فجأة طلعت ( سحلية ) خذت حصاة عشان اذبحها مسكت يدي وقالت ( ما انت صاحي ) اتركها لا تذبحها وراحت بدرية ( للسحليه ) وقالت لها ( بـ العويذه منك ومن شرك .. اعوذ بالله منك ) قلت وش تقولين انتي هذي سحليه ما تفهم قالت : لا إن ابوي يقول لا تذبحون السحالي وتعوذو بالله من شرهم .. لأنهم يتجنسون قلت كيف تجنسون .. قال يعني بعضهم جن :biggrin: أذكر ذيك الليله أصابني خوف من كلام بدريه بس ما شاء الله عليها .. كلامها أكبر من عقلها |
طبعا العم .. ابوعبدالله أكرمنا ذيك الليله وأجتمع أهل القرية وكان عشاهم بعد صلاة العشاء بنصف ساعه لم ولن انسى ابناء القرية ( الشقرديه ) وتعاونهم في صب القهاوي وتقريب المعاميل وترتيب سفرة العشاء قلب واحد واحساس واحد ولن انسى ( حمد ) ولد العم ابوعبدالله كان متحزم وعاصب الغتره ويرحّب ويهلّي كانت المناسبات لها رونق ولها طعم واحساس بعكس كثير من المناسبات اليوم |
. . اكتفي بهذا القدر من الطرح ولي عودة لكم - ان شاء الله - . تقبلو فائق محبتي واحترامي . . |
| الساعة الآن 05:32 PM. |