جتني من ( أشباه الرجال ) المناعة = اللي عن علوم الرجولة مقفين
كثر الرمل في عصرنا واتساعه =والا كثر مافي الوطن من مساكين
والا فجنوب افريقيا من مجاعة =مافيهم اللي في ذمتي يترس العين
كنهم في سوق الرخص مثل البضاعه = لا تقلّبين مواجع الروح تكفين
حنا في عصرن كل ما به فضاعه =ورعن ويلعب في الخلا مع وراعين
شريطهم ما عاد يطرب سماعه = لا صوت لا شعرن ولا فيه تلحين
ياعزتي للي تبيهم طماعه = اشكال لكنها بليا مضامين
وياعزتي للي سمينن ذراعه =ما عاد تجهد به يرقم مزايين
لا جاك اطلقهم تجي به لكاعه = واذا بغيتي فزعته قال : بعدين
واذا قعد عندك لو ربع ساعة = من هيئته تضرب عليك الشرايين
ولا راح عنك قام ينقل متاعه =ناوي ( دمشق ) ويتمدّح في ( برلين )
أنا أشهد ان ما عاد تنفع شفاعه = في مثل ذولا تنقلب هالموازين
المسأله ماهي ترى بس قناعه= المسأله ما به دلال وفناجين
بعض الرجال ان ماغسلتي شراعه = لا ... ماتبرد حرتك فيه سكين