ياجنون الشعر غني وعزفي لحن الخواطر=إشعلي نار القصايد وستشفي من بحرها
ويابحور الشوق هيجي ونثري عقد الجواهر=صافحي ساحل وصاله ونتقيله من دررها
وياهبوب الغرب هبي وحملي فيض المشاعر=عانقي غيمة غلاها وستغيثي من مطرها
إحضني صدر الحروف وداعبي ذيك الضفاير=حركي سلسال عقد ٍ جوهره لآمس نحرها
قبلي منها الجبين وفيّضي ذيك العباير=إلمسي خد الحروف وقبلي مبسم ثغرها
إهمسي بذنه وقولي لاٍ متى والحظ عاثر=خطوتي في درب وصلك حظها العاثر عثرها
قولي إني من بعدها صرت للذكرا دفاتر=كل صفحات الدفاتر بالغلا تحمل صورها
إنكسر فيني غروري عقبها لو كنت أكابر=لآنست عيني ملامح طيفها قلبي ذكرها
أخبريها إن القصور إللي بنتها بالضماير=تستغيث الوصل منها والجفا بكّى حجرها
خاليه من كل غالي ,, كنّها ذيك المقابر=منتي أول من سكنها لكن أخر من هجرها
لو ملامح صورتي تلقينها في كل شاعر=ماني أول من شكى الفرقا ولآ أخر من ذكرها
لي حروفٍ من حروفك لكن الشيطان شاطر=لو عرف معنى حروفك قصتك شيّع خبرها