اكبر فخر لا صرت .. تدري ضيفك=وأنت الذي .. تكرِم جنابٍ ضافك
ما لي جِدا أرفض دعوتك .. يا حيفك!=دام الردى .. ياصاحبي ما حافك

اكبر فخر ياصاحبي تشريفك=ياوافين والمدح دون اوصافك
تعجز بيوتي لانوت توصيفك=على رجوم القافيه مشرافك

مادام جتنا دعوة الذيب سرحان=يبشر بنا حنا عن الموت دونه
ياراعي العليا لك الشعر عنوان=بحر من الابداع تزخر فنونه
يقولها ثامر نسل آل ريحان=في صاحبن مايوم خيب ظنونه

ارحب هلا حييت .. يا عذب الالحان=اعداد همّال .. ترازم مزونه
انا اشهد انك وافي .. بكل ميدان=والشعر لا جا فيك .. جنّة جنونه
والله وسبع انعام .. ياطير حوران=يا صاحبن .. ما غيّر الوقت لونه

حط الكلام اللي يهمك بصندوق=اقفل عليه وباقي الهرج لاباس
سرك اليا ابديته على اعز مخلوق=بكره يسولف به عليك امحق الناس
وأحذر تصاحب لك من الناس مطفوق=هماز في اعراض الاجاويد هلاس
ارفع مقامك عن مقام الدني فوق=وتلقا مع الربع المطاليق مجلاس
وأحرص على قرب ارجح(ن) طيّب عموق=ان جملك وإلا مخاواه نوماس
واليا بنيت فسيس البني بوثوق=احفظ مواثيقك ترى العرق دساس
الحر يبدي في حجا كل شاهوق=والبوم تلقى له بألانقاض مدعاس
واليا هرجت فخل هرجتك برفوق=اقصر عن اللي لاهرج يمرس امراس
وأصفح بحلمك عن مداريق داروق=وأياك تطرد كلمةٍ مالها ساس
ترى سكاريب السلع مالها سوق=ولايستوي قدر الكراعين والراس

حي الذي جاني جوابه على آوق=منظوم عقده ‘ من درر خالطه ماس!
اعداد ما ترزم على عيالها النوق=واعداد ما ذعذع سما الكون نسناس
الصاحب اللي ما مشا سكّة البوق=ما غير له دوم ‘ الوفاء فرش والباس
جزل المعاني ساقها ‘ يمّنـا سـوق =فوّاح عوده ‘ تنتشي منه الانفاس
حر(ن) ‘ على الطولات والطيب محروق =شرب المراجل شربة الماء من الكاس
الطايله عنده لها ‘ الباب مطروق=من روس قوم تلبس الدرع والطاس
والناس مبطي ما تساوى ‘ بها فروق=مثل المعادن ‘ بينها زنك ونحاس
فيها من اللي جعل شرواه للعوق=راع النقيلي ‘ فاقدٍ عضو الاحساس
ما غير سوسه ‘ صاحب الدم بعروق=خلّه يولي ‘ تحت الأقدام ينداس
تلقى عنه من كنّه ‘ القفل مغلوق=بير(ن) عميقٍ ‘ ما تِلحّق له قياس