يا غازي وش ينفع قليبي اذا صاح=وابطا ومحدن منتبه من صراخه
اشوف خلي بطلة الصبح لا لاح=وهموم تلعب بي ويش الحل ياخه؟
له في الحشا ياذيب جيه ومسراح=وفي كل عبرة من عيوني مناخه
الحزن باب وهمي اليوم مفتاح =اقفل على جرح(ن) يزيد انتفاخه
اذكر لساني يالخوي دوم بوَاح=واليوم ما ينطق بدنيا المصاخه
هذي حياتي كلها جراح بجراح=وماينفع العاجز حلول اللباخه
ياذيب شرواكم به الهم ينزاح=مضرب مثل في المرجلة والطناخه
ويش السوايا دل مغليك يا صاح=ويش حيلته لا صار ذا الوقت صاخه!

ما ينفعه ياكـوود خلاّق الارواح=اللي معه همـّك يبيـن انسلاخـه
حيثك فطين ودايـم الـدوم لمّـاح=من بيت عز ووارث(ن) للشياخـه
عليك باللي عنده الفكـر يرتـاح=اللي يداوي الجرح عقب انشلاخه
ما يغرقك موج البحر ‘ وأنت سبّـاح=وعزمك ‘ رفيع(ن) ما ايتهيّـا انمتاخـه
ان كانه ايودّك فلا تحسبـه راح=قلب (ن) على طاريك زاد انملاخـه
لا بد ما يقْبِل كمـا فجّـة إِصبـاح=اليا سمح ظرفه ‘ وناسـب مناخـه
وإن كان هو ياذيب ‘ لاهي وسوّاح=مالك ومال ‘ اللي براسـه صماخـه
وإلاّ الهوى ‘ لا طب بالروح ذبـّاح=راعيه يركض لو حصِيله ‘ مداخـه !

كفيت يا صاحبي كفيـت=بالعون ما خاب طلابـك
ياللي الوفا للخوي اعطيت=هذا قليبـي تغنـى بـك

يا مرحبا بك ؛ هلا .. حييت=احمد كريم(ن) ؛ لنا جاابـك
كلّي فخر ؛ يوم ليّه جيت=وكل حرف(ن) اكتبه هلاّابك

كتبت لك صاحبي كم بيت=ياعل حازت على اعجابك
مفادها ويش كثر عانيـت=من يوم اعلنت لي غيابـك

سطّرت لك بالوفاء مانشيت=في صفحةٍ ضمّها اكتابك
هرج(ن) موثّق ؛ عليه امضيت=تقراه وان غبت ؛ يقرابـك

ومن القهر شوفني خطيت=بدمي على راس مرقابك
يا صاحبي بالحشا شبيت=نار(ن) توَقد من اسبابك

ياراعي العرف لك ردّيت=القاف ياجيـت يقوابـك
ياللي بوقت القسى واليت=ما خاب من هو ؛ تعزوابك

كانك تناسى تراني جيـت=ودقيت يا ذيب لك بابـك
ومن يوم شفتك ترى مريت=وماظن تقسى على اصحابك

حييت ياللي علي ناديـت=يا مرحبا فيـك واهلاابـك
انا معك ؛ وين ما لقّيـت=يموت حرفي ؛ ويحياابـك

من اجلكم بالخطا حثيت=بماضي تظلل باهدابك
مدري لنا صاحبي حنيت =والا تغانيت باحبابك

كثير لك داخلـي وازريـت=اخفيه ؛ عن اقرب ‘ اقرابك
مشيوف بالعين ؛ لو واريـت=من كثر ما ؛ احسّب احسابك

بالعون ياصاحبي وفيت=وارسيت ياذيب اطنابك
وماني مفكر بكيت وكيت=مادام حرفي تعزوابك

بذكر الله بديت القاف سبحانه عليم الحال=واثني ياصلاة الله على المبعوث مرساله
شهر وآاانا بعيد آاارافق الاوجاع والآمال=اقل يمكن حدا اخواني اجي فجئه على باله
ارافق حزن ياسرني ويعزف بالحشا موال=ألم محدن حشا قبلي تجَرع قاسي اهواله
هذا قدري وانا وافي مع الاصحاب والاطلال=هذا قدر العيون اللي بدمع الدم همَاله
تمنى النفس لو كلمة تسلي خاطري بسؤال=او احساس(ن)يواسيني عسى ماشر وش جاله
عجايب كيف دنيانا خذت منا عظيم خصال=تناسينا معاني الود واسبابه ومنواله
صداقة بس في وقت الرخا وتبادل الاعمال=ووقت الضيق ماتلقى احد وافي بأفعاله
صدق من قال اصحابك اذا مروا على الغربال=فرزهم ما بقى واحد من المجموع باجماله
بعصر التقنية والنت وخدمة زين والجوال=سؤالي وش تفيد اللي شعر باجحاف بوصاله؟؟
ابرحل يا عسى ربي يصبرني على الترحال=وربي عالم الخافي وصدق احساس من قاله

بديت القاف بإسم اللي وزن بالمِدْ والمثقال=فعول ٍ للعرب ماهي خفيّه دوم تحصى له
إله ٍ ماظلم خلقه وعدله عم كل اجيال=إلا منه مسسني الـضــُـر ربي دوم الجأ له
نعيش الوقت والدنيا مراسيها ثقيل إجبال=حتى السيل لامن سال يمشي درب مسياله
وكل ٍ بالحيا ماشي ثِقِيلِه مع خِفِيفِه شال=ماله كود صبر اليوم دام إن الحِمل شاله
انا ماقول قولي دش لجل يقال نايف قال=أعَرْف القول لاقلته وحط القول منزاله
اقول الناس فالدنيا كما هي حالة الجمّال=اشوف الوقت والدنيا وفيها الناس جمّاله
كفايه دام فالدنيا لقانا في شهر شوال=عيد ونلتقي به يوم ثم الكل في حاله
مشاغل والحيا فيها عيال وشغل ورزق ومال=حتى الخير ماياصل ولازم دون نسعى له
صحيح إن الوفا مطلوب وننشد كيفها الأحوال=لكن من يغيب اليوم دوّر عذر ترضى له
أهَمْ الشي لابه جرح او هَم ٍ ودمع ٍ سال=أمّا البعد فالدنيا فكل ٍ راح لأعماله

إي بالله أخطوا والخطا اللي جابهم عين الصواب =مبطي وأنا أشوف الطمع يكشف رداهم وأستره
مايملي عيون الحسود بهالزمن غير التراب =ومن لايتوب من الخطا تحرم عليه المعذره
اللي من أولها خراب أكيد تاليها خراب =والبندق اللي ماتثور في هدفها تذعره
ودك اليامن جاتك الغلطه من الناس القراب =الصاحب اللي ماكسبت محبته ماتخسره
مشكلتي إني ماعرفت أحسب لصدتهم حساب =قلطتهم صدري على ذكرى قصيد وحنجره
صوت ٍ يصول بمنبره واخطاب مامثله خطاب =والطيبه اللي زعزعت صوت الخطيب ومنبره
مافيه دمع ٍ صوبوه أحبابي بوجهي وخاب =ولازرق حزني على غالي ولافج انحره
كل الزهاب اللي معي ذكرى من أصحاب الزهاب =واللي بقالي من عذاب اشرس طريقي وأخطره
لأني تجنبت الغرق.. عديت من فوق السحاب =لأن أكثر أصحابي ورق..ماشفت للطيب إثمره
والله ماحطيت بين الحقدوالخوه حجاب =حتى غدوا ربعي يحدوني على الضيق أشكره
البارحه ثارت علي رقاب وأوتني رقاب =البارحه ياثقل دم البارح ويامحقره
أثر المصايب ماتجيك إلا من الناس القراب =وبهالزمن حتى الخوي اللي تثق فيه أحذره
أهب ياوجه الحسد وشلون جمعهم وغاب =كيف السنين اللي عطتني بعثرتهم بعثره
لابارك الله في رفيق ٍ تزعله كلمة عتاب =ولاجمع الله الرجال اللي تفرقهم مره
الصاحب اللي مايجي من صحبته غير العذاب =نذر ٍ علي إن ماهجرني وإلا أنا اللي ب أهجره
من يفتح لفرقاي باب أفك له عشرين باب =وأذا خويي مايقدر خوتي ما أقدره
عو ّدت نفسي كل ماشددت لليمّه ركاب =مأصد وجهي عن طموح إلا لياجبت خبره
أن روّحوا فأنا بري منهم ليوم الحساب =وإن جرحوا قولوا لهم ماحركوا فيّ إشعره
شفهم لهم حول السنه ولا خذوا مني جواب =أحسن دوا للي يحاول يستفزك تحقره
ماكنت أحاتيهم صغيّير ..عاد أحاتيهم شباب =الصاحب اللي ما أذخره لليوم الأسود ما أذخره
شفني جمعت أوراقهم بكتاب وأغلقت الكتاب =ياوقت لم اللي تلمه وأنثر اللي تنثره
عقب أكتئاب البارحه ماعاد انا حمل إكتئاب =الطيب جرجرني وانا ماني بناقص جرجره
انا تجرعت الظما لين أحترق وجهي وذاب =انا كسرت بخاطري قبل الصداقه تكسره
انا خسرت اللي غيابه غير عن كل الغياب =انا غفرت لعالمٍ ماتستحق المغفره
انا أكثر (أنسان) تعلم من كثر ماأخطأ وصاب =انا أخر (لسان) يتكلم في زمان الثرثره
انا القصيد اللي فزع من دفتره مليون ناب =وانا الوحيد اللي جمع مليون ناب بدفتره
جفني وجرّحه السهر ، حيلي وهدّته الصعاب =دمعي هدر،ضحكي ندر،عمري وضيعت أكثره
شيبت بعقول العرب..هيبت روس ٍ ماتهاب =جمهرت ناس ٍ عمرهم مايعرفون الجمهره
ماصرت ذيب إلا لأن اللي تحدوني ذياب =ما كنت أغيب إلا لأن العفو عند المقدره
ترى حلاتك لاحملت لصاحبك كلمة عتاب =أن مانطقت بها بوجهه ماتذمه بظهره
في هالزمن مايملي عيون الحسود إلا التراب =والا الحظيظ.. الطلقه اللي ماتصيبه تذعره
ودك اليامن جاتك الغلطه من الناس القراب =الصاحب اللي ماكسبت محبته ماتخسره

من قلد المخطي يضيّع لامشى مثل الغراب = اللي يقلد فالحمامة من كثر ماتقهره
لاهو فصخ سود الثياب ومرتدي بيض الثياب=ولاسلم من صوت جش وجات فيه القرقره
يالضامي اللي راح يلهث يوم بان إله السراب=الساق من زود العدي مايدري إنه كسره
ياما نصحت وقلت له إشرب ليا طاب الشراب=الرزق لامنه بغاك الله كريم وقدره
وإن كان لك ناب ٍ فغيرك بان له الفين ناب=إليا ضحكت اليوم غيرك بان نابه كـشـّـره
ياذيب حذراك الخطا وإن جيت في درب الذياب=أصبر ترى ماجاك حق ولك رفيق وحذره
ماتاب يومني اظنه عن خطاه العام تاب=الثور له قرن واشوفه حاس حاس وغبره
مايدري إني قد قريت اليوم مضمون الكتاب=إليا لقيته قول نايف قد قراه وسكره
صاحب طربه اليوم اشوفه كان غنتله عتاب=إل كل غلطه او خزى عوّد وراه وصدره
ماخاف من يوم ٍ يجيه ويبتدي فيه الحساب=إن كان مسته اللهايب من يجي ويصبره
داب ٍ واشوفه ملتوي يعصر له اليومه فداب=مافكه إلا لين مات وراح حتى ما أقبره
دله على درب الخطا ماجاه في درب الصواب=اخطا وامره فالخطا ماجاه ليه ودبره
ياصاحب ايام الفلاح إن كان جنّبك العذاب=الوقت يمشي حسّن أخطوط الكتاب وسطره
سطـّر جميل الفعل تلقى للهنا مليون باب=إن كان فعلك مايجمـّـل غط غطه سـتـّــره
بعض العرب له وقفة ِ فعل ٍ تطول إبه الرقاب=إليا حكى بالقول غصبه تحترم وتقدره
شيخ ٍ وله قدره ومنزل معتلي فوق السحاب=اللي فمخباه الكريم بكف خير يندره
والبعض عن فعل المراجل والكرم لاحل غاب= أحد ٍ يسنده بردى وأحد ٍ بخزي يحدره
ماله جميله او فعل نجزاه بالفعل الثواب=اقصى حدوده لانصاه اليوم احد يتعذره
بكتب وماني باللذي متعني ٍ يكتب خطاب= أكتب شعر وإن كان كسره بان لي بنجبره
برسل قوافي الشعر قاف ٍ ياصل لحضرة جناب= اللي ليا جاته قوافي الشعر كود تبصره
مانحسب احساب الخطا والدنيا تاليها خراب=اللي يفرحه الغـِـنا بكره نهار يفقره
هذي حياة وسهلها ملزوم يلقاله هضاب=احفظ زهابك لايضيع اليوم خله وفره
مادمت في سهل الزمان إحذر تضيـّـعك الشعاب= الشـِـعب لامنك مشيت إحذر رفيق تغبره
خله يشوف من الوفا ياصاحبي مالذ طاب= الطيبه اللي لالقت بعض الخطا ماتكبره
كم واحد ٍ ودى علوم ولا لفا - كم علم جاب=كم واحد ٍ لامن لفاك بعلم زور تخبره
كم مرة ٍ نرسل رسول ولا لقا عندك جواب=العلم لامنك حكيت العلم قمت تنفره
النجم يالصاحب تشوف إن طاح سميته شهاب=إن طاح نجم ٍ للثرا محد ٍ يجي ويعبره
حذراك حذراك الغرور إحذر يكون إلك الركاب =الطيب خله لك رفيق الذكر دوم يعطره
كم ظن ظنيته وكم من ظن فالدنيا وخاب=الظن هو اكذب حديث احذر عليّ تكثره
وإن كان لك ظن ٍ فلاني يوم ظنيته معاب=الظن دوم إلك الرفيق انته عليك تأمره
كم وقفة ٍ وقفتها لك فالذهاب وفالإياب=إن كان لي فعل إنسى عيد الزمان وحضـّـره
حضـّـر زمان ٍ راح كانك ماتخاف ولا تهاب=اذكر جميل الفعل لف بهالزمان وشبره
ياصاحبي عذرك رفيق وفالزمان انت الزهاب=إن كان جرحي مايطيب أصبر عليه وأخدره
بصبر عليك ولو تشوف من اللهيب القلب ذاب=الصاحب اللي مايغطي عن رفيقه وخره

هلا ياذيب يا وافي يانسل العز والابطال=وانا كلي فخر يا صاحبي بالشعر ورجاله
انا ادري وقتنا قاسي على قولك ابد ميَال=ولكن المنايا خبط عشوا من تهيا له
صديق(ن) ما حسبني مكسبه في كفة المكيال=برغم اني وفيت الكيل ما حسَبت كرما له
عطيته ود ما يفنى على مر الزمن ما طال=و رد الدين في ثوب(ن) تفانى حيل باسباله
سألتك بالذي انزل محمد وانزل الانفال=وش اتسوي اذا انك مكاني يالخوي حياله

اصك الباب من دونه وكثّر بالعدد اقفال=ودام إني نويت البعد مافكيت اقفاله
انا عندي كرامه مير ماحصلت منه إقبال=جزاه اليوم إهمالي مثل مابان إهماله
ودام إن العرب فيها كثير من العدد اشكال=وفيها للوفا ناس ٍ وفيها مثل اشكاله
ببيعه وارخص القيمه ولو ينسام بألف ريال=ابا القالي خوي غيره وأعوّض لي خوي بداله
وثوب ٍ ماخذه عيره افصّل ثوب لي تفصال=افصّل ثوب لي غيره وازيّن فيه تفصاله
ودام إن الزمن حاضر ابدّل باليمين إشمال=زان الحال فالدنيا وجاد الوقت بأجياله
صغيرة سن تلبس لي بلوزه مع طقوم إبدال=وجه ٍ يشرح الخاطر ليامن جيت فقباله
اعيد إبها العمر وانسى واقول الهم راح وزال=( كثير الخيل فالدنيا ولكن هات خيّاله )

الله عظيــم الشـــان قــدَر و ارادي = وفي يومه المـوعـود نـادى المـنادي
أربع سنـين مـن العنـا والسهــادي = مالـه سـوى صبـره وعزمه سنادي
رغم الظـروف الـي تهـِـد الوتـادي = زاده من التـقـوى وهــي خيــر زادي
صام الشهر حتـى اكمـله بالعـدادي = والموت فـي شــوال جــا لــه يعــادي
السبت في السابع عشر بالوكـادي =فـارقــت يالــي منــزلـك فـي فــؤادي
بارض الحرم صلواعليـك العبـادي = و جـثـمـانـك الطـاهـر بخيـر البـلادي
فقد الذي شـــرواك ماهـو بعـــادي = الـدار و الديــره بهـا الحــزن سـادي
حــل الـظـــلام بـحــي ام العــرادي =والــدار مـن فـرقــاك تعـلـن حـــدادي
ما عا د بـه معنــى لبـيــتٍ و وادي = وميسان من بعدك كساها الـســوادي
يابو هـلال الدار تشـكـي البـعــادي = والحزن ماله بعد فرقاك حادي
يابــوي مافي الموت كـرُ و شرادي =ولـو تـفـتــدى بالــروح والله لـفــادي
جرحي بعد فـرقــاك مالـه ضمـادي = وياليتنـي فــي يــوم موتــك جـمــادي
تبقــى حياتي ديـن تحـت السـدادي = لـوفـيـك بالـدعــوة و باقــي مفـــادي
كـل الـقبـايـل فـي وداعـك حشـادي = و من يعـرف الطيَب بذكــره اشــادي
شيــخٍ سديـد الرأي وقت الشِـدادي = الحـلـم و الـحـكـمــه وفكــرٍ قــيـــادي
سبَاق بالفـزعـه وبيـــض الايــادي = ومن يزرع المعروف يلقى الحصادي
مـالك خصيــم وقــت شــد الزنـادي = ومـن هـيـبـتـك توقف جميع الاعادي
يـا رب عبــدك جــاك بعـد الشَدادي = نـرجــوك يـا رحمـن لطــفُ و ودادي
يـا الله تـرحـــم والـــدي باللـحـادي = و بـوســـط جـنـاتـك ينــال المـــرادي
هــذا سبيـل المـوت ما بــه حيــادي = مكتوب من توضع رضيـع بـمـهــادي
من يتعــظ بالمــوت عـــد العــتـادي = خشيـه مـن الرحـمــن يــوم التـنــادي
يبقى المطـر والمـوت ماله صدادي =وكـل مـن فـي الارض لا بــد غــــادي
وختامها صلوا على خـــير هـــادي = محمد الداعـــــي لدرب الرشــــــــادي

أبدا بخـلاق الحضـر و البـوادي = وأثني على شـاعر بالاحساس جادي
أبـدأ بذكـر الله وهو خيـر هادي = وقولـي بعيـدٍ عن مجـال العنـادي
سايلـك و انـت الله رب العبـادي = لا تجعـل الهاجـس رهين القيادي
ثامـر عرض لي قول فيه السدادي = و الله يلهمـه الهـدى و الرشـادي
ابيات موزونـه جـميله جـدادي = مبنى ومعنـى فيه ساهـم واجـادي
مرتبـه تذكـر لرايـح و غـادي = عبَر بها فـ أيـام حـزنٍ شـدادي
معنى سمين ورايع الحسن بـادي = يا ليتـها تنشـر بصُحـفٍ و رادي
وعلى الفضا ترسل بشكل انفرادي = وعلى ورقـها عطـر ورد و كـادي
مرثـيـة بالبـَر كـلـه تنـادي = بـرٍ بـه الديـن الحنيفـي ينـادي
فيـها المبـَره والشكـر للايـادي = تعبير صادق عن عظيـم الـودادي
عن والده والدمـع كان المـدادي = دمعٍ غزيـرٍ فـاض دون ارتـدادي
في والدٍ يشبـه صقيـل الهنـادي = يسعـى لفعـل الطيـب قبل المنادي
ابياتـها تشبـه عـِزاز الجيـادي = تصلح تُقال بكـل محضـر و نـادي
بنـى معانيـها بكـل اجـتهـادي = راجي العفـو له من كريم الايـادي
ابيـات مثل القـافله في انقيـادي = المثقلـه بـ أغلـى عتـادٍ و زادي
يقولـها شاعـر بالاقـوال اشادي = شجَع نِمـِر في موطن العز عـادي
ومرحوم ابوك وفاز يوم التنـادي = بجنه , وصلو علـى خيـر هـادي
نبينا وأسلـم عن الانـتـقـادي = صـلاة ربـي عـد تغريـد شـادي