بسم الله الرحمن الرحيم
مساء الخير
الكتابه على الجدران ظاهره خطيره أنتشرت في الاونه الاخيره وأصبحت من أشد الظواهر التي تهدد تطور وحضاره المجتمع وصراحه أعتبر من يقوم بالكتابه على الجدار شخص لديه من مركبات النقص الشيء الكثير لانه لو كان واعي لما أحتاج أن يجذب الانظار إلى تصرفاته الطائشه والغير مسؤوله..يعني لمجرد سؤال يطرح نفسه مالفائده من الكتابه على جدران الناس وماالثمره التي يجنيها من تصرفه غير السب والشتم والاثم والدعاء عليه..
حقيقه مادعاني الى كتابه هذا الموضوع هي قصه غريبه وفي نفس الوقت (تجرح الواحد من القهر) يوجد بالقرب من منزلي مدرسه متوسطه للبنين وكان عليها الكثير من الكتابات والالقاب الغير لائقه فقامت الدوله ممثله بوزاره التعليم مشكوره بترميم المدرسه منذ فتره ونقلت طلابها ليدرسوا في مدرسه أخرى ظهراً وقامت بصبغ جدار المدرسه الخارجي بالبويه ذات اللون الوردي الجميل ورممتها من الداخل والخارج وجعلتها على أتم أستعداد لأستقبال طلابها وفي الاسبوع الاول من رجوع الطلاب لها تفاجأت ذلك اليوم وأنا خارجه بالجدار الجميل المصبوغ قد تشوه ببعض الكتابات من جديد وللأسف أن هذا التجديد منذ دوام الطلاب فيها لم يكمل أسبــــــــــــــوع لاحظ أخي وأختي أسبوع واحد فقط..
والله العظيم ذاك اليوم كان وقت صلاه المغرب دعيت على اللي كاتب هذا الشيء من القهر يعني هالحين مخلينكم تداومون 4 أشهر ودوام بالظهر وخارج مدرستكم وحاله يعلم فيها رب العالمين بس عشان يأهلون مدرستكم لكم وتواجهونهم بالتصرف هذا اللي أقل مايقال عن كاتبه (قليل التربيه)>>اللفظ هذا ماعمري أطلقته على أحد في حياتي كلها لأيماني التام بأن كل أنسان لابد يكونوا أهله تعبوا عليه في تربيته وبالاخير قد تكون تصرفاته طبيعيه أما أن يكون قليل تربيه فأعتقد أن من بين كل 100 شخص شخص واحد فقط اللي يقل عنهم بالتربيه وأعتقد أن من يقوم بالكتابه على الجدران هم هولاء الاشخاص من بين المئه شخص..
فلاتلوموا وزاره التعليم اذا ماصلحت مدارسكم يالشباب وأنتم تسوون الحركات المشينه هذي واللي ماأعتقد أنه تصدر من شخص عاقل ويملك عقليه سليمه من الاضطراب يعني موقف أخر شفته بعيني:عندما كنت في زياره لأحدى مناطق المملكه مررت بمركز للصحه النفسيه في هذه المنطقه فوجدت مكتوب على جدار هذا المركز عباره (أنتم السابقون ونحن اللاحقون) يعني الى هذا الحد أنت متعقد نفسياً ياللي كاتب العباره والله ماأعتقد لأن لوكان ذلك صحيح ماكان عندك وقت عشان تكتب على جدران الغير بس اللي متأكده منه أن اللي في المركز يملكون عقليه أوعى وأفضل منك حتى ولو كانت مريضه بعض الشيء لانهم رغم مرضهم وعدم حسابهم على تصرفاتهم ماكتبوا على جدرانهم وجدران غيرهم..
في الحقيقه شيء يجرح الواحد أن ترى حي من أرقى أحياء المنطقه وتجد فيه هالكتابات اللي مالها داعي وكأن اللي يكتبون ماسمعوا الشاعر يقول:
وما من كاتب في يوم الا سيفــنى
ويبقي الدهر ماكتبت يداه
فياليتك تتمعن هذا البيت وتعلم أنك لما تموت سوف تحاسب على جدار فلان وعلان وعلى أملاك الدوله اللي شوهتها يدك ولازالت شاهده عليك وأنت في قبرك..وأعلم أن الله يراك واذا لم يراك الناس وحط نفسك مكان الناس اللي قاعد تكتب على جدرانهم وحط نفسك مكان أي شخص يخرج من بيته ويلقى جدار بيته أنعدم من الكتابات وش راح تسوي في هاللحظه وأعرف كمان أن كتاباتك المفروض تكون راقيه اذا كنت راقي لان:كل أناء بما فيه ينضح,,والعكس صحيح..
أيضاً أخواني التوعيه له دور كبير جداً في هذا المجال يعني سمعنا في أنتخابات البلديه من يعد بالقضاء على هذه الظاهره وأن كان كل المرشحين قالوا هذا وتم الاختيار ووضعوا في المناصب ولم نرى حتى الان أي شيء وكما هو متوقع كلام الليل يمحوه النهار..
أيضاً البيت له دور جداً كبير فلو كل عائله علمت أبناءها الصح من الغلط كما هو مطلوب وعلمتهم أن الاعتداء على حقوق الغير محرم مارأينا هذه الظاهره تفشت ومنعت دولتنا من التطور الحضاري المفروض..
في نفس الوقت البائعون لهم الدور الاكبر في هذا والمفروض تمنع الدوله بيع المواد والصبغ المستعمله في الكتابه من البيع الا للخطاطون والفنانيين التشكيليون وغير هذا تحاسبه الدوله من تجده يبيع هذه المواد حتى نحد من أنتشارها المخيف اللي حتى مدارس البنات ماسلموا منه يعني مدرستنا والله العظيم من الداخل كلها كتابات للشباب وأرقام وأسماء في تزايد مخيف وكل صباح نرى رقم جديد وحركه جديده منهم..
فياليت لو نتعظ من الامم اللي سبقتنا ونأخذ التقنيه بالشكل الصحيح يعني هم جابوا لك الصبغ والخطاطات مو علشان تشوه ممتلكات الاخرين لاجابوها عشان نستفيد منها في التطور والرقي ولكن للأسف: جنت على نفسها براقش..جنينا على أنفسنا لما واكبنا النهضه والتطور السريع اللي جعلنا نقلد الغرب في كل شيء وياليت الغرب يكتبون على جدرانهم عشان نقول تقليد..
صدق الرسول صلى الله عليه وسلم حينما قال: (لو دخلوا جحر ضب لدخلتموه)..
وذكريات دورات المياه وانتم بكرامه تشوف واحد كاتب ذكريات ابو فلان وعلان بتاريخ كذا وين مالقى ذكريات الا بها الاماكن القذره0000
في النهايه طرحت الموضوع هذا للنقاش وطلب الحلول وهو مفتوح للجميع فلا تبخلوا علينا بالنقد أو الحلول والنصائح اللي ممكن تحد من هذا الداء..
أتمنى أكون وفقت في طرح الموضوع ولكم مني جزيل الشكر..
وعذرا على الاطاله0
اخوكم
اسيـــــ الظلام ـــــر
العرض الشجري
