قبل امس بعـد العـز ذقـت الاذيه=حسيت باللي حس ابه فاقـد الذات
بغـت تروح النفس مني ضحيه=اثر التساهل يقـتل البعـض حزات
لولا رجال الطيب واهل الحميه=يوم اسمعـوني الحق الصوت ونات
شالوني الاثنين وقت اضحويه=في موتر ٍ مصدوم ما فيه لوحات
عليه قرم ٍطيّره في شويّه=ماردته كثر النقط والاشارات
كله نشاط وسرعته فوق ميه =لين اوقفه بين الركون المخيفات
في مركز ٍمغـمور ما شفت زيه=خمسة عشر عام ومديره عـنايات
نشدني المسئول واسمه عـطيه=عاوز ملفك قلت ما منك فكات
قال الملف اللي تبي في يديه=لكن هات الكرت قبل الحجوزات
قلت ان كرتي ضاع فالفيصليه=وانا اتفرّج في بنات الخواجات
بس اطلب الدكتور خل الزريه=مالك ومال الهرج في فايت ٍفات
قال انت عينك عقب هاذي قويه=وانا احسب انك تفهم العلم بسكات
والله لسجـّل ضد شخصك قـضيه=حتى تروح ولاتجي للعـيادات
قالوا له اللي ما رضوا بالخطيه=وين الطبيب ان كان للطب نفعات
جا بوا لي الدكتور يكشف عليه=واخذ على جسمي ثلاثة فحوصات
الفحص الاول قال ما فيه شيه=والفحص الآخر صار فيه اختلافات
والثالث اللي صوّر البا طنيه=واحتار في امره طبيب الاشاعات
ابطا يفكر ثم نادى خويه=دار الحديث ومجمل القول همسات
تشاوروا في حالتي بالسويه=والعالم الله والبلاوي كثيرات
قلت ارحموني واذكروا ويش فيه=تراي مؤمن لو الاقدار صلفات
قال الطبيب اللي قليل ٍحليه=ما عاد تنفع فيك كل العلاجات
انته مريض وعـلتك داخليه=قبل امس جانا واحد ٍمثـلك ومات
حزّة سمعـته قلت حالي رديه=بالله ردوني والاقدام عجلات
ودي اشوف العـود قبل المنيه=واعطيه مالي من صكوك وْ وكالات
واكتب لخوي ان ما لقيته وصيه=يحط قبري في فياض ٍعذيات
هذا وكاد وقصة ٍواقعـيه=ماهوب شيّ ٍمن خيال وروايات
وانا احمد الوالي جزيل العـطيه=رجعـت بدري واختصرت المسافات
وامسيت وسط البيت بعـد العشيه=واصبحت طيّب والنتيجه سلامات
يالله يامن رد يوسف ليعقوب=يا منزل القرآن آيه وسوره
انك تساعدني على رد مكتوب=شخص ٍيدور من ورايه مشوره
خلاني افتح للشعر باب ودروب=واسهر معه حتى الصبح شع نوره
واختار اله ما لاق غالي ومصحوب=بالمسك والعنبر ونفحة عطوره
شعر على كيفي عن الشين محجوب=ما تهظم الشعار من حجم دوره
ما قاله اللي لا قصد فيه عذروب=لا قال له بيتين زادت غروره
شبه الكديش اللي من العز مسلوب=واخطاه عن درب الرشاد معثوره
ياللي تعاتبني ترى الزين مرغوب=والشين كنه شق من فوق عوره
جنب عن اللي شعرهم فرك عرقوب=اللي يشوتون الشعر شوت كوره
دايم يروثونه هجيني ومسحوب=لين احدثوا في ساحة الشعر ثوره
شعر النبط من فعلهم صار معطوب=داسو حماه وقللوا من حضوره
يا صاحبي كان انت شاعر وموهوب=الشعر لازم تازنه ياخو نوره
وزن الشعر في كل الاحوال مطلوب=والقافيه تعني جواز لعبوره
والثالث المعنى للاثنين منسوب=يكمل به المنشور حزة صدوره
هذا حسب عرفي والي طرح واسلوب=وانت انتبه تسلك طريق الوعوره
لا تحسب انك صرت قاضي ومنصوب=في محكمة عدل النفوس الغيوره
مالك ومال القوم غالب ومغلوب=بعض المواقف تتسم بالخطوره
ما يلحقك منها سوى حفنة ذنوب=فوق الذنوب اللي عليك مْحصوره
خلك مع اصحاب المبادي على صوب=اللي مواقفهم معاك مخبوره
ما تحتمل في موقفك هم وكروب=الله يجيرك من عواقب دهوره