سفرة واحد للبحرين ايام الفقر
بعد ماخلصت الثانوية في ست سنوات ( طب ) كنت انا وخويي سعيدان قدمنا على كل الجامعات والوزات والشركات مافيه احد قبلنا لاننا لا اشكال ولا نسبه ولا دورات ولا خبرات ولا نعرف نتكلم أي اختبار ذكاء نجيب العيد وريحة .
صرنا نصيع من حارة لحارة ومن قهوة لقهوة وكان معاي هايلكس غمارة موديل 82 فيه خطين برتقالي واحمر وفيه شنطه حديد في الصندوق ملحمه حاطين فيها زولية حمراء مخيسه ومساند تبن ومركا مرسوم عليها طاوس وصحن ( للبخاري ) وخمس بيالات بادريق .
برنامجنا اليومي العصر نلعب كورة والمغرب نروح ندور بنات نرقمهم ( برطم نملة يحب البنت الموزه ) وما كان يهمنا لا شكل البنت ولا ظروفها يعني سودا ولا بيضاء كبيره ولا صغيره سعودية ولا اجنبيه ماعندنا مشكلة اهم شي بنت حتى مرة لقينا طرارة خاله مريوحه عطيناها ريال مكتوب عليه الرقم ولا دقت , واذكر مرة رايحين نتعشى رجلية معنا 20 ريال شاف سعيدان سورية قال لي يا برطم لازم نرقمها ركبنا ليموزين ولحقناها لين شقتهم في شارع الخزان نزلت ونزلنا وراها دخلت عماره جينا بندخل الا ونلقا ثلاث زلمات بغو يفرشونا انحشنا ورجعنا رجلية من الجوع والعطش كل شوي نوقف ونشرب موية من برادات المساجد ( حمير ) وقبل مانوصل للحارة لقينا بنات جينا بنعطيهم الرقم قالو نم نم (نم نم هذي اشاعه طلعت اول وانتشرت صورها انسان على شكل حيوان وله ذيل ياكل الاوادم ) رجعنا للحارة تعبانين وريحة الصنان يشمونها عن بعد كيلو ونعالي تقطعت ورجولي متفخة .
وبليل نروح للقهوة نعبي بنزين بريالين ولا نرجع الا الصبح ( كلابه ) وننام لين العصر .
الحرب الاهلية
اعلنت الحرب الأهلية لان وضعنا ماكان يعجب اهالينا اول مابدو الحظر الاقتصادي ويزلجون الباب بعد الساعه 11 بليل وحنا ولا بيهمنا صرنا مانقدر نروح للقهاوي ولا نقدر نعبي الهايلكس بنزين ولا ناكل في المطاعم اذا صار معنا فلوس نطلب رز ساده بدون شي (حمام ) ولا فلافل بالحبة (مصري ) نروح لحديقة ونتكي فيها لين الصبح ناخذ معنا شاهي وفصفص وبسكوت وبريال خبز ونسرق من البيت يوم جبن ويوم تونه ويوم قشطة ونحط فوقها سكر وعلى هالحال . وسعيدان يجيب المسجل ويشغل الأغاني الشعبيه قبل امس وسط السوق , وورنا هجرك , وقلت هين , ويا قمر خمسة عشر . ونلعب كيرم ومرة نلعب عكوس ومرة نلعب اونو وانواع السوالف الخاثره .
واذا صار في الحديقة عوائل يبدى الاستعراض كل واحد ينفش شوشته ونلعب بلنتيات كل واحد يمزع الثاني بكل قوته بالكورة ولا نطارح قدامهم ولا نتفل على بعض ونبدا نغمز للبنات ونعطي عيالهم بسكوت وعلى هالحال لا حنا ائيسنا ولا البنات رحمونا وكلمونا .
ومن كثر الملل وشدت الفقر اقترحت على سعيدان ان حنا نشوف لنا رجال وزوجته ماعندهم عيال يتبنونا رحنا عند بيوت الراجحي يومين مرابطين عندهم مادرينا الا الدوريات يمسكونا ويدونا القسم ويقعونا على تعهد ويطلعونا .
وزي كل يوم رايحين للحديقة مرينا البقاله ولقينا فيها واحد اسمه ابو راس ( يشبة فؤاد انور في عز مستواه ايام 94) شاري بكتين مالبورو احمر وما كان يسوق ركب معنا في الهايلكس وعزمناه في الحديقة اللي ناقصها خيمة وبرميل مندي وتصير استراحتنا وبدى ابو راس يسولف ويهايط وينصب علينا وقالنا انه توظف في شركة وتوه جاي من البحرين ويقولنا عنها وعن مغامراته وحنا مبسوطين وكل ماخلصت بيالتة صبيناله وحطينا البساكيت والفصفص كلها عنده مانبية يوقف .
عاد هو شافنا خاقين معه ومعطينه جوه قالنا ليه ماتخاوني للبحرين جلسنا نناظر بعض انا وسعيدان ونبتسم ابتسامه الشر قلنا له ان حنا مطفرين ولا معنا فلوس ولا معنا جوازات قالنا بسلفكم حق الجوازات واول ماتتيسر معكم ترجعونها ومصاريف الخط والسكن علي والروحة بعد شهرين عطانا الفلوس من بكره الصباح حلقنا وصورنا ورحنا الجوازات يومين والجوازات معنا ايام ماكان فيها اسم الآم .
بدى ابو راس يستغلنا لانه مسلفنا وشافنا متعلقين بروحه عاد انا وسعيدان نقبل الرشوة ونبيع ضمائرنا للي يدفع اكثر ولا كان عندنا مشكلة ان حنا نشيل قضيه عن مهرب مخدرات علشان كم الف ولا نعرض صورنا في مجلة بلاي بوي وناخذ كم دولار ونشرط على اللي يستغلنا يجربنا فتره مجانية مو فية قلوب للايجار حنا اوادم للايجار ابو راس فلها, في البدايه نوديه لدوامه وننتظره لين يطلع واذا طلع نرجعه بيتهم ونروح معه لقهوة ابوهيثم يطلب شيشة ولا يطلب لنا (نذل ) ويقول يا برطم ولع الراس واذا ولع اخذه مني ويرجعه لي اذا احترق ويطلب صاروخ شورما واذا بقى ربع عطاها سعيدان .
واذا جاء بيروح الدوام اسكر له الازارير وحطله الكبك واعطره وسعيدان يلبسه الشراب والجزمه ويشيل بوكه ومفاتيحة ويسولف ويحط رجوله في وجهة سعيدان (( قليل حيا )) واذا طلع النهار وصحى يطلع الساكتون و اذا صاد دخل (الدخل نوع من الطيور) ولا عصافير وطاح بعيد ولا تعلق في الشجرة قال روحو جيبوه ( سلق ) خلانا عبيد عنده , بس كله يهون في سبيل السفريه .
بدينا ندبر فلوس السفره انا عندي فديو اشرطة صغير بعته وسرقت من جدي الله يرحمه 200 ريال وسعيدان راح مع ولد عمة الخرج لانه عنده عنز في مزرعتهم وغساله بابطين خربانه مايبونها اهله بعناهم ولا كان عندنا جزم وقت صلاة الجمعة رحنا مسجد الملك خالد وانقي اطلق جزمه الظاهر اني ماخذ جزمة واحد من عيال الملك سعود وسعيدان اخذ بعد واكلم ولد جيرانا واخذ من عندة شنطة واحط فيها ملابسي ثوبين واحد دفة واحد تفصيل وشماغ البسام وعقال وفنيلتين وسروال ابو ربجزه وفنيلة الهلال عليها دعاية بنك المتحد وترنق اديداس (بجامة النوم ) و جزمة الامير .
قرب موعد السفرة وعطانا ابو راس فلوس الخط غيرت الزيت والسيفون وغسله الهايلكس قبل الروحه بيومين معاد جانا النوم انا وسعيدان من الفرحة
يوم السفر العالمي
نزلت المركا والزوليه والبيالات اللي في صندوق الهايلكس وحطيت بدالها شناطنا واغراضنا ركبنا وحركنا مرينا من ساحه المسجد فيه عيال الحارة ندعي قدامهم ونهايط عليهم وهم اللي يصفر واللي يطاق واللي يرجم الهنود واللي يدقدق بالكورة وبدو يوصونا اللي يبي تيشيرت عليه صورة مايكل جاكسون واللي يبي افلام اباحية واللي يبي حبوب تنوم قلتلهم ترانا رايحين البحرين مهب فرنسا وواحد دب وصانا على سمك وربيان .
عبينا بنزين فل اول مره اعبي الهايلكس فل ومسكنا الخط لين وصلنا عاد اشكالنا انواع الشبهات فتشونا الجوازات شويي ويفككون الهايلكس لحد مادخلنا البحرين شوي وادخل في ماصورة اول مره اشوف بنت تسوق على الطبيعة رحت شارع المعارض وسكنا ابو راس في اوسخ وارخص فندق غرفة فيها سيريرين وفراش اضافي لسعيدان ودورة مياة . تروشنا و بدلنا ملابسنا ورحنا المرقص قبل لا يفتح اول ماجو الرقاصات قمنا انا وسعيدان نصفقلهم نحسبهم زي المسرحيات اول ماتجي الفنانة يقوم الجمهور ويحيها وقام ابوراس ويتفل على سعيدان لانه كان قريب منه وقاله لا تفشلونا هذي رقاصه مو فنانة فليناها ورجعنا ثالث يوم والحزن يخيم على غمارة الهايلكس كل واحد يفكر في اللي صار ويقول متى نروح مرة ثانية .
ملاحظات
-1- في شبابنا كان عندنا الوقت والطاقة بس مالقينا اللي يوجهنا ويستقبلنا .
-2- رجعنا فلوس ابو راس على الجزمة القديمة بعد ست شهور .
-3- دارت الايام وردينا كل الحركات الوسخة في ابو راس .
-4- استمرينا عشر سنوات وحنا نلاحق البنات ولا وحدة عطتنا وجهة .
العرض العادي
