بسم الله الرحمن الرحيم
السلام عليكم ورحمه الله وبركاته ,,,
اسعد الله اوقاتكم بكل خير
كثير جداً من اللي يقرون عنوان الموضوع .... راح يتسائلون عن سبب هذا العنوان
وراح تختلف الاراء بين مؤيد ... ومعارض
ولكن ... راح ابين لكم ليه الهلال يعتبر ( ظاهره ) كرة القدم السعوديه ... مع احترامي لكل الانديه الاخرى
خلوني ابدأ من حيث انتهت الاحداث ... خلال فتره بسيطه راحت ... بالتحديد من نهايه مباراة الهلال والاتحاد بالدوري اللي تفوق فيها الهلال بنتيجه ( 1-0 ) الى هاللحظه اللي اكتب فيها الموضوع بعد نهايه مباراة الهلال والاتحاد في ذهاب دور الاربعه في مسابقه كأس الملك للابطال واللي انتهت بنتيجه ( 4-1 ) لصالح الاتحاد
بكل بساطه
بعد نهاية المباراة الاولى وتتويج الهلال بطل للدوري السعودي الممتاز
عمت الفرحه على ( نصف الشعب السعودي ) ... والنص هذا بقسمه لكم على النحو التالي :-
القسم الاول : وهو جماهير الهلال الجارفه اللي اتفقت الدراسات والاحصائات واراء العقلاء انها الاكثر وبلامنازع على مستوى المملكه
القسم الثاني : العقلاء ممن يقدرون الفن والاصرار ويشجعون الكره الحلوه بغض النظر عن الميول ... ونسبتهم ماهي كبيره
القسم الثالث : اللي يكرهون الاتحاد ... اللي كان الاقرب للقب الدوري .... لولا الله .. ثم اراده واصرار الهلالين ... وغالبيه الفئه هذي ينتمون الى جار نادي الاتحاد
وحالياً .. وبعد مباراة الامس .... اللي تعتبر شوط واحد ... عمت الفرحة على ( النصف الاخر من الشعب السعودي ) ... والنص هذا ايضاً راح اقسمه مثله مثل النص الاول :
القسم الاول : مشجعي ومحبي نادي الاتحاد ... والفئه هذي تستاهل الفرحه لان فريقهم ادى مباراة حلوه مع شويه ظروف ساعدته ... استحق الفوز فيها ... وبالتالي استحقت جماهيره الفرحه .
القسم الثاني : اسمحولي اسميهم ( اعداء النجاح ) وعلى فكره هالفئه موجوده بكل دول العالم حتى باسبانيا وايطاليا ومصر كأمثله ... الفئه هذولي شغلهم الشاغل محاربه ( زعيم ) الدوله والمتسيد على بطولاتها ... في اسبانيا نشوفهم ضد الريال مدريد ( رغم اني برشلوناوي ) الا ان هذا الواقع ... وفي ايطاليا ضد نادي اليوفنتوس ( رغم اني إنـتـرآوي ) لكن هذا ايضا الواقع ... وفي مصر ضد نادي الاهلي المصري .... اعداء النجاح هذول ... وناستهم الشماته .... وانا بعد ما الومهم باللي يسوونه لانهم اكيد تجرعوا الفشل .. فحاربوا النجاح والناجحين
القسم الثالث : طبعاً اللي يكرهون نادي الهلال ... واكثرهم من جماهير النادي الجار ... وبعد الفئه هذي ما الومهم بسبب التنافس الكبير بين الناديين ... وضراوه الهلال في هالتنافس ... اللي ابعد كثير عن ناديهم بعدد البطولات وقلص من مفاهيم التنافس
فاز الهلال ففرح نص الشعب السعودي
وخسر الهلال ففرح النصف الاخر من الشعب السعودي
بعد كل هذا
ولو نسينا ان الهلال الاكثر تتويج بالبطولات الداخليه والخارجيه وانه الاكثر جماهيريه ومن امتع الفرق اللي تلعب كره في المنطقه
تتفقون معي ان الهلال ظاهره ولا لا ؟؟
الف مبروك للاتحاد فوزه المستحق ... يكفي انه فرح نص الشعب السعودي
وهاردلك للزعيم هذه الخساره .. ان شاء الله تكون كبوة جواد ... وبالنسبه للنص الاخر من الشعب السعودي اقولهم ... انتهى شوط وباقي شوط ... صحيح اننا كسبنا بطولتين هالموسم
بس الهلال يعشق الصعاب ... مثل ماجماهيره تعشق الذهب
ان شاء الله يكون رجال الهلال قد التحدي في مباراة الاياب .... ونرد الصاع صاعين
ان حصل ... فهذا الهلال المستحيل ماهو في قاموسه
وان ما حصل ... اقلها راح يثبت للجميع انه مستحيل يكون لغمه سائغه مهما كانت الظروف
والسلام عليكم ورحمه الله وبركاته