خل ياللي في هواك القلب ذايب ******* كيف تجرح خاطري الأمر لله
تجهل المعروف كن القلب طايب ******* ماخبرت اللي يود يعاف خله
أيش بلاك أوقدت بالصدر اللهايب*******لي معاند وأيضاً لسيفك تسله
ماني اللي لابغيته ف الرغايب ******* جاك يطلب في رضاك الكون كله
أسدل أستار المحبه لي سحايب ******* تاخذ عيوني وقلبي تستحله
العطايا فن في روح الحبايب ******* وعطف سيدي وسط قلبي يستدله
ماخبرت الحر يرضى بالغلايب ******* وأنت فيك الظن خير وفي محله
ليه تزعل مني ماعندك سبايب ******* وأنا متحملك زله بعد زله
الزمن دوار فيه من العجايب ******* شي يحلى لك وشي لك تمله
الصبر واجب وكل له ضرايب ******* الصبر مرغوب في دقه وجله
ذقت مر الصبِر من يدك شرايب ******* وكنت تسقينا العسل حلو تهله
يازمان نشوف فيك من الغرايب******* المصالح تكتسي تشريع حله
صرت حاير ف الزمن قاسي شوايب******* أغتربت وقلبي لايمكن تذله
من يراعيني تذوب له الذوايب ******* ومن يعاندني فله درب يدله
راح خلي يامعين له ذهايب ******** مابقي من طيف خلي غير ظله
وعاد خلي يالبن سكر ورايب******* مرحبا وأهلين يامحسنك طله
أنتعشت من يوم جاني بالركايب******* قال عفوك والزعل مانحتمل له
أعترف لك ماتقوله شي صايب********ولاأعتزى شخص بمثلك عزوة له