شفتها يانواف صدفة بعد ما غابت سنين=عند قسم المختبر وسط مشفى الجامعة
جبيتها ثم قلت ممكن في سؤالي تسمحين=ناظرت فيني بدهشة نظره متواضعة
قالت انته تحسبني من بنات صايعين=تحسبني في زماني عن طريقي ضايعه
قلت أنا ما راح أطول كل أبوها كلمتين=وأبعدت عني شويه ثم جتني راجعه
قالت أسال واضح انك من رجال طيبين=بس هرجك يالسنافي كان وشهوة دافعه
قلت أنا حبيت وحده يوم كنا صغيرين=ومن ثمان أسنين راحت للمواصل قاطعه
عقبها ما ذقت نوم يهتني به النايمين=ساهر في طول ليلي لين شمسي طالعه
اذكر انه فيه حبه فوق ثغره من يمين=واذكر انه لا جرينا كان شعره تابعه
واذكر انه عاشق فالورد الياسمين=صار قلبي بالورود اللي عشقها زارعه
طابعا اسمه بقلبي فيه سين وفيه عين=وفيه ألف وفيه دال وسط قلبي طابعه
قاطعتني بقولها سبحان رب العالمين=كررتها مره ومرتين ورابعه
قلت وشفيك وشبلاك بابنيه ترجفين=ليش عينك يابنيه من كلامي دامعة
قالت الموقف وقلبي والمحبة والحنين=كيف أشوفك بعد ما كنت عنك قانعة
قلت أنا بسالك أن كأنك أنتي تذكرين=عن مواثيق ثمنها من حياتي دافعه
قالت ظروف الزمان ما تطيع العاشقين=بيعوني غصب حبك لو هو ماني بايعه
أنا في دنياي حالي كنها حال السجين=حتى لو فكوا سراحه فيه شي مانعه
زوجوني غصب واحد وحرموني حاجتين=السعادة في زماني والحياة الرائعة
والحين أنا أم لثلاثة عندي ريم وياسمين=والولد ا سمه على اسمك والمشاعر جايعه