السلام عليكم ورحمة الله وبركاته
.
.
.
.
يقول الي قضى ليله لحاله *** جفاه النوم من شيً طراله
مضالي ماضي ماظنه يدبر *** عظيم الهم جوّد بي حباله
كسر رجلي قتل حلمي وخيّم *** الا ياعسر وياصعب احتماله
ولو جاني على هيئه واشوفه *** الا يامانعي من اغتياله
نظمت بيوت في صدري تلجلج *** أبت تخضع لصدري واحتلاله
تبي نور الفضا يسطع عليها *** وتنشر طيب .. الا ياطيب فاله
كتبت الشعر ماهو لجل أمر ن *** يظنونه وانا مالي وماله
واذا كنت بحسن نية وطيبه *** وهبت اي انطباع لأي حاله
فـ انا اسف ولو ماني بمخطي *** وفكرك لايغرّك باحتماله
كتبت الشعر ماهو لجل اشيّد *** جسور ً للعلاقه والزماله
كتبت الشعر ماهو لجل اباهي *** ولا لجل الهياط او الجهاله
كتبته واثق ومعجبني شعري *** ماهو قولة يالاله ياليلاله
معاني واضحه واخرى تخفّى *** يجيني البيت .. انا لا ماعنى له
كتبته بس.. لجل ارضي شعوري *** واعزّي (الشعر) في شيً جرى له
جرى له وش جرى له ماجرى له *** بعد عزه تغنوّ به حثاله
جرى له وش جرى له ماجرى له *** تحزّن حالته عزيّ لحاله
بعد ماكان حاضر بالمعارك *** لنشر الدين ماهي للجهاله
بعد ماكان قوةّ للي حوله *** حسامً صارمً يُخشى نزاله
مضى له مع هل التوحيد ..ماضي.. *** يشّرف هاللغة ماضي مضى له
الا ياماضي شف وش صار فينا *** نقاتل بعضنا نقص وجهاله
ونزبن لليهودي نحتمي به *** بحقوق انسان وناتو والعداله
عداله بالعراق اكبر عداله *** عدالة شيّ مرادفها احتلاله
وحقوق انسان تفتك بالمساجد *** بصيرتنا حصل فيها استماله
وناتو يجتمع من كل بقعه *** وحنا نجتمع هذي استحاله
شعوب تثور وحكامً تدسّس *** دمى بيدين قُرّاء (الكباله)
ومصيبتنا نشوف إعلام فاسد *** يبث سموم كذبه واحتياله
تخيّر له {مسمى} خاص فينا *** يديره من يخون الاسم و آله
اقول القول وعندي له ادلّه *** ولا احكي بحاجه الا عن دلاله
وياناشد عن قصيدي وش جديدي *** بكيت الشعر ... انا اول من بكى له
ألا ياشِعرُنَا قد سَاءَ حَالُك *** وقَد كُنتَ الحَماسَةُ والجَزاَله
الا ياشِعُرنَا يَكفِي عِتَاباً *** فَمَا تِلكَ الدُمُوع إلا دَلَاله
لقَلبٍ يضّمِرُ الشَوقَ لِنصرٍ *** نُعَظِمُ فِيه رَبّي وجَلَاله
ونُنشِدُ قَائِلينَ اليومَ بِتنا *** نَسُودُ الارّضَ حُكماً وَعدَاله
ونَنظِمُ أجمَلُ الاشعَارِ .. فَخَراً *** بِدِينٍ قَد تَفَرَدَ فِي كَمالَه
يقوله من قضى ليله يفكر *** جفاه النوم ... وهذا الي طراله
.
.
.
.
بقلمي
.
.
.
.
.. 
العرض العادي
