تمشي بي الدنيا ولا ادري على وين
وامشي معاه ولا وصلت النهايه
مشيت اشوف الناس ياحمود ماشين
تبعتهم مالي مع الركب غايه
ان سيرو ركبانهم يم حطين
امشي معاهم وادري الركب تايه
حطينهم ماهي على صالح الدين
وصلاحهم حتى على الدين سايه
بحلوقنا شوكه وبالصدر سكين
نرفع لهم من ظيم الايام رايه
ندفع لهم ديه عن افكار لينين
وعن محرقت هتلر دفعنا جبايه
من ضعفنا ندفع عن الغير ضعفين
جانين لو مافيه اصلا جنايه
حتىالشعوب الي بنت سور برلين
تدرك نهاية سورها من البدايه
ياجارة الوادي على ويش تبكين
اشجاك راعي الناي ملعون نايه
يعزف على اوجاعنا في فلسطين
قله يغير صوت نايه كفايه
ياجارة الوادي طرب لا تغنين
ارمي النقاب ولولحي بالعبايه
لا تبلشيني وين؟ هم ليه دارين
نمشي وكلا يتبع اليوم رايه
نمشي وكن دروبنا مستقيمين
جيران نبقا لين مالا نهايه
ان سيرو ركبانهم وين داوين
وان نوخوهن غصب ماهي هوايه
واذا من الاخر تبينه مجانين
يالله طلبتك للمجنن هدايه