اولا مبروك عليكم الشهر الفضيل وجعلكم من قيامه وصيامه واعاده الله
بالمن والبركات
<<<<<< عندي احساس انك من النوع راعين المعاريض عند قصور هالامراء
المهم ان شالله انكم طيبين وبخير وبعافية
اللي مايدخنون يقرون هالمووضوع في الليل ولا في النهار عادي مافيها بروبلم
بروببلم= مشكلة بس باللغة الاوردية
واللي يدخن يقراها في النهار لاني عارف انها واصلة لحد خشمه وقاعد يناظر للزقارة بكل براءة
ويقول اخ لو اليوم مهوب رمضان كان شفيتك يابعد قلبي
والزقارة تناظر له بكل استحقار وتقول كلمة تحسسك حتى الزقارة عندها روح ايمانية
( كل تبن )
عشان كذا المدخن يفضل انه ياخذ هالوردة اولا ويروق دمه ويقرا هالمووضوع ويعطيني رايه السديد ولو اني عارف انه اذا قراء الموضوع وخلص بيقول لي لاابوك ابو اللي علمك الكتابة
مسوي لي خفيف دم انت ووجهك رح انثبر في منتدى التعارف لين افكر فيك
المهم حان وقت الدخول الى صلب الموضوع وسوف نبدأ في اقتحام الموضوع من خشمه والمكث في صميمه
هذا الله يسلمكم في احد الليالي المكفهرة على صوت زغردة الطيور والسماء ممتلئة بالنجوم الصغنطوطة والليل يعتريه اللون الاسود كأنما رجل عبد يتجول في شوارع منفوحه
كان عبيد قاعدن زهقان وفي حيرة من امره وجاه شوشو = دلع الشيطان وقال له وش رايك
نروح نتسبب في الشات ونطلع لنا بكم سحليه
مع العلم ان دحيم غدا كشنة من كثر حبه للبنات ومع مرور الوقت نبت في شعرة مكرونة
وصار شكله يميل للصينية من كثر مايقول اغدي كشنة
المهم دخل الشخص مذكور اعلاه للشات وجهز كيبورده وحماه ووضع خشته بكاملها امام الشاشة
وفاق فمه والسعابيل تتدحرج كأنما صنبور مياه مفتوح من كلتا الجهتين البارد والحار والازرق والاحمر
شاف بنت يقالها الدلوعة
راح خوينا في الله رافع ثوبه وقاط نعاله وجاي مهرول يبي يطمر على سطوح دلوعة
يوم حس ان المحاولات بائت بالفشل
راح جاب له سلم ونط عليها وهي على غفلة من هذا
المهم مسيكينة يوم شافته لمت ملابسها والطشت وانحاشت وهو يناظر باستغراب ويسأل نفسه
انا وش سويت لدرجة انه من كثر الشكوك راح للحمام اعزكم الله وقاط يتمقل في خشته ومالقى شي
بس انه شاف شي نازل من خشمه وانتهى الموضوع عندما قام وجاب الشماغ ونثر ام اللي في خشمه
على الشماغ حتى الشماغ قام يناظر لعبيد باستغراب وقال الله يقرفك وطرش من حومة الكبد (التسبد)
المهم رجع للشات واخيرا ردت عليه الدلوعة وطبعا من هالرسميات مساء الخير وكيف الشات معك
وكنه يعرفها من شهرين
قالت له وش تبي اخلص
قالها افا يابنت الناس هذا وانا حاط كل امالي في اني الاقي صديقة وفية
تحميني من شرور الزمن
البنت ماعرفت ترد وشكلها من النوع اللي اتذوب من اول تسطيحه
قالت له طيب انت وش تبي بالضبط
قالها عبيد تبين الصدز انا ودي اعبر لك عن شي يقرقع في قلبي وكنه ماكينة دتسن مافيها زيت
قالت له وش عندك
قال بس اني مستحي اقولها وماادري من وين ابدأ
قالت له ابدا من الالف بس اخلص
قال اولا خذي هالوردة وشميها عل وعسى تكون سبب انفتاح شهيتك
<<<<< عندي احساس ان عبيد في هالحالة بالضبط غدا كشنة بالدجاج ولا وش جاب الشهية الحين
المهم البنت راحت خرخير يوم عطاها الوردة وتحمست وحست انه فارس احلامها
سورحت في خيالاتها متخيلة ان عبيد راكب فرس ابيض ولابس بشت وهي لو تشوفه وهو قاعد على النت لابس سروال سنة وفنيلة علاق وماعنده الا سيكل ومرتبته مرفوعة خمسة كيلو والدركسون مليان شطرطونات وحاط ورا علم
المهم يقاطع حبل افكارها عبيد وهو يقول الة وين رحتي دلوعة انتي معي
قالت هلا معك وش عندك
قال تصدقين اني من يوم شفت خشتك هنا وانا حاس ان الدنيا لونها وردي مثل هذا النمر الوردي اللي في الفيلم كرتون ترم ترم ابو ذيل ماعرفتيه
قامت تضحك مسيكينة وطاحت من الكرسي وهي تقول له الله يرجك بصندوق طماط ياعبيد
والله ان دمك خفيف ياقلبي
الخبل راح لامه قال لها شوفي يمه صندوق الطماط لاتقطونه اليوم
وراح لغرفته وغلف صندوق الطماط باوراق قص لزق وحط فوق ورده ادعائا منه انها ذكرى من دلوعة
رجع للدلوعة وقال لها في شي ثاني ودي اقولها
قالت قل قل الله ياخذ ابليس والله انك ضحكت سني عسى الله يغربلك
هو استانس وقام رافع هرمون الاستبهال وكتب في خروف تزاعل من نعجة طلع على الشارع العام
ووقف له تاكسي قال له على المصلخ لا ابوها حياة
تتفقعت مصارين البنت من كثر الضحك وبلغت اوج قهقاتها
قالت له والله بشتاق لك ياعبيد ولخفة دمك بس اني بكرة بسافر لجدة
هو يقايل يتميلح ومسوي فيها رومانصي
قال وشوله تروحون على الطريق العادي وش رايك ازهم (اتصل) على خويي وزير المواصلات
واخليه يفرش لكم الدرب سجاد احمر وينور لكم الطريق وكل اثنين كيلو يحط لكم محطة
في هذه الاثناء فطست دلوعة من الضحكة لدرجة انها صارت الى يومكم تفطس وتقوم
قالت له تقدر من جد
قالها ايه ياحبيبتي انا عبيد فوق القانون
في هذه اللحظة المليئة بالرعب السياسي
قامت الشاشة تتلفت يمين ويسار بسرعة تخطف الانظار
والكيبورد قام يرقل ويرتجف وجاه مرض تصافق الركب اقصد تصافق الحروف
حتى حرف اللام والميم صارو يتناقزون من الخوف
والماوس شنق نفسه من الخوف بالحبل اللي موجود خلفه
وطبعا الكيبورد طمر وفتح السي دي رام وتوزى (اختبء) في وسطه
لكن السي دي رام قام بحركة تعبر عن رفضه للكيبورد عندما فتح نفسه وتفل الكيبورد والسي دي الموجود بداخله خارجا وقال لهم لاابوكم لاابو تسلب (كلب)
الكيبورد مالقى له حل فقام مسك السماعات كانت هي الاذن المناسبة والصاغية للكيبورد
وهو يشكي له معاناته مع هاللي اسمه عبيد وزلاته الغير معودوة في السياسة
والسماعات تبكي من القهر لحاله وتقول له بصوت موسيقي (احسب الناس في طيبي وعلى نفسي ابديهم)
وهو يبكي من ودموعه اربع اربع
في هذه الاثناء يرفع عبيد يده ويمسك الكيبورد مع ذيله ويمسطه في الارض
ويعاود الكيبورد الرجوع الى جبهة عبيد بكل مالديه من قوة
راسما على محيا جبهته ( كل تبن )
نصائح لكم ايها المستخدمون
المستخدمون = كلمة دايم يستخدمونها في الشات
1_ لا تحاول تقرب من السياسة لاني اكتشفت ان الكيبورد لديه نفس بشريه وهو يبكي من الخلف
واذا طفح الكيل وحس ان مافي امل تلاقيه يعلق ويبذل قصارى جهد عشان ياخذ قسط من الراحة
عند خويته (فورمات)
2_ حاول ان تداري كيبوردك وتلبي متطلباته من حروف كالميم والتاء مثلا
3_ لاتحاول تضيق صدر الماوس لانها حساسة بسرعة واول مايطري في تفكيرها في الزر الايمن
هو الانتحار
حتى الكيبورد صار يبكي
ويقرا هالمووضوع ويعطيني رايه السديد ولو اني عارف انه اذا قراء الموضوع وخلص بيقول لي لاابوك ابو اللي علمك الكتابة
العرض العادي
