يامرحبا ترحيبة الطيب والعود=الف ٍ هلابك شرفتنا الزياره
ياسعود قرّب دلة الهيل ياسعود=ابوك حِر وتكفي الحُر إشاره
لا يلحق الوالد من الناس منقود=او حتى تلميح ٍ فعرض العباره
يابوك فك الباب لايصير مردود=والصوت بالترحيب خله جهاره
وافتح مجالس فوقها الزل ممدود=ثم ولّع الانوار زيد الإناره
هذي عوايدنا بها الجود مشهود=كل ٍ يرحب لا لفى الضيف داره
واليوم جا ضبي ٍ يسولف مع العود=ضبي ٍ وبه ورد ٍ على الخد اماره
الشعر كاسي المتن وعيونه السود=خلّت ترى عودك يضيّع مساره
القلب يرجف كن دقاته إرعود=والفكر راح وساح وضيّع ومداره
ياليت جسمي للمشاوير مشدود=لمشي فدرب الحب واركب قطاره
مير الزمان يروح والعمر محدود=وايام بالجمله تروّح خساره
هذي قوافي جابها القول مقصود=إما يقول جنان والا شطاره
اختي الكريمة
همسات حالمه
اهلا وسهلا بك ِ وبزيارتك المباركة
تشرفت بك وبتواجدك
وللحق اقول انني كتبت الابيات اعلاه من الفكر إلى الكيبورد مباشرة
حين وردت الخاطرة كان ابني سعود يقف امامي ومثـّـل لي في مخيلتي هذا الخطاب الذي خاطبته به
اشكرك ِ على ان كنتي سبباً في إظهار هذه الابيات
وهي لاتتعدى خيال ( العود ) والد سعود الذي إستنفره للحظات لكتابت الابيات
اكرر شكري وتقديري