الله من الطفش ... ودي اغير جو .. ودي اعيش صح .. ياما حلمت اني جالس مع اخوياي وكلهم بنات .. مليت من وجيه الشيون ودي اغير ... بالله عليكم هذولا اخوياي (بعيبس ، برطم ، صفرين ، غليص ، دحروج ، الفراساني ، بجي ، شب اللمبه ، نجو كرم )هع هع هع لا احد يعلق على اسماء اخوياي تراى ابفقع وجهه...
المهم
ما فيهم اللي يفتح النفس ... عشان كذا أنا فكرت ، ثم فكرت ، ثم قررت إني اصادق بنات .. وبما اني حلو و مووووت (من جمبها)... وكل الشباب ودهم يصيرون اصدقائي .. ودايم يقولون وش هالجمال اللي فيك .. انت متأكد انك ولد .. اخاف انك بنت .. و انا دايم تحمر خدودي و استحي اذا قالولي هالكلام ... ما اتحمل احد يغازلني ياااااااااااااااااي <<< ودي يشوفون شكلك يالثور و انت تقول هالكلمه ...
قررت اني ادخل ثانوية بنات و ادرس معهم ... كنت احتاج بس لشهاده و دفتر عائلة مزور ... من اروح له من اروح له .. احس اني بديت افقد الأمل .. وحلمي اني ادرس مع بنات تبخر ... و فجأه ذكرت ان بعيبس عنده خبره في التزوير .. و أنه قد دخل السجن 15 مره .. 14 مره بسبب شغالات و مره بسبب الخدامات ... قلت اكيد ان عنده خلفيه عن التزوير ... و انا اللي اخذ قميص لشغاله عندنا .. و اطير طيران لبعيبس .. وادخل عليه في المجلس حقه .. والقى فوق راسه شغالتين معهن ريش نعام يهفون عليه .. و شغالتين جالسين يهمزون رجليه .. و شغالتين جالسين يأكلونه عنب .. و انا اللي اطب عليه و اجدع القميص في وجه وقلت له داخل(ن) على الله ثم عليك تفزع لي .. و هو اللي يشم ريحه القميص .. قال الله يا هالريحه ..
ريحة زعبوره <<< ودي اعرف وشلون عرف ان اسم شغالتنا زعبوره .. قلت ايه هذي زعبوره شغالتنا تسلم عليك و تقول نبيك تفزع لكفيلنا ... مير يفز من محله .. قال من يعز على زعبوره يعز علينا .. وش بغيت .. قلت ابد الله يسلمك مهنا شي(ن) كايد .. كل اللي ابيه تزوير بعض الأوراق الرسميه عشان .... (وقلت له السالفه) قال بس .. ما طلبت شي ... جب الشهادات و دفتر العائله و ما يصير خاطرك الا طيب .. وانا اللي انقز من محلي و اجيب له شهادة اختي و دفتر العائله حق ابوي و انا طاير من الفرحه .. بكره بروح ادرس مع بنات .. رحت للبيت وجبت الملف العلاق الأخضر .. وحطيت كل الاوراق المطلوبه .. وجلست اقرى في الاسم .. اسمي صار (زليخة بنت وينك بن طلال آل أشنب طلق) ... و انا اللي ما صدقت ...
جا الصبح ... و اركب ليموزين قلت له أقرب ثانوية بنات أهليه (المدارس الأهليه اكيد ان بناتهم مطخطخات و فلوسهن واجد و ميه الميه حلوات .. و هو اللي يفرفر فيني شوارع الرياض اللين دخت معد ادري ويني فيه ... و هو اللي ينزلني عند ثانوية اسمها (ثانوية الأقمشه لحلاقة الأحذيه الغذائية ) <<< لا احد يقول لي هذا اسم مدرسه والا كل شي بريالين .. الموضوع موضوعي وانا حر فيه <<<
... وانا اللي ادخل باب المدرسه ... وانصى المديرة ... دخلت مكتب المديرة ... وانطل عليها ملفي .. قلت انا طالبه جديده و أبي اسجل عندكم ... قالت يا هلا و مسهلا فيك .. هذي الساعه الخراشه .. عطيني فلوسك عشان نسجلك .. قلت بس تبون فلوس .. و انا اللي اطلع بطاقة الأحوال على بالي بطاقة فيزا .. قلت والله ما معي كاش .. ممكن عن طريق الفيزا .. <<< من اولها بيسوي بنت نعمه ... قالت لا والله روحي اسحبي و تعالي .. قلت خليني اشوف الشنطه اذكر ابوي معطيني مصروفي اليوم 5000 الآف .. وانا اطلع الفلوس .. قلت كم قيمة الفصل الدراسي الواحد .. قالت خمسطعشر الف للفصل ... مير انكتم و شهقت يوم سمعت المبلغ .. و انا على بالي اصرف .. قلت خسطعشر الف بس .. يا ربيه والله انكم رخيصين بالمرررره .. لكن انا معي 5000 ريال خذيها دفعه اولى للتسجيل .. و بكره اجيب لك الباقي .. قالت هاتيها بس بكره لو ما جبتي المبلغ ما فيه دخول .. قلت لا تخافين بكره باقي المبلغ عندك ... قالت انتي بأي سنه .. و الله و اتوهق مدري في أي سنه .. واجلس افكر اقول لها اني بأول ثانوي .. لا سنه أولى كلهم بزران .. برضوا سنه ثانيه .. قلت انا بسنه ثالث .. قالت انتي بأي قسم ادبي علمي أي قسم .. مير اتوهق .. قلت لو اروح للعلمي بأنهبل .. ياهم ثقيلين طينه .. وكل وقتهم ما سكين كتاب الأحياء أو كتاب الفيزيا .. و الله ان يطقني الهم ... قلت لا ادبي .. بنات الأدبي مهبل .. و بايعينها .. قلت ما لي الا الأدبي .. خلني اسفهل وانبسط معهم ياهم زاحفين ... قالت عندنا ثلاثه فصول لسنه ثالث ادبي .. الفصل الأول فيه 15 طالبه .. والفصل الثاني فيه 20 طالبه و الفصل الثالث فيه 30 طالبه .. انت أي فصل تبين تدخلين .. قلت ولو اكيد ابو 30 طالبه <<< الثور ما صدق بيجلس مع 30 بنت ...
دخلت الفصل ... و مسوي مستحي ... و كان الفصل مليان ... و انا اسرق النظرات ادور لي وجه(ن) يفتح النفس عشان اجلس جمبه ... و كل البنات يطالعون فيني ... قلت اجلس قدام هالحين .. و بعدين يصير خير ... و في اثناء الشرح كل شوي التفت ورى .. ابي انشل على وحده و إلا ثنتين يصيرون صديقاتي ... و اكون معهن علاقه بريئه نياهاهاها نياهاهاها ... بس المشكله يا كثر الشيون في هالفصل .. و كلما التفت لقيت بنت تأشر لي و ترسل لي بوسه ... قلت يلعن ام قلة الأدب .. وش هذا اللي من اول عشر دقايق يسوون كذا اجل في نهاية اليوم الدراسي وش بيصير ... و انا على بالي مركزه مع المدرسه .. احس بشي طقني مع راسي .. و التفت .. إلا هي بنت تطالعني و عاضه على شفايفها و تجلس تغمز لي ... بصراحه قلت اخاف اني غلطان ما دخلت مدرسة بنات .. ... يلعن ام الدشاره يا شيخ .. و ش هالبنت اللي ابتلتني .. وش تبي بالضبط ... و على هالحال كل شوي ترمي علي ورقه او أي شي عشان التفت عليها ... مير ارفع يدي .. قلت ابله شوفي هذي ترجمني <<< تحسون انه مصري او سوري على هالحركات هههههههههههههههههه ... قامت المدرسه و قالت منهي؟. .. قلت ذيك البنت .. قالت مضاوي .. قومي اوقفي على الجدار ... ما تعقلين ابد الا اللين نستدعي امك ... قامت و بكل برود وهي تسحب رجلينها ... لكن وش اشوف ... اشوف ولد قدامي مو بنت .. الكموم مصفطه .. الأزره مفتوحه ... و الكتوف مرفوعه على فوق و الصدر مرزوز .. ما بقى إلا تلبس زبيريات و تحط سلسله في مخباتها و شويه حب (فصفص) و تصير ولد على سن ورمح ... و الله و توقف على الجدار .. و ياليتها ما وقفت ... ابتلتني هالمضاوي ... مغير تطالع فيني نظرات غريبه .. نظراته تدل على شي تبيه .. قلت طنشها و ما عليك منها ...
انتهى الدرس ... و اشوف مضاوي متجهه لي .. جت عند اذني وهمست .. ما عليه يا زليخة .. مقبوله منك يا بعد عمري آآآآآآآآآآآآه ... ثم مشت .. و انا من هول الصدمه مدري وش اقول او ارد .. المشكله ان البنت دبيه و شينه .. بعدين ما تفرق اذا مشت هي تمشي ورى و إلا قدام .. ولو جلست على كرسي ضاعت معالمها وربي ما تدري وين راسها من يدينها من بطنها .. يعني باختصار لو ضيعوا اهلها كتلوجها راحو فيها .. اتوقع لو فعلاً اهلها ضيعوا كتلوجها بيركبون فيها ليين و يقلبونها صخانه .. يعني لو انها زوينه كان قلت مشها .. بس وربي اشين مني ...
بدى الدرس الثاني ... و ما دريت الا الطالبه اللي وراي تنغزني .. التفت عليها إلا تعطيني ورقه تقول انه من مضاوي .. التفت على مضاوي و نفس الحركات السابقه بوسه و عض على الشفايف و غمزات متقطعة .. اخذت الورقه وش اشوف ... خرابيط مدري وش تبي و رسمات قلوب ... و انا اللي التفت عليها قلت هين اوريس يالصايعه .. ان ما ربيتك ما اكون زليخة .. و الله و انقز للمدرسه و اعطيها الورقه <<< تحسون انه ماله داعي من جد ... و تقوم المدرسه و ترسلها هي و رسالتها للمرشده الطلابيه ...
رن جرس الفسحه ... و انا الى هالحين ما بعد كونت صداقات .. وقلبي يفرفش في محله يبي يصادق أي بنت .. طلعوا البنات من الفصل ... قمت بروح للحوش الا مضاوي عند الباب .. قالت وين على باب الله ... قلت وخري عني يالصايعه يا قليلة الأدب <<< شوفوا من يتكلم هههههههه ... قامت و سكرت الباب الفصل علينا و حجرتني في الزاويه .. قالت ليه ما تحسين فيني .. حرام عليك .. ليه كل هالتغلي .. قلت انتي وش تبين بالضبط .. قالت ابي اكون صديقتك .. و الله اني احبك من اول ما شفتك ... و هي اللي تقرب مني اكثر ... قالت الى هالحين ما حسيتي فيني .. قلت ابعدي الله يرحم والديس .. ابي شوية هواء باموووووت ... قالت بسم الله عليك جعل يومي قبل يومك .. قلت الله يسمع منك .. قامت و مسكت يدي و حطتها على قلبها .. قالت ما تحسين بنبضات قلبي كيف تدق .. قلت بالله هالحين وين قلبك ... بالله عطيني كتلوجك عشان احدد موقع القلب ... قالت ما يحتاج تحددينه .. انت قلبي .. وروحي .. وحياتي .. وتبدا تفتح ازارير مريولها و انا اطالع .. و كل مالها تفتح .. و انا قمت ارتجف .. وش بتسوي هالحين هالمهبوله .. ماني ناقص خنازير (اعزكم الله) ... و قامت دخلت يدها جوا صدرها و طلعت لي ورده .. قالت هذي هديه مني لك .. ارجوك اقبليها ... قلت بشرط إنك تعطيني مقفاك ... قالت اعطيك عمري مو مقفاي بس اقبلي الهديه .. و انا اللي اخذها ... قلت وخري خليني اروح افطر .. و الا اقول لك سديتي نفسي عن الفطور .. وخري خليني الحق على دورة المياة حومتي تسبدي ...
بدى الدرس ... و مضاوي جالسه تقردن فيني عشان اجي ورى عندها .. قلت ما تحملتك وحنا بعيدين عن بعض وشلون لو لصقتي جمبي ... قالت بس اليوم .. انا عندي كلام كثير بأقوله لك ابي افضفض عليك ... قلت نعنبوا بليسك عندك فخذ اكبر مني عشرطعشر مرة .. اجلسي فضفضي عليه اللين ينهبل ... قالت القلب و ما يهوى ... و قلبي ما هوى الا انتي ... قلت وبعدين و متى بتعقلين ... و قفوك المدرسات ما فيه فايده .. نزلوك للمرشده برضو ما فيه فايده ... متى بتعقلين و تخلين عنك هالسخافه و قلة الأدب ...
الدرس الأخير .. انا ما شبكت ولا بنت .. وربي بلاني بالديناصور مضاوي ... و مضاوي لازالت تتحرش فيني .. جت وحده من الطالبات تقول لنا خبر كان كارثه بالنسبه لي ... قالت ان المدرسة مو موجوده .. يعني الدرس هذا ما عندنا مدرسه ... و تجيك مضاوي طايره من الفرحه و تطب على بطنها (تسوي حركة اللاعبين اذا جابوا هدف) ... قالت بنات .. ما ابي ولا وحده تجلس في الفصل .. يالله اطلعوا .. ابي زليخة في كلمة راس (و بما ان مضاوي هي العريفه و مهجده كل البنات خافوا منها و سمعوا كلامها) ... قلت لا الله يرحم والديكم لحد يطلع ... اجلسوا و فرجوا عني كربتي ... حرام عليكم تطلعون و تخلوني ... و تسكر مضاوي الباب و تجي تجلس جمبي ... قالت ما بعد حن قلبك علينا ...
و انا اللي تطلع عيوني .. و انا ابي الفكه .. بس ماسكتني .. و جلست ارفس لأن وجهي صار تحت ابطها ... و انواع العطور .. يالله من فضلك الجنه ... و ما فكتني الا عقب ما شافت جلدي صار لونه ازرق من الكتمه ... قالت انا عازمتك الليله على العشاء ... تعالي عندي في البيت .. اوريك غرفتي و ملابسي الجديده اللي شريتها من قس (Gusse)<<< يقولون انها ماركه .. مدري اذا كانوا يلعبون علي او لا ... قلت من جدك تتكلمين انا ما تحملتك و الطالبات و المدرسات معنا .. وشلون بأتحملك وحنا لحالنا و مقفلين علينا الغرفه ... قالت و الله لأسعدك كل حياتك .. بس تعالي ... انا ما اتحمل حرام عليك ... حسي فيني ... و انا اللي اطلع من الفصل و اروح للمديره ... قلت شطبي على اسمي من هالمدرسه .. انا ما راح ارجع ... قالت ليه ... قلت لها كل السالفه .. قالت انتي كذابه و قليلة ادب .. ولازم تتربين .. و فصلتني من المدرسة ....
__________________
أســـيـــر نـــجـــد
يوم من حياة مصرقع بمدرسة بنات ( فوق ال 18 سنة
العرض العادي
