أنا جايكم اليوم وجايبلكم موضوع ان شاء الله انه يعجبكم ... المهم أترككم مع الموضوع ...
************************* الشخصيات المشاركة *************************
1- أنا بدور ميشو ...
2- nada بدور ندوووو ...
3- هيك وهيك بدور طوني ...
4- قارئ الفنجان بدور مسعود ...
5- الشاطر بدور مرزوق ...
************************* المشهد الأول *************************
ميشو جالس مع أخوياه ((مرزوق ومسعود)) ,,, مجتمعين اجتماع عمل ((بزنس)) <<< شرايكم فيني وبثقافتي العالية
مسعود: والله العظيم إن ما بيمشي سوق المحل غير فول الجرة اللي تسويه ندوووو ,,, والله فول الجرة حقها شي ثاني ,,,
مرزوق: أقووول لا يكثر انت وجرتك ,,, والله القلابة أحلى ومطلوب أكثر وماشي سوقه أكثر هالأيام ,,, حتى بأمريكا بدوا الناس يتجهون للقلابة <<<< يسمع بأمريكا ,,, أشوى إنه ما قد طلع من منفوووحة
مسعود: ياخي خلك أصيل ((أصيل ولا دفة)) ,,, والله الجرة هي الأصل وهي اللي بتبقى ,,, قديمك نديمك إلا كما طار وقع <<<< هذا مثل
مرزوق: ياخي والله القلابة أحلى وأنعم <<< أموووت يالنعومة
((الاجتماع هذا عشان الشباب يبون يفتحون مطعم فول وتميس بإدارة الشيف ندووو ومختلفين وش بتكون وجبتهم الرئيسية القلابة ولا الجرة)) <<<<<<< الله يكملنا بالعقل والدين !!!!
************************* المشهد الثاني *************************
مجلس رجال ,,, على اليسار مقلط وعلى اليمين صالة <<<<<<< موب عاقل عبدالرحمن بن مساعد
وعزيمة ولمة رجال جالسين بالمجلس ((تقريبا كانوا 12 واحد)) ,,, ميشو جالس في وسط المجلس ويقول متى بيحطون عشاهم وربي جعت ,,,
ويدخل طوني ((هيك وهيك)) ويقول: يالله يا جماعة العشا جاهز ,,, معليش حبايب ألبي تأخرنا عليكن بس لأن المدام كانت عم تسوي الفتوش والتبولة ,,, اذا الأكل كتير بتستاهلوه ,,, واذا قليل مو مشكلة ناموا خفاف اليوم ,,, الريجيم بيفيد الصحة
وأطلع أنا في أول الركب ((درقد درقد درقد درقد)) <<< صوت خطواتي ,,, وأروح المغاسل بسرعة وأغسل أول واحد وأنا جالس أغسل عيني على السفرة وجالس أقرر وين بأجلس ,,, وأنشن على مكان رهيب بحيث إني لو جلست فيه يكون فيه الأكل كله جنبي وأقدر آخذ راحتي بالأكل وأخلص الغسيل وأركض للمكان اللي حطيت عيني عليه ,,, وأركض وأركض ,,, ويجي واحد من المعازيم بيجلس فيه ,,, وأنقز ذيك النقزة كني الدعيع وأدفه وأجلس بالمكان <<<< والله المكان استراتيجي ولا في أحسن منه ,,,
الجميل في الموضوع إن المعازيم ما يعرفون بعض كثير = مافي كلام على العشا ,,, وضاع وقت العشا كله وكل واحد منا منشغل بأكله ,,,
أنا شخصيا كنت آكل بإخلاص ,,, وبصراحة كان المفطح مشبع جميع حواسي الخمسة + 1 <<<< كودو
وطحت بالخروف المسيكين طيحة شينة ,,, لو إنه يسولف كان بيقول يرحم أمكم شيلوا هذا من فوقي
************************* المشهد الثالث *************************
ميشو راقد ,,, وما يدري إلا وذاك الكف اللي ماشي مليوووون يصك وجهه ويقوم منلخم ,,, ويلقى بوجهه مسعود ومرزوق ويقولون: قوم يا مال الوجع تعال ذق الجرة والقلابة وقل لنا وش الأحلى منهم
((يا ليــــــــــــــــــــــــــــل مطولك ,,, والله امتحنونا هم والجرة والقلابة ,,, شكلي بأهون ما عاد بأشاركهم بهالمشروع))
ويصحى ميشو من حلم المفطح الجميل ,,, ويكتشف إن عشاه فول × فول ,,, لا مفاطيح ولا تبولة ولا فتوش ,,, ما غير فول وتميس ووجيه تجيب الهم والمرض مقابلته على العشا ,,,
************************* معاني الكلمات *************************
مفطح: أكلة سعودية ,,, تكثر في العزائم والأعراس ,,, وإذا ودكم بوصفتها اسألوا الشيف ندوووو حقتنا وهي تعلمكم كل شي عنها
جرة: يعني لما تقول لواحد انتبه وراك ويكون مافي وراه شي = جريته = ضحكت عليه
قلابة: المؤنث من القلاب ,,, وهو الشاحنة اللي تنقلب لما تمشي فيها بالمطر
************************* ما يستفاد من الموضوع *************************
1- المفطح أكلة رهيبة والله ,,, جربوها وما بتندمون
2- الفول حلو وخفيف على المعدة ((وعلى الجيب كمان))
3- ميشو بيفتح محل فول وتميس = الله الله بالدعاية الحلوة ,,, بس علموا أخوياكم اللي بيجون المطعم يجيبون معهم سيارة إسعاف عشان تكون منتظرتهم على الباب أول ما ياكلون
العز للمفطح ... والفول شنق حاله ...
,,, وأروح المغاسل بسرعة وأغسل أول واحد وأنا جالس أغسل عيني على السفرة وجالس أقرر وين بأجلس ,,, وأنشن على مكان رهيب بحيث إني لو جلست فيه يكون فيه الأكل كله جنبي وأقدر آخذ راحتي بالأكل 
العرض العادي
