السلام عليكم جميعاً مشرفين وأعضاء . في البدايه لا احد يفكر اني صاحب خبره أو أدعيها في مجال الصرقعه ولكن بما ان منتدى الود للضحك والفكاهه والكاريكاتير هو مكان رسم الابتسامه على وجوه الاخوه الكرام وبحكم ان منتديات الود تعيش فرحة بوجود الأعضاء فهذه مساهمه متواضعه مني عسى ان تنال رضاكم وترتسم لها ابتساماتكم الغاليه وبسم الله نبدأ
يقول الكاتب وفقه الله
سنتناول في درسنا هذا بعض المباديء الهامه لاصحاب الميول الصرقعيه والتنسيميه لصقل مهاراتهم وقد يلاحظ البعض طول الموضوع ولكن لأهميته طال شرحه
كشف القناع الأول / <=== مصارعه مو موضوع :D
اسمع عزيزي المصرقع عزيزتي المصرقعه هناك فرق كبير بين السب والتجريح وبين الذبّ البريء ( الذب = التريقه ) وكلنا يعرف الخطوط الحمراء اللي لايمكن تجاوزها
النقطه هذي مايحتاج لها شرح واضحه
كشف القناع الثاني /
( اطلق العنان لخيالك )
مثال للتوضيح / تخيل فيه واحد دب مضيق صدرك وودك تقعد تذب وتتريق عليه لين تبرد حرتك وتكرهه في نفسه وش تسوي ؟؟ أول شي لازم تشيل شوي من القراطيس والقواطي اللي بمخك عشان يصير فيه مساحه يتمكن فيها الخيال من الانطلاق, بعد ما تكنس راسك من القراشيع اللي فيه راح تلاحظ ان خيالك وكأنه راقصة باليه يتسكع في الأفق ويرسم لك الصور الخياليه الصرقعيه فتجد ان خيالك رسم لك صورة هذا الدب وهو منسدح على جنبه وفي هذي اللحظه تقوم بربط الخيال بالواقع بحركه سبلكسيه خلفيه سريعه مع تثبيت أيادي الخيال لمدة ثلاث ثواني فتجد خيالك رسم لك هذه الصوره التي تستطيع اطلاقها على ارض الواقع وتقول للدب وبكل سخريه ( انت لو تنسدح على جنبك وترفع ايدك تصير كأنك حرف ط ) كما تستطيع مزج ثقافتك الضحله بخيالك فتجد خيالك قد رسم لك صورة الدب وهو يهرول كي يخفف من وزنه ومن ثم يطلع له إبليس من تحت الارض وهو مـُـمسك ٌ بشوكته الحمراء ويحك رأسه ويقول للدب : ياخي ليش الازعاج الواحد مايعرف يريـّـح شوي ؟<=== متأثر بأفلام كرتون :D
كشف القناع الثالث /
( رد الصاع صاعين مع الحفاظ على الروح الأخويه )
لا بد أن ترسم انطباعاً في أذهان الجميع بأن لحمك مرّ يعني اذا احد حاول يذب عليك (يتريق عليك) فلا مانع أن تضحك لكن لا تسكت له وخاصةً اذا كان ذلك بحضور أحد السحليات أو بعضهن وأمطره بوابلٍ من ابداعاتك الساخره إضافةً الى ذلك ننصح بتنزيل موضوع كامل عباره عن دراما ساخره وغير جارحه لجانب من جوانب حياة العضو الي تحرش فيك واقعد له في كل مرصد عشان مره ثانيه يتوب يستخف دمه عليك ويكون عبره لمن لايعتبر <=== ناوي يقلبها مضاربات بالمنتدى :D
كشف القناع الرابع
(شين وقوي عين)
لازم تصير قوي وجه ولايضيق صدرك اذا احد ذبّ عليك ذبه قويه وضحك عليك الموجودين
فالحياة كرّ وفرّ وارجع لما قلناه في باب ( رد الصاع صاعين) وعلى ماقال ياسر عرفات ( ياجبل مايهزك ريح)
نفس الشي اذا استخفيت دمك ومحد ضحك لك لاتتحطم واقعد اضحك لحالك واقهرهم
طبق هذه القاعده حتى في حياتك الشخصيه واذا أردت أن تعزز صفة قوة الوجه فأنصحك بالآتي :-
•اذا كنت واقفاً أمام الاشاره وهي حمراء فلا تتردد في قطعها واحرص كل الحرص أن يراك شرطي المرور فهذا من أهم أسباب تـنمية هذه الصفه, ولو سأل سائل مالعمل اذا أرسلني الشرطي للسجن؟ أقول له لا تحزن فستجد الكثير من زملائك المصرقعين يقبعون هناك وهي فرصه لتبادل الخبرات فيما بينكم .
•اذا رجعت من الدوام صف سيارتك أمام باب جيرانكم خاصةً اذا كان عند بابهم شجره كثيفة الاغصان .
•اذا كان عند امك أو اختك عزيمة حريم فتسلل الى داخل البيت خلسة ً وسوي نفسك ماتدري وادخل على الحريم بدون اصدار أي صوت عشان مايمديهم يـتـغـطـون وإلا فمالفائده من المجازفه .. <==== بيخرب عيال الناس
•بعد دخولك على الحريم من الطبيعي ان تسمع صوت الصراخ سوي نفسك متفاجئء ومبلــّـم واقعد كحل على كيفك واذا تغطوا خلاص اطلع انتهت مهمتك وتحمل مايجيك من امك واخواتك
كشف القناع الخامس
/ الدهاء والمكر
لكي تضع لك مكاناً في عالم المصرقعين وحتى لاتكون صيداً سهلاً لباقي المصرقعين وصعب المراس لاتكن عجولاً فالسكوت في بعض المواقف هو غاية الدهاء فمثلاً اذا وقعت في نزال مع أحد المصرقعين واستهلّ عليك الخصم بوابلٍ من الذبات الشنيعه حتى طيح وجهك وضاعت علومك فسوي نفسك مشغول او ماانتبهت أو إضحك له ضحكةً صفراء لتشعره بالأمان والغرور فإذا حضر في ذهنك الرد فانقض عليه واطرحه أرضاً <=== موب عاقل سنوكا :D
كشف القناع السادس / اكتساب مصادر القوه
لايخفاكم معشر المصرقعين والمصرقعات ان مجال الصرقعه مليء بالمتاعب والتحديات فعليك أن تكتسب مصدراً تـتـقوا به على هذه الصعاب ونعني بذلك ( المشرفين )
فحاول جاهداً كسب المشرفين في صفك وأفضل طريقه لكسب المشرف انك تقعد تنصب عليه وتقول له أنت أحسن مشرف بالعالم وحاول انك تصير أول واحد يرد على مواضيعه واذا كنت من اصحاب القريحه الشعريه فاكتب له قصيده مدح في كل ردّ وتستطيع سرقة بعض ابيات المدح ونسبها لنفسك واهدائها للمشرف الضحيه ولكن حذاري أن تنكشف. <=== شكله بـيـنـطرد .
وفي حالة انك زليت او أغضبت المشرف بأحد تصرفاتك الغير مدروسه وأحسست ان المشرف ناويك نية قشرا فمثـّـل دور اليتيم المظلوم وأحضر كأس فلاش أو ديتول وقطر في عينيك كم قطره وابدأ بسكب الدموع والعبرات امام المشرف فإذا أحسست انه بدا يرحمك فلا تسكت واستمر في سكب الدموع بغزاره وفي هذه الحاله يمكن يعطيك ريال عشان يسكتك فلا تغضب عزيزي عزيزتي المصرقعين أو تأخذك العزه سوي نفسك فرحان عشان تخف به وتستعيد ثقته من جديد <=== صارت طراره الدعوه 
كشف القناع السابع / خاص بالتماسيح)
exclusive
التميلح وما أدراك مالتميلح . احرص عزيزي التمساح المصرقع على التميلح واستعراض القدرات والتـنكيت امام السحليات ولا يمنع أن تخسر أعز أصدقائك لزرع البسمه على شفاه السحليه <=== قليل خاتـمـه .. واسألوا أصحاب الخبره كيف هو الأثر السحري لهذه النقطه في زيادة الثقه بالنفس وتفتق المهارات .
كذلك أنصحك عزيزي التمساح عند الرد على احد مواضيع الاخوات البطات المصرقعات أن تضحك بعنف وتملأ ردك بجميع أنواع الضحكات من الههههههههههاآت والخخخخخخخخخاآت والهع هع آآآآآت لكسب مودتها .
كشف القناع الثامن
الأماكن المقترحة
اذا بغيت تنزل موضوع صرقعه نقترح عليك الأماكن التالية
**.. إما الجلوس بالسطح بجنب الخزان
** .. أو تحت الدرج
** .. أو بالحوش فإذا كانت الشمس بالحوش حارقه لامانع من لبس النظارات الشمسيه مع الإكثار من السوائل .
** .. أو عند باب البيت فإذا كان سلك كمبيوترك ما يكفي هات ثلاث دفاتر ابو اربعين واربعطعش قلم وسطر إبداعاتك .
** .. أما اذا كنت متمرساً وذو خبره وأردت الكتابه داخل غرفتك فاستبدل طفاية السجائر بقوطي نيدو حتى لاتتعب في تنضيف الطفايه.
القناع التاسع/ عنصر المبادره والمباغته
امتلك زمام المبادرة دائماً واتخذ لنفسك المواقع الهجوميه(<=== ننصح المصرقعين بعدم متابعة الأخبار حفاضاً عليهم من خطر العولمه) يعني اذا حسيت ان اللي قدامك ناوي يستهبل عليك او يتميلح عند الصبايا على حسابك وخوفاً ان تنكسر شخصيتك امام الصبايا العزيزات فباغته بواحدةٍ من ابداعاتك وسدد له ضربه فوق الحزام حتى تلخبط اوراقه وترد كيده ويكف عن إيذائك . عنصر المباغته يااخواني من اهم العناصر التي يجب الاخذ بها بعين الاعتبار لما لها من اثر يساعد في تحديد موقعك بين زملائك المصرقعين . :D
كشف القناع العاشر
(البعد النفسي)
لابد عزيزي المصرقع عزيزتي المصرقعه من التغـلغـل في نفسية الشخص المستهدف فحاول بفراستك وبدهائك ان تتعرف على مدى قابليته للمزح او الذب فإذا كان من النوع اللي ما يستحمل المزح ننصحك بتوفير ابداعاتك وعدم تضييع وقتك واهدار طاقتك كما أنصحك أيضاً انك ماعاد تعطيه وجه .
منقول للفائده
العرض المتطور
