بعد السلام والتحية ..
لـلـعــائــلات فـقـط .. ممنوع دخول العزاب !!
الفترة المسائية للعائلات فقط .. الفترة الصباحية للرجال !!
ممنوع دخول العزاب نهائيا . السوق للعوائل فقط !!
يعني العزاااااب بررررره !!!
هذي بعض العبارات اللي نشوفها أمام مداخل بعض الأسواق والمجمعات التجارية في بعض دول الخليج مثل السعودية ويمكن هي أكثر دولة تتشدد في هذا الشي .
أخواني راح أتكلم معكم بكل حيادية وصدقوني ماهو دفاعا عن فئة الشباب ( العزاب ) لأن فيهم الزين والشين .
أنا أشوف إن العبارات هذي إستفزازية للشباب وفيها تحطيم وظلم لأن كل مكان أصبح للعوائل . خذو مثلا / الأسواق ... المجمعات التجارية ... الحدائق ... أماكن الترفيه ... حتى أسواق التموينات الكبرى مثل : المخازن الكبرى رغم أنها محتوياتها لكل الفئات والأعمار .وفيها كل شي . شي ثاني يقولك ( الفترة المسائية من 4 ـ 12 مساء للعائلات ) . ( والفترة الصباحية من الساعة 8 ـ 12 ظهرا للرجال ) يعني هل يعقل أنو الطالب او الموظف يروح للسوق بالصباح وعنده دراسة او عمل !! خلونا نكون منطقيين شوي ياجماعة وما نضحك على أنفسنا ..
يعني أحنا نلوم الشباب لما يطلعو بره المملكة او للدول المجاورة اللي تفتح المجال للجميع ومن يخطأ ينال عقابه .. والمشكلة انا اشوفها أن قرار منع العزاب من دخول الاسواق سببها كثرة المعاكسات والازعاجات للعوائل , طيب هل كل الشباب مزعجين . منحرفين . سيئين ؟ طبعا لأ . وفي مقولة ظالمة تقول : ( الشر يعم ) يعني احنا الحين نطبق هذي المقولة على شبابنا ونأكد أن كل الشباب العزاب سيئين !!! .. وطبعا أصحاب هذي المراكز التجارية يبغوا يوفروا على نفسهم المشاكل بالطريقة هذي .
وأنا هنا ما أدافع عن الشباب العزاب بالعكس انا أقف موقف الحق وانو لابد يعاد النظر في موضوع حرمان الشباب من دخول مثل هذي الاسواق . يعني نفتح المجال للكل واللي راح يصدر منه إزعاج وتحرش بالغير ومشاكل يعاقب وبكذا نحل المشكلة .
وما ننسى أنو ممكن يوم من الأيام يكون شاب متزوج وأهله بعيدين عنه لظروف معينة ويرغب مثلا أنو يروح مع زميل له لمقهى داخل السوق أو مطعم وفي هالحالة هذي ماراح يقدر . يعني حتى المتزوج راح يتضرر .
في الختام ـ
المجتمع مع الأسف أخذ فكرة سيئة ومظللة عن الشباب العزاب , وعلشان كذا أتمنى تشاركوني برأيكم في هذا الموضوع وراح أتقبل ردودكم برحابة صدر .
والمعذرة على الإطالة .... وتحياتي
العرض العادي
