كيف أبرجع والمسافه تحتضن صدر الضياع..؟

[عاشق بلا هويه]

**عندما يمتزج ظلم الواقع بمرارة الحقيقه..
ينتابك شعور الهزيمه لكن بصيغة (الرضا)..
لابقى أسيرا لعالمي المجهول...


[[سهام النظره اللي كبّلت مـدّ الاوجـاع..
حرّرت قيد المشاعر من تعابيـر البـرود..

ثار شعر/وحار دمع/وحلم لـوّح بالـوداع..
واستمات الفرح مابين الحراره والجمـود..

كيف ابآصل والخطاوي ضيّقـه فالاتسـاع..
ارضي الخاطر بنظره/والسراب بلا وجود..

والسفينه حايره وسط الغموض بلا شـراع..
والأماني تدعي الله ما تخوّنهـا الوعـود..

مارضيت الصمت عزّه/وجيت كلي بانصياع..
ليه أكابر والدموع الجايره ضدّي شهـود..

ما بقالي غير شمع/وراح يبكيني ومـاع..
واحتضنت الصبر لكنّ الصبر عنده حـدود..

رحت أنادي: (ياعنادي) وأتلهّـف باستمـاع..
وإلا ذاك الشيخ الاعمى جالس بيمناه عود..

قال:تسمع ياوليدي قلت:موثوق ومطـاع..
قال: دربك لو مشيته يا تعود أو ما تعـود..

قلت والعاشق ليا من حبّ يعشق للنخـاع:
وين أبارح؟؟ والبشر طبعها نكـر وجحـود..

كيف أبرجع والمسافه تحتضن صدر الضياع..؟
وكيف ابآصل والمراسي دونها برق ورعود..]]

وسلامتكم..
__________________



يا زمان العجايب.. وش بقى ما ظهر..؟
إن حكينا ندمنا..وإن سكتنا قهر..

عاشــــ بلا هويه ـــــــق