ياماخذ الدنيا وساعة صدر ومزاح وضحك**علمني كيف اتخلص من الضيق واضحك وابتسم
لا صرت ماتلقى صديق يحتويك وينصحك**في وقت ماتاخذ به امن الاصدقاء غير الاسم
تخيل انك في مكاني وانت الكل يجرحك** والهم(كسرة خبر) مابينك وبينك تنقسم
والناس حولك تذبحك من زود ماهي تذبحك**من باقي الا يوسمون الطعن في ظهرك وسم
وان جيت تشكي قالوا اسكت بس والله يصلحك**الجرح جرحك والبلا بلواك والامر انحسم
والصبر لو ماكل جنب في منامك ريحك** البال ماهي راحته من راحة اعضاء الجسم
ولا انت يومك رحت تشكي وش معاك ومربحك**من واحد بالعجز وانواع التخاذل يتسم
يقسم لك انه لو درى في ضيقتك ما يفضحك**والمشكله يمشي ويفضح فيك ويضيع القسم
تفرض عليه المصلحه لو مايذمك يمدحك**يعني كانه لوحة حسب المصالح ترتسم
وتضيع ماتدري من اللي لا نخيته يمنحك**الوقت صكاته كثير وطبع صكاته دسم
والقهر لا من جيت تفرح ماتلاقي مطرحك**في عالم من ضيق صدر اهله تدور للنسم
فان ضاق صدرك وسعه يا شيخ واقلبها ضحك** معك الحياه بتبتسم بس انت الاول ابتسم
وسلامتكم ... قصيده تحكي عن معاناة وعن الحياة الحاظره وعن نصيحه كلها جمعتها في قصيده واحده وان شاء الله انها تنال اعجابكم .... القلم الحزيــن ...