))) المــــــــــدار الثالث ’’’’’’’ قطعة جمر ’’’’’’’’
ضفت ظفاير جيدها تشبه وهج قطعة جمر=وفي انكسار الكبرياء طاحت وهي ملتمه
الشفق لملم شعاعه واكتست ثوبٍ حمر=وأرتمت لحظة حضنها واختفت بـ طراف كمه
وأسدل ستاره نديمي ينتظر طيفك يمر=انتظرتك .. وانتظرت وراح ليل ٍ كنت همه
وأنكسر ليل النديم وغابت نجوم وقمر=وضاعت افكار وملامح والوله تاهـ بمعمه
مثل ماضعت بدروبك في متاهات العمر=وتاهت الاقدام خلفك في سنين ٍ مدلهمه
وأجدبت ارض العطايا لاربيع ولاثمر=والورود اللي شذاها يستثير اللي يشمه
مالت بجو الخريف ولفها برد وظمر=ياوجودي وجد طفل ٍ مالقى منهو يضمه
ما أنفطم توهـ رضيع ٍ واليتم ادهى وأمر=تاهـ مابين الاقراب وانقرد في بيت عمه
يمسي بجوءٍ كئيب ودمع عينه منهمر=وأفتقد روح الحنان وكثرة الاهمال سمه
بين كان وبين ليت وصورة اشباح ٍ تمر=في عيونه دمعتين وفي خياله صورة امه
الهوى روح ومشاعر وان عطيته يستمر=وأن جحدته ماعطيته صارت دروبه مذمه
رحمتك يامنزل الفرقان وأيات الزمر=حافظ ٍعبدك من امواج البحر زمه ويمه