كنت اكلم خالي بزاوية بعيده عن البنات وصوت المسجل وهيصتهن وازعاج رغد اللي تنكت وتضحك .. ولمن كنت اكلم كان نفس الرقم اللي البارحه يدق علي .. لمن قفلت لقيت ست مكالمات لم يرد عليها لنفس الرقم اللي دق علي البارحة
دق هالمرة وطول لأنه مو انتظار وفتحت الخط بشوف مين بس ماتكلمت
انتظرت شويه محد تكلم بعدين تكلمت : الو
: هلا هلا هلا بديمه .. حرمنا المصون
: مين ..؟ مهند .. ؟
: وش معناة سفرتك بهالسرعه وانتي تدرين اني مو راضي عنها ؟
قلت بقلة صبر وعصبية : مين انت ..؟
: لاتسوين نفسك ماعرفتيني .. تدرين اني مهند من اول مادقيت .. ولا متعودة تدق عليك ارقام غريبة ..!
رديت بصوت يرتجف: لو سمحت اقفل لأني ماابغى اقفل في وجهك ..!
: لاااااهـ ..؟تسوينها ..! ولا وش ابي انتظر من وحده مغرورة ومدلعه الا انها تقفل بوجهي انا اللي اصير زوجها .
قاطعته : لو سمحت مافيني اعصاب تتحمل سخافاتك .. ومع السلامة
قفلت بسرعه وقفلت جوالي بعدين رجعت للبنات احاول اسوي نفسي عادية بس لاااااا مااقدر امثل ..
جات عندي لينا قالت : شوبكِ ديمه ..؟
: مافيني شي بس خالي يبغاني بموضوع مهم عن اذنكم
تدخلت مايا : شو تمشي ..؟ ولك لسه ماجلستي حتى تمشي .!
: ماعليه مايا مرة ثانيه اجيك او تجيني انتي والبنات ضروري امشي الحين . ولبست حجابي وعبايتي اللي كنت لابستها على فستاني القصير ..
خرجت مع ماهر اخو مايا الصغير عمره يمكن 12 سنه لأني جيت معاه والحين رجعني طبعا مشي على رجولنا وهم اصلاً بيتهم قريب من بيت جدتي .. بس مااقدر اخرج لوحدي ..
وصلت البيت وانا احس اني متكسرة منهارة مخنوقة ابغى ابكي ومو قادرة
يارب ارحمن قلتها بقلبي وانا ارجو الرحمة في لحظة زي هذي .... رحت لغرفتي على طول حتى مامريت جدتي .. رميت عبايتي على السرير وقعدت ادور بالغرفة استوعب اللي صار .. ياربي الحين حالي كذا واحنا ولسه مخطوبين وهو مايشوفني ولايكلمني وشلون لو قابلته 24 ساعه .. ..
ياربي اش اسوي اروح عند خالي اقول ماابغاه ولازم يطلقني ..! وافتك من الهم ..
يؤ شو يطلقني ...؟ والله ليوقف قلب خالي .. اصلاً اذا خالتي فادية زعلت من عبدالعزيز وقالت ابغاه يطلقني عصب عليها وكان بيضربها بس مسك نفسه .. عمري ماشفت خالي معصب بهذاك الشكل قالها لوسمعت سيرة الطلاق لسانك قصيته .. وبعدها خالتي ماجابت سيرة الطلاق قدام خالي .. عاد اذا قلته بخلي التاريخ يشهد على ضرب خالي لي لأول مرة فيه .... اكلم خالي ماجد لا لا .. خالي ماجد بالرغم انه دايماً ساكت بس اذا عصب ينسى اللي قدامه وهو يحبني لدرجة انه لو احد يتكلم في قفاي كسر راسه مو هذا اللي يهيني ويجرح فيني والله ليقتله ويروح خالي ماجد فيها ... حتى خالي سامي بيعصب ويقوم الدنيا ويرجعون على خالي ناصر لأنه صاحبه وواثق فيه .. آه عليك ياديمة حظك دايماً يمشي عكس احلامك ....
سمعت صوت جدتي وهي تناديني وكل شوي تقرب من غرفتي بسرعة دخلت الحمام وفتحت المويه .. مااقدر ارد عليها صوتي مخنوق وعيوني محتبسة بدموع مو راضية تنزل .. ليتني ابكي حتى ارتاح .. ليتني اقدر اشكي لأحد حتى لمى ماعدت اقدر اشكي لها لأنها تقلب الموضوع اكشن وتترقب أي تصرف وأي حركة تحس انها فلم نهايته بتصير رومنسيه
مالي غير ربي كالعاده هو ملجأي اولاً وأخيراً .. توضيت وخرجت .. لبست شرشفي حق الصلاة .. وصليت لربي اطلبه وأرجوه انه يفرج همي وييسر لي اموري ويكتب لي اللي فيه خير ..
احسني ارتحت بعد ماصليت .. وخرجت جلست مع جدتي اللي استغربت رجعتي بسرعه من عند مايا وتحججت بخالي ماجد انه اتصل علي وزعلان من سفرتي المفاجئة واني ماقلت له .. صدقتني جدتي وحسيتها تطمنت ....
بعد يومين اتصلت على مايا اعتذر منها وعزمتها هي وصاحباتها على مطعم اعرفه من زمان كلاسيكي وفيه مطربين اصواتهم روعه والأهم الليلة فيه صلاح عاكف .. مو مشهور بس احس انه مظلوم صوته خيالي بس محد اعطاه حقه في الاعلام ... اهم شي في صلاح عاكف بالنسبة لي انه يغني احيانا اغاني خليجيه ...
تعشينا بالمطعم وبصراحه ليلة من ليالي العمر جات معاي خالتي سمر لأني مااقدر اخرج الا مع احد اكون واثقة فيه من اهلي .. كانت رغد مو طبيعيه حركاتها تموت ضحك دمها خفيف وبنت عفوية وعلى نياتها .. بالرغم من ان اهلها بالضيعه وهي موظفه مع مايا بشركة الا ا نها عايشة حياتها وماتحب النكد .. واذا فيه حكاية حزينة تقوم توقف وتقول:ازا فيه بكا ودموع ماراح اجلس ..
رجعنا للبيت انا وخالتي مبسوطات بعد ماغيرنا جو واستانسنا .. وحصلنا جدتي نايمه .. والله اني انقهر اذا رحنا مكان وتركناها بالبيت بس المشكله هي ماتقدر على السهر ومومتعودة واذا اخذناها معانا خربطت علينا كل شوي تقول يلا نرجع تعبت ..!
قررنا نعزم جدتي بمطعم قريب تصميمه بيت عربي من البيوت السورية القديمة وأكلهم تقليدي .. فيه مجدرة وفيه كبه نية اللي جدتي تحبها وفيه شيش برك وانواع الشوربات والمشاوي .. بجد جدتي ماراح تنسى هذي السهرة ..
قلت لها : خلاص جدتي اذا حسيتي نفسك طفشانه خلي خالتي تجيبك هنا ..
: لك يابنتي كل مابروح مكان معك مابئدر ارجع له وانتي مش هون بيزكرني فيك ومابرتاح فيه
: يوووه خلاص ماراح اروح معاك لأي مكان حلو معاك عشان تقدرين تجين له اذا رحت
: هههههههههههههههه لا يابنتي مش الئصد .. بس انا مابحب اطلع الا معك .. بعدين انتي ياللي بتخلي المكان حلو
: لك تسلمي لي يااحلى جدة بالدنيا ههههههههههههه
واحنا راجعين لقينا شباب سعوديين حاولوا يتلزقون فينا ويكلمونا بس مالتفتنا لهم ..وانا ماتكلمت ولا طالعت فيهم ... بس اسمعهم يرمون علينا كلام ويبون يتعرفون .. ياشين بعض السعوديين اذا راحوا برا .. بجد وقاحه وقلت ادب ماقد شفتها ..
مافكونا من شرهم الين اتصلت خالتي سمر على زوجها اللي ارسل زميله لأنه كان مشغول مايقدر يجي .. وجا زميله وعرفنا على نفسه اسمه عبود .. بس طويل وعليه عضلات مو على قد اسمه ..ذكرني بابو عنتر وشجاعته ؟؟ اول ماشافوه حاسبوا وطلعوا وهو وصلنا للبيت ..
جلست عند جدتي ثلاثه اسابيع كل لحظة يتردد كلام مهند في راسي .. حتى نبرة صوته اللي باين انها تريقه كأني اسمعها بكل وقت ... والله ونجح بانتقامه .... نغص علي وناستي في سوريا ..وهو هناك مرتاح ....وانا اللي كنت بقهره وانغص عليه اجي انبسط هنا بالرغم انه معترض واخليه يموت قهر اني مااهتميت فيه ... بس صار العكس هو كلمني وهزأني ونغص علي وعاش حياته ..
بالرغم اني طفشانه عند جدتي الا اني ماابغى ارجع للسعودية لأن مو بس ذكرى مهند بتقعد في راسي الا بيصير طاريه وسيرته عندي باستمرار .. خالي كلمني كذا مرة عشان ارجع يقول ارجعي بس اترجاه اجلس شوية كمان الين جات الدراسه ورجعت غصب ..
استقبلني خالي سامي في المطار لأن خالي ناصر كان مشغول وماكان في جده بالمرة .. كنت مااتكلم كثير بالسيارة الا اذا سألني خالي سامي ارد .. آخر شي سألني فيني شي قلت له اني مرهقه وسهرانه ومانمت وأصلاً انا كذابه نايمه طول الليل ..الله يسامحني بس .. لولا اني ماابغى احد يحقق معاي ولا يشك ان سبب همي مهند كان ماكذبت بس ماابي مشاكل ووجع راس ..
كملنا طريقنا وانا ساكته ووصلنا البيت ... سلمت على هدى .. بجد مشتاقة لها ولعيالها اخذت ديوم الصغيرة وبوست فيها وحضنتها وجات ياسمين وحضنتني ونفس الشي أسامه بس بسام جلس يناظرني من بعيد .. ورحت عنده انا بنفسي وسلمت عليه وحضنته بقوة وشلته من على الأرض .. احب بسام كثير احبه لأنه صورة مصغرة من خالي حتى بعض حركاته تذكرني بخالي .. اخذتهم معاي عشان اعطيهم هداياهم كنت جايبة لهم ملابس وألعاب كثيرة .. وجبت لهدى بناطيل وبلايز وتنانير وصنادل الله يكرمكم وثلاثه فساتين روعه .. انا طول الفترة اللي كنت فيها بسوريا اشتري لنفسي اذا نزلت السوق مع خالتي .. بس لمن رحت اشتري لهم هدايا على آخر اربعه ايام كنت أي شي اشوفه حلو آخذه لهدى .. حتى خالتي فادية مااشتريت لها الا ثلاث بلايز وصنادل تناسبها زي هند وغادة .. وجبت لعيالهم العاب
.. جلست مع هدى وسولفت معاها قلت لها كيف قضيت الأيام هناك ... كلمتها عن بعض البنات اللي عرفتهن وخالتي سمر صاحبتها .. وعن دلال جدتي لي وعن الأشياء اللي ونستني هناك واللي ضايقتني ..
جيت بروح لغرفتي لأني لسه ماطلعت قال هدى : صحيح ترى مهند يبي زواجكم بدري .
: شو ..؟ حسيت بكلمة هدى كأنها شي طاح على راسي
: والله يقول بعد رمضان بس خالك قال استنى لين ديمه تجي وانه هو مو موافق عشان امتحاناتك ..
: والله مو بكيفه حتى الصيف الجاي ماني موافقه مو رمضان .. هه ماشاء الله عليه احلامه كبيرة هذا .
: اسكتي ياديمه خالك يقول مصر على الزواج بعد رمضان
: والله لو تقطعوني مارحت معاه .. واذا يبي يسوي زواجه خله يسويه بس بدوني انا .
رحت لغرفتي اخذت شور وبدلت لبست بيجامه واسعه بكم طويل وجلست افكر وحلفت من قلبي انه لايمكن اوافق ولا اخرج من بيت خالي بعد رمضان .. والله يستهبل هذا ..؟ هذا من اولها نكد علي .. الله يساعدني على الأيام الجاية ..
ماقدرت انام حاولت حاولت حاولت بس مافيه فايده .. بعدين نزلت تحت عند هدى لقيتها جالسه على التلفزيون وعندها شاهي ومكسرات وجلست معاها اشرب شاهي بعد ساعه دخل علينا خالي وحضني على طول وسلم علي وانا سلمت على راسه ويده مرة واحشني خالي .. ياربي احبه كثير ...هذا الانسان اهلي كلهم .. هذا اغلى شي في دنيتي عساني ماابكيه ..
جلس على الكنبه ولف يده من وراي وجلس يسولف معاي ويسألني فين رحت وكيف ايامي هناك انبسطت ولا لا ويسألني عن ناس يعرفهم من جيران جدتي ..
كان يسألني وانا ارد عليه باختصار من القهر اللي فيني من تصرفات مهند
ناظرت بخالي بعدين قلت : خالي الله يخليك بطلب منك طلب
: آمري من عندي اغلى منك ..؟
: الله يخليك لاتفتح معاي موضوع الزواج السنه هذي
طالع بهدى وتنفس بعمق قال : ممممممممم قالت لك هدى .. انا اصلاً ماني موافق وشلون بتختبرين وانتي عروس .. بعدين هذي ماجستير مو لعب اطفال .. بس زوجك متهور ومو في عقله ..
حسيت صوتي مخنوق قلت : خالي لاتقول لي شي بخصوص هالموضوع .
انتبه خالي اني راح ابكي قال : ولا يهمك نغلق الكلام في هذا الموضوع طول السنه وانا مالي دخل .. تفاهمي انتي وياه بعدين تعالوا قولوا لي
نزلت دموعي غصب وقلت : اذا بدت الاجازة الصيفيه الجاية يصير خير لكن قبلها مستحيل
قفلنا الموضوع بالمرة بعد ماهداني خالي وغير السالفه ...
بعد يومين قالت لي هدى ان خالي كلم مهند اني رافضه حتى الكلام بالموضوع هذا .. وان مهند زعل وعصب قال انه بيسوي زواجه بداية الصيف رضيت ولا مارضيت ..
ضحكت عليه وانا احسه معصب خله يذوق شي من اللي اذوق اذا قال لي شي ..
مر علينا الترم كله وانا ماارد على اتصالاته ابداً ولا رديت على أي رقم غريب خايفه يطلع هو .. واذا رديت على ريم مااتكلم الا اذا ريم قالت الو ارد ... واذا ماتكلمت اقفل لأنه مرة كلمني من جوالها وقفلت على طول ماخليته يتكلم وقفلت جوالي يومين ..
ادري اني المفروض مااسوي كذا بس هو اللي اجبرني .. مااقدر بصراحه اعيش بقهر وابكي بعد كلمتين منه يهيني ويذكرني انه مايبغاني بس خطبني عشان يكسر راسي لأني رفضته .
كنت مطمنه طول الترم لأن مستواي حلو من الاختبارات الدوريه اللي كلها فل مارك الحمد لله ....
جا رمضان وزارونا اهل مهند ثلاث مرات وافطروا عندنا كانت امه بلسم لعمايله معاي .. تحبني وتدعي لي .. لدرجة ان ريم تقول والله ياديمه انها صارت تدعي لك اكثر من مني انا وسميرة ومهند خاصة بعد ماعرفت انك ماخليتيه ياخذ بيت مستقل اللي اغلب البنات يطلبونه ..
وانا ضحكت ودعيت لها وقلت ماابغى احرمها من ولدها اللي تحبه لو يوم واحد ... الله يقدرني وارد لام مهند معالمتها الطيبة بجد تحرجني من كثر ماتعالمني زين وانا واثقة انها بتعاملني احسن من كذا اذا جيتها ....
عزمونا مرتين وخالي وهدى راحوا لهم وانا اعتذرت بالدراسه والاختبارات ومرة عزمونا في العشر الأواخر بعد الاجازة بس تحججت ان لمى بتجيني وقلت للمى غصب عنها تجي تفطر عندي عشان خالي مايشك ....وجات عندي من العصر .. هذي لمى صديقة عمري من يوم عرفتها مااحتجت لها وخذلتني .. حتى بعد ماتزوجت عسى الله لايفرق بيننا .. !
قضينا العيد في بيت جدتي الله يرحمها بالطايف زي كل سنه .. انا الوحيده اللي عيدي كان نكد وحزن لأن هذا اول عيد لي وابوي مو فيه .. كان كل عيد يجي لبيت جدتي يعيد علينا ويعطيني الف ريال عيديه .. وياخذني عصر اليوم الثاني انا واخواني للملاهي ونتمشى ونتعشى برا مانرجع الا آخر الليل ينزلني ببيت جدتي ويروح هو واخواني لبيته .. الله يرحمك يبه اشتاقلك وللحين مو مصدقه اني ماراح اشوفك .. احس اني بصحى يوم من الأيام والاقيه جاي يسلم علي .. استغفر الله العظيم ....
رحت اليوم الثاني لبيت عمتي صالحه وانا اصلاً عيدت عليها امس بس اليوم جيت آخذ اخواني نروح نتمشى زي ماعودهم ابوي الله يرحمه .. رحنا حديقة الملك فهد وجلست مع منار اللي اخذتها معاي هي واختها اماني ورحنا مع سواقهم.. وانبسطوا ولعبوا ومنار لعبت مع عادل وسديم واختها هديل لكن انا ماتحركت من مكاني الا اذا بغيت اجيب لي شي اشربه .. كان عناد يلعب بألعاب الكترونية بعدين جا وجلس معاي وهو متضايق من منار ولعبها كأنها طفلة وفيه شباب يطالعون فيها أخيراً قال نزليها بنمشي ولا نزلتها انا .. اشرت لمنار وجات على طول لأنها تضايقت من الشباب وجلست معانا بعد ماقام عناد .. ياقلبي ياعناد مسوي نفسه رجال كبير ولو انه توه دخل 16 بس يارب اشوفه احسن الناس وكبره بقدره وقيمته بين الناس وعندك يارب ...
قضينا اربعه ايام بالطايف وكان اللي يميز العيد هذا خالي محمد واهله اللي قضوه معانا ..
كانت جلساتنا مع بعض حلوة وزوجات اخوالي كأنهن اخوات .. ومافيه بينهن مشاكل ولا غيرة ولله الحمد .. خاصة ان خالتي فادية ماتسمح بأي مشكلة بينا بأوامر من خالي ناصر من اول ماتزوجوا اخوالي .. وكانت ام رامي زوجة خالي محمد بمثابة ام الجميع هنا .. حنونة وطيبه وخالي كمان فيه طيبة خيالية وحنون على عياله وعلى اخوانه وعلينا كلنا
لمن سلمت عليه قال لي والله ياديمه اني زعلت لمن رفضتي رامي بس يوم قال ناصر ديمه تقول مافيه اخت تتزوج اخوها اني حبيتك اكثر واعتبرتك مثل عيالي وأعز
سلمت على راسه وقلت : انت بمكانة ابوي الله يطول بعمرك ,, وجلس يسولف لي عن رامي والشروط اللي لازم تكون في البنت اللي يبيها اهم شي تكون ملتزمه لأنه ماشاء الله عليه ملتزوم وحافظ القرآن . ماعلقت الا بــ :عسى الله يوفقه ويسعده ويرزقه باللي تستاهله .
مرت الأربع ايام حلوة بس عدم وجود ابوي الله يرحمه هو اللي مضايقني ..
جات الاختبارت وكانت نتايجي عال الحمد لله .. كان عندي ست مواد كلها جبت فيها اعلى من 97 ماعدا مادة وحده اخذت فيها 94 بس راضية الحمد لله ..
"
"
بدينا الترم الثاني على طول وجات اجازة الحج بسرعه قضينا العيد في جده طلعنا للشاليه يومين مع اصحاب خالي ورحت عند روان اللي توها سوت حفلة ولدها البراء عشان كانت تستنى العيد .. سهرنا عندها ورقصوا البنات وغصبوني ارقص ورقصت معاهم وانا احسني غبيه مااعرف بس نتعلم على قولة منار بنت خالي محمد اللي كل شي تحب تتعلمه ...عدت الأيام ورجعنا للدراسة وانا كنت احاول انشغل عن مهند اللي مامل وهو يتصل باستمرار وانا اطنشه اخيراً سويت فيه حركه وقفلت جوالي وطلعت لي رقم جديد طبعا لمى هي اللي ساعدتني وجابت لي الشريحة باسم زوجها .. ماعطيت رقمي الجديد لريم ولا لعمي ياسر كنت خايفه ياخذه مهند .. بس مرة دقت ريم على بيتنا تخاصمني تقول ليه مقفلة جوالك قلت ان شريحتي محترقه ومشت عليها .. ياربي والله مااحب اكذب بس ابغى اكمل الترم هذا بدون مايأثر علي شي زي كلام مهند اللي يسم البدن ..
كانوا اخوالي مستغربين ليه غيرت رقمي قلت ان يجيني عليه ازعاج ولمى اعطتني الرقم هذا ماتبغيه .. خاصم خالي سامي قال أي ازعاج يجيك هاتيه خلينا نرد عليه مو تغيرين رقمك .. ووعدته لاقول له على أي ازعاج يجيني ...
يوم اربعاء وانا جالسة مع هدى وخالي نايم وقت صلاة العشا لأنه رجع من المدرسة وراح يشوف له ارض بيشتريها وهي بعيده شوي المهم مارجع الا بعد المغرب وعلى طول دخل ينام لأنه تعبان كثير ...
دق التلفون ورديت على طول من دون مااشوف الرقم ..
: الو السلام عليكم
: عليكم السلام
: لو سمحتي ناصر فيه ..؟ ادق على جواله مقفل ...
: ن.. اا..ي .... م .... ياويلي هذا مهند حتى بتلفون البيت طلع لي ..
حسيت كأنه تذكر شي : اوووووه ديمه ... سكت شوي بعدين قال : وش هالسخافات .. ؟
ماتكلمت احسني مو مستوعبه الحين هذا يطلع لي حتى بالتلفون ويتكلم علي حتى سلام زي خلق الله ماسلم والله لو كان احد بينه وبينه ثار كان سلم عليه واقل شي قال كيفك :.......................
انتظرني ارد وانا متجمده ولمن يأس تنهد وقال : ماعليه هانت ياديمه .. كلها كم شهر ..و...
اخيراً تحركت وقدرت اتحكم في يدي وعلى طول قفلت بوجهه قبل اسمع كل كلامه وانا العن اللحظة اللي رديت فيها على التلفون ,,, وش جابني اصلاً للتلفون .. ليه اتلقف ..؟ يوووه شو هالحظ ..؟
ياربي بحياتي محد كلمني كذا ... الا جميلة زوجة ابوي الله يرحمه بس جميلة كانت تقول لي كلام اقسى من كذا ياليتيمه .. يالملعونه .. ياسبب شقاي .. ودعوات انواع واشكال ..وتهديد وترهيب وتخويف وتعذيب بشتى انواع الوسائل والطرق .. و قدرت الحمد لله اتجاوزها هي والمرحلة اللي عشت فيها عندها بفضل الله وخالي ناصر واخوانه وجدتي الله يرحمها وحنية ابوي الله يرحمه .. يمكن لو كان ابوي يجاريها ولا يقسي علي كنت الحين عندي انواع العقد النفسية بس ابوي كان العافية والبلسم والحنان اللي احتاجه حتى لو ماكنت معاه الله يرحمه ويجعل مثواه الجنة .
بس هالمهند قرفني طفشني .. مااقدر اتكلم عليه ولا اتجرأ ومااقدر اكلم احد عنه خايفة من المشاكل والمصيبة انه واثق مني اني ماراح اقول كلامه لأحد ..
جاتني هدى وانا شكلي متغير قالت من اللي دق : قلت واحد يبغى خالي يقول جواله مقفل
: مهند ..؟
: ها ..؟ ايه ... لا لا ماادري ماميزت صوته ..! صديت عنها وهربت من عيونها ... تظاهرت اني عادية وكملت ..: ليه تسألين ..؟
قالت بحيرة : ناصر يقول اذا دق مهند خلوه يجيني البيت على الساعه 10 اذا يقدر لأنه قفل جواله وهو يبغاه ضروري
رديت عليها وانا مكشرة : عاد ماقلت له واتصلي على ريم قولي لها
جلست هدى وهي تناظرني قالت : ديمه لا الله يخليك خطيبك وانتي اللي كلميه بعدين ليه ماتكلمينه انتي ..؟ ها ليه ياديمه فيه شي ماتبين تقولين ..؟
تبسمت لها وحاولت اخفي خيبتي قلت : خليه يشتاق لي اخاف نتزوج وهو قد مل مني ..
: ههههههههههههههههههه لا حبيبتي اضمني حبك وثبتيه قبل ياخذك ..!
ضحكت بخيبة امل كبيرة من كلام هدى بعدين قلت : لا خليني ثقيله احسن .. بعدين دقي عليهم خلي ريم تقول له . ..
قامت هدى تتصل عليهم وردت عليها ريم سلمت عليها قالت ان ناصر يبي مهند يجيه البيت على الساعه 10 وانه صاها قبل ينام وهو تعبان ونايم الحين ومقفل جواله .
قالت لها ريم انه بتوصل مهند الكلام ..وقفلت
التفتت لي هدى قالت : هو مهند اللي قبل شوي كلمك
:اتوقع انه هو بس ماقدرت اسأله واتأكد ..
تخربطت من هدى وسيرته واخذت الريموت بغير الجو والموضوع وابغى اخرج انا بنفسي .... كأني اذا غيرت القناه غيرت تفكيري بس لاااا وين اغير تفكيري بعد هالكلمة اللي حذفها علي بعدين وشو اللي كلها كم شهر لايكون من جده بنتزوج بالصيف ياربي بدري على الهم ..! اصلاً ماراح اوافق خلني الطعه كمان سنه ثانية ... والله يستر من خالي لايقول لا
على الساعه عشرة دق التلفون وردت هدى وطلع مهند قال نادي ناصر انا برا انتظره
راحت هدى تصحي خالي ونزل بعد ماصلى العشا وأخذ له دش بسرعه ولبس وخرج له
بعد شوي جا خالي قال انا ومهند في المجلس جيبوا العشا
قمت انا شردت لغرفتي ماادري خفت منه صار يخوفني .. وماعدت احب اسمع منه شي لأنه مايكلمني الا يجرحني ويهينني بس انا حلفت لأردها له حتى لو بعد مااتزوج ..
جلست اذاكر فوق حتى هدى نادتني للعشاء قلت ماابغى.. خايفة انه يحط براسه شي ويصير .. احسه قوي ويقدر يوصل للي يبغاه ..
اصرت هدى اني اتعشى وجابت العشاء في الصالة اللي فوق وخرجت اتعشى معاها اهم شي ماانزل تحت واصير قريبه من مهند
حاولت هدى تفهم تصرفاتي من كثر اسألتها لي ونظراهت واستغرابها مني .. وانا مابينت لها أي شي وخلتني على راحتي ...!
رجعت لغرفتي بعد العشاء ورحت اذاكر .. ابي اهرب ياعالم من سيرته وطاريه واحساسي انه موجود قريب مني وفي بيتنا ..! اكلت الكتب وحطيت كل تفكيري فيها غصب وكأني داخله حرب ياانتصر ياانهزم والحمد لله قدرت بفضل ربي احصر تفكيري بالمذاكرة واتعود على البعد عن مهند .. ولو ان تجيني لحظات الاقيني افكر فيه بس بسرعه اهرب منه ...!
كالعادة اروح للجامعه مع السواق والأيام هذي امر زينه صاحبتي آخذها معاي وارجعها لبيتها لأن زوجها راح دورة للرياض وماعندها احد يوديها للجامعه .. الساعه حوالي 2 ونص وانا راجعه للبيت كانت الدنيا حر وشمس تحرق قلت للسواق ينزل للسوبرماركت اللي على طريقنا يجيب لي مويه
نزل السواق وانا اخذت تلفوني ابغى ادق على هدى اقولها ترسل الشغالة تشغل مكيف غرفتي مرة تعبانه اليوم كان عندي اختبار وللحين مواصلة من امس وانا اذاكر .. اول مادقيت رقم هدى الا فيه سيارة وقفت بجنبي طفشني صوت بواريها وكأن فيه احد ينبهني او يبغاني التفت .. واضطريت اقفل قبل ماترد هدى.. التفت لقيته خالي ناصر ومعاه واحد ثاني مادققت وصديت بسرعه ماابغى الرجال اللي معاه ينتبه لي خاصة انه جاي بكرسي الراكب وانا على يمينهم .. دق بواري بقوة ماالتفت بعدين نزل وجا عندي .. فتح الباب اللي ورا قال :هلا ديمه كيفك
قلت بضحكة : بخير انت كيفك ..؟ شو حركات المراهقين هذي ..؟
:هههههههههههههههههههه اجل حركات مراهقين .. يالله يالله انزلي معانا بوصلك وابي ارسل السواق لشغله في مكه
: شو انزل واللي معاك هذا ..؟
: هذا مهند مو غريب ..يالله بسرعه
: شو ..؟
: ديمه وش فيك مهند تراه زوجك مو غريب .
: خالي خلاص البيت قريب ينزلني السواق بعدين يروح
: لا لا بخليه يمر على ناس هنا بجده قريب من هنا بعدين يروح مافيه وقت مستعجل والله .. بعدين انتي وش الحيا هذا كله معاك يالله انزلي ..!
: الحين هو ليه جاي معاك مو المفروض يكون بالمستشفى
: هههههههههههههههههههه اسكتي لايسمعك .. انا اللي مريته بدوامه ورحنا ندور قاعات بنحجز قبل الصيف يجي ثم مانلاقي قاعات سنعه
: قاعات ليه ..؟
: لزواج جدتي .. لزواجكم انتم طبعاً
: ياسلام وانا آخر من يعلم
كل هالكلام دار بيني وبين خالي وهو واقف برا ويكلمني وانا بالسيارة .. قال : انزلي يابنت الحلال الشمس فجرت راسي .
قلت بإصرار: خالي روحوا انتوا وانا دقايق واخلي السواق يجيكم
تأفف خالي بطفش قال بقلة صبر: ديمه انزل ماعندي وقت بسرعه الحقيني
نزلت وانا مقهورة اني بموقف زي هذا ركبت السيارة من جهة خالي قلت السلام عليكم طبعا ماابغى خالي ينتبه لي ومو ناقصه مشاكل انا وتحقيق مع خالي ويشيل همي اذا درى اني ماني مبسوطه ولا متأملة خير في حياتي مع مهند ..
رد مهند : عليكم السلام .. هلا والله ديمه كيفك يالقاطعه
ارتجفت وقلت بصوت واطي : الحمد لله
دق جوالي ورحمني بهدى رديت عليها بصوت هادي
: الو
: هلا ديمه دقيتي نص دقه وقفلتي وادق عليك ماتردين
: تلفوني كان صامت
: طيب بغيتي شي مني
: ممممممممم ايوه ارسلي الشغالة تفتح المكيف حق غرفتي برجع انام على طول
: اوكي .. ماتبين تتغدين
: لا لا مالي نفس
: يالله باي
: باي
كانوا ساكتين وأكيد سمعوني حتى وانا موطيه صوتي واتكلم باختصار
قال خالي اللي حب يكسر جو الصمت : ديمه كيف اختبارك
: حلو الحمد لله
: بديتي الرسالة ولا لسه
: بديتها
: طيب اليوم ابدي اكتبيها على جهازك ولا اقولك احسن اكتبيها على جهاز جديد ماتدخلين فيه نت
: ان شاء الله