الجــ الأخ ـيـــر ـــزء..... على نهاية شهري التاسع كنت احس بمغص وآلام بأسفل بطني بس كل مااروح للمستشفى تقول الدكتورة لسه بدري .. اليوم ظهري بينكسر وبطني احسه بيتشقق من الألم .. اخذت جوالي ودقيت على مهند وانا ابكي : تكفى مهند الحقني ماعاد فيني اتحمل : ياعمري باقي لك يومين على موعد ولادتك يمكن هذي آلام طبيعيه : مهند مو طبيعيه والله الله يخليك تعال ودني للمستشفى . مر علي ربع ساعه يادوب لبست فيهم وجا مهند كنت بنزل بس ماعاد فيني امشي وشالني مهند لحد ماوصلنا السيارة اللي دخلها داخل البيت .. ركبت معاه ووداني للمستشفى اللي يشتغل فيها .. صدق الولادة موت وحياة .. الحمد لله انتهت المعاناة بعملية قيصرية وتكللت بالنجاح ووجه احلى مخلوق في الوجود .. شاله مهند على يده وهو يقول : بسم الله الرحمن الرحيم .. ديمه عليه شبه منك وفيه مني . قال خالي ناصر اللي من اول ماعرف اني بالمساشفى وهو معاي : للحين مابينت ملامحه اصبر عليه فترة ويعلمكم هو يشبه لمن . قرب مهند مني قال : ها ديوم وش نسميه ..؟ قلت بدون تردد مهند تكفي بسميه ناصر ولا عبدالله تدخل خالي على طول قال : ناصر لا اذا بتسمينه على اسم احد سميه عبدالله ولا بدر . ولا اختاروا له اسم حلو مو شرط على اسم فلان ولا فلان . استحيت اتكلم لمن قال بدر يعني على اسم ابو مهند قلت : خلاص على كيف مهند الاسم اللي يعجبه يسميه .. طالعني مهند وباس راسي قال : بيجي ناصر وبيجي بدر ان شاء الله ... سميناه عبدالله وان شاء الله انه عبداً لله صالح وبار وتقي .. ابتسمت من قلبي بجد فرحت لمن سميت على اسم ابوي الله يرحمه .. ياليت ولدي يطلع فيه شي من ابوي برجولته ولا كرمه ولا طيبه وطيبة قلبه .. يارب ارحم ابوي رحمة واسعه واجعل مثواه جنان الخلد .. خرجت من المستشفى لبيتي لأن مهند رفض اروح عند خالي وطلب مني مااجادله قال ابي ولدي عندي 24 ساعه .. وماحبيت ارده لأني اكيد بلاقي عند خالتي ومهند ورنو وعمي كل اهتمام .. بعد اسبوعين سوينا التمايم حقت عبدالله في استراحة خالي ناصر .. تذكرت ملكتي هي آخر حفلة سويناها فيها .. سبحان الله اليوم انا اسعد الموجودين عكس هذيك الليلة كنت اتعس الموجودين . جات لمى صديقة عمري ورفيقتي من صغري سهرنا كلنا اهلها واهلي اللي هم بيت خالي ناصر وبيت عمي بدر .. حضروا اخوالي كلهم من الطايف وعمتي صالحة واخواني عناد وعادل وسديم . قرب الفجر وراحت خالتي مع عمي وام لمى وام هدى وجلسنا انا وريم ولمى وخاتي فادية وهدى وحنان وسميرة ورنو اللي طول الوقت حاطه عبودي في حضنها .. ولا توديه عند مهند كل ماقال بيشوفه وصلتني رساله على جوالي شفتها من مهند كان يقول : ( وشلون حبيبتي ام عبدالله عساها مبسوطة ) ضحكت منه من يوم ولدت مايقول لي الا ام عبدالله احسه يكبرني واذا قلت لاتقول ام عبدالله قول ديمه قال لا بقولك ام عبدالله وانتي لا اسمعك تقولين مهند قولي لي ابو عبدالله خلاص كبرنا طبعا هو يستفزني بكلامه ويحاول يغيضني . رجعنا بيتنا بعد الفجر ومهند يشيل عبودي خايف عليه من رانيا اللي اصرت تاخذه منه وهو رافض يقول لا بتطيحينه اخيراً عبودي بكى وأعطاني اياه وطلعت فوق وانا اشيله . عمي صار كل شوي عندي في جناحي عشان عبودي .. ولا يرسل له احد يجيبه له تحت .. الشي الوحيد اللي ماقدرت اطاوع عمي ومهند فيه انهم ياخذون ولدي معاهم في السيارة لوحدهم .. مااقدر ومايجي لي قلب اخليهم ياخذونه وانا في البيت خاصة انه يتعثر بمشيته ولازم احد يمسكه .. اما خالتي اقدر اثق فيها اذا اخذته ينام معاها او يطلع للحديقه معاها . خالتي تحبه بشكل كبير ورانيا مجنونة فيه تحبه وتدلعه وتلعب معاه احياناً احسها ترجع بعمرها الين توصل سنه قد عبودي وتلعب زيه وتفهمه اكثر مني ويفهم عليها .. خلصت لوحتي بعد جهد لأن عبودي مو راضي يثبت بمكان واحد كل شوي يجري ولا يجيب له لعبه ويعطيني اياها ولا يبغى ياخذ الفرشه من يدي والألوان .. اخيراً اعطيته علبة الوان وفرشة وورقة كبيرة قلت ارسم هنا . جلس يخربش بالألوان وهو مبسوط وقدرت ارسم وجهه بدقة الحمد لله . اخذت اللوحة ووديتها بعيد عن مكان لعب عبودي في الحديقة . ورجعت اخذته طلعته فوق وحممته ولبسته عشان بنروح انا ومهند لبيت خالي ناصر لأنه مشتاق لعبودي وألح علينا نجيهم اليوم .. دقت علي ريم وانا البس : هلا والله يابنت كيفك وفينك ماعاد تتصلين ومن زمان مازرتينا : انا بخير بس والله ياديوم مشغوله تعرفين غدي تطفش وابوها عندي مدلعها هذا غير الحمل والوحم اللي طفشني . : الله يعينك يالله كلها كم يوم وتخلصين الرابع وينتهي الوحم وعسى الله يهون عليك وتقومين بالسلامه وتجيبين اخو لغدي وترتاحين . : يارب .. الا انتي مافكرتي بالحمل خلاص عبودي كمل سنه . : انا صعب مااقدر الا بعد سنتين عشان مسوية عملية مو طبيعي زيك ..غير كذا تعرفين توني بديت ادرس دكتوراه وماابغى انشغل بالحمل .. بعدين خلي عبودي ياخذ حقه من الدلال .. احنا ناس حقانيين مو زيكم ههههههههههههههههههه : ياويلك لو ياسر سمعك كان يموت من القهر مايتحمل على غدي ولو قلتي هاضمين حقها يمكن يكره اللي في بطني . : هههههههههههههههههههه لا مااعتقد لهالدرجه يكره ولده عشان الست غدي . : ههههههههههههههههههه مو يكره بس بجد عمك مجنون في بنته كأن مافي حياته غيرها تدرين انهم سافطيني على جنب وهي تتدلع وهو يلبي لها رغباتها . : الله يصلحها ويخليها لكم .. : آمين ويخلي لكم عبودي ويرزقكم باخو ولا اخت له .. يالله ديمه سلمي على مهند وزورينا : يوصل وان شاء الله نزورك قريب : مع السلامه : هلا والله مع الف سلامه . ناداني مهند وهو يشيل عبودي قال تأخرنا .. لبست عبايتي ولفيت طرحتي وشفت عبودي يبغى ينزل من ابوه عشان يمشي على الأرض من يوم مامشى وهو مبسوط في نفسه ومستغني عنا مايبغانا نشيله ... خرجت مع مهند ويدي بيده وعبودي يمشي قدامنا بتعثر واجتهاد شويه يطيح وشويه يقوم يجري .. ضم مهند يدي بيده بقوة .. وانا فيي قلبي له مشاعر من الصعب جداً اني اوصفها .. مهند اعطاني الأمان والحنان والحب والأهم عبودي اللي مالي علينا حياتنا . الحمد لله ان ربي رزقني بأهل وعوضني عن امي وابوي وجدتي ورزقني بزوج مافيه منه . ورزقني بأجمل طفل في الدنيا . ....................... كلمة للكاتبة انتهت مهلاً ياقدر اولى رواياتي .. كتبت عن ديمه وهي شخصية حقيقه اعرفها جيداً .. كل ماحدث في الرواية كانت حقيقة رفيقة اختي ( لمى في الرواية ) وديمه كما احببت ان اطلق عليها هذا الاسم انسانه بمعنى الكلمه قد لم افيها حقها في الوصف .. جميع مآسيها التي وردت في الروايه حقيقيه من فقد الام وعذاب زوجة ابيها لها وتربية خالها وحبه لها الذي لم اكن اوصل لكم شيئاً منه لأنه مضرب مثل في العطاء . والمرض والسفر لامريكا ومواجهة الشخصية التي ستكون زوجها قريبا والتي اطلقت عليها اسم ( مهند ) وخطبة مهند لها ورفضها له .وسفرها لسوريا كل ماحست برغبة في الهروب من المشاكل او الهموم . ورسمها وابداعها في الفن التشكيلي . اضفت على الحقائق كل الأحداث التي توالت بعد خطبتها من خيالي ... اتمنى لها السعادة .. وان تكون حياتها مع مهند سعيدة وبدون مشاكل . امنياتي القلبية ان تكونوا استمتعتوا اثناء القراءة .. قد اكون اخطأت بطريقه السرد واكتفاءي بشخصية واحدة تتكلم او تعبر لكني اعشق طريقة السرد والبوح عن الذات والمشاعر .. ارى انني اتقنها اكثر من الوصف لشعور الغير لكنني تحديت مع نفسي وقررت ان ابدأ روايتي الثانية باسلوب مختلف ومفاجيء للجميع سواء الأحداث ام طريقة السرد .. وسيكون وصف جميع الشخصيات القدامه اكثر عمقاً ودقة .. لكل من وقف معي وساندني في ابنتي الأولى مهلاً ياقدر .. لايفيكم الشكر ولا تفيكم كل معاني الامتنان .. انتم هبة من الله لي حيث بعثني لكم وبعثكم لي .. قريباً ستكون ابنتي الثانية بين ايديكم .. انتظروني اكملها كي لاأرهقكم بالانتظار كثيراً .. تذكير لمن اراد نقل مهلاً ياقدر .. رجاءي ان تنسب لي والا لقاءنا عند الحق الذي لايضيع الحق عنده . دمتـــم بخ ـــير وسـع ـــآدهـ أعتـــذر عــلى الإطــآلــــه أو تطفيشكــــم أسفــــــه ح ـــبآيب قلـــبي... شـوـوقـــ لـوليـــف روح ــي ـــي....