.. اللي يخطر ببالي لما يُسال عن تقييم الجيل،
فالمطلوب تحديد قدرته على تحمل مسؤوليات دوره ..
في :
1- خدمة شعبه
2- قيادته وادراته
3- الارتقاء به للافضل
والمتعارف عليه نظريا ..
ان عمر الجيل هو 33-35 سنة
ولما اطالع حولي لـ هالفئة العمرية في مجتمعنا
- ويمكن امدها حتى لاعمار الـ 40 -
ومستوى اداءها ومدى عطائها في المرافق والمؤسسات العامة والخاصة
خاصة وانهم هم الان اللي يمثلوا الشريحة الاكبر والمؤثرة في ..
اتخاذ القرار، والادارة، وتنفيذ وتشغيل وتقديم الخدمة
للاسف، اجدنا في وضع مذري وغير متفائل
وعشان نكون واقعيين في كلامنا
خدي عدد من الخدمات اللي نتعامل معها جميعنا
وقيسي مدى، ما حاقول حسن ادائها، لكن ..
حاقول مدى مجرد "الرضى" عن ادائها
وخلينا ناخد خدمات متعارف عليها عالميا ..
انه من قوة مقومات النجاح فيها،
انها شبه هي نفسها ممكن تشيل نفسها بنفسها ..
مهما كان القائمين عليها سيئين
فـ خدي مثلا خدمات زي
الاتصالات والطيران
الاتصالات، ..
على ارتفاع تكاليفها عندنا، خاصة مقارنة بغيرنا حتى من دول فقيرة،
يكاد ما يوجد شخص فينا الا وله موقف من سوء خدمتهم والشعور بالغبن منهم
القصص كثيرة، لكن اعذريني .. ما اجد في نفسي جلد الخوض في التفاصيل
الطيران، ..
مع كل اسف، خدمتهم اول (قبل 10-15 سنة تقريبا)
واللي كان يشتكي منها الناس وقتها
الحين، صارت اسوء بكثييييييير
والواحد يقول : الله يرحم ايام زمان، ياريتها ترجع بمساوؤها
خدي مثلا الرحلات الداخلية للمدن الرئيسية
على مدار السنة، ومن غيرالخوض في الوضع وقت المواسم،
تتصلي قبل السفر باسبوع - وفي حالات كثير حتى باكثر من اسبوع -
وما تلاقي حجز !!
وشوفي وضع الركاب الانتظار في مطارات المدن الرئيسية
يقولك روح سجل اسمك في قائمة الانتظار، وتلاقي رقمك في الانتظار 200 !!
عدد كافي لان يعبئ رحلة اضافية، .. ولاحظي وضع شبه يتكرر كل يوم
يعني ما اختلفنا، انت قاعد تضحك وتتحايل على سذاجة الناس ..
بـ هالاساليب التمويهية والبيروقراطية
لكن لما تجي اخر السنة المالية وتحاول تبرر اخفاقاتك ..
بانه على الرغم من حجم ميزانيتك الا ان الخطوط خسرانة
فالسبب، لانك فاشل وما انت عارف تخدم السوق
وكفاية دليل اخر على فشلك، ان شركات الدول المجاورة ..
مو اقول بس اخدت زباينك، الا انها عايشة ومحقق نجاح وارباح من وراء تسرب زباينك
شئ ثاني قاهرني في وضع الخطوط، ..
وله علاقة مباشرة بعقول جيلنا الصاعد اللي مسكها السنوات الاخيرة
انه لما يصير عليك ظرف يترتب عليه تغيير وضع تذكرة وحجز عملتيه
شوفي الابتزاز والتحايل في تحميلك رسوم وغرامات هي ..
اقرب لاستغلالك وموقفك اللي صرتي فيه .. من عموم تقديم خدمة افضل للعملاء
يعني ذكاء هالجيل القائم على قيادة وادراة الخطوط السعودية
- واللي هو في الحقيقة اكبر شهادة على خيابتهم وغباءهم -
لتصحيح وتعويض خسائرهم السنوية
بدل ما يكون بتحسين كفاءتهم وكسب حصة اكبر في السوق .. زي شركات الطيران الاخرى
لجأوا للتحايل علينا بتحميلنا تكاليف زيادة .. بحجة تحسين الخدمة !!
يا هم ليلي من تحسين خدمة .. زاد معها شكاوي وتزمر الناس وهروبها منهم
ما ابغى ادخل في التفاصيل، لان حيطول معها الحديث
والاتصالات والطيران انما هم عينة صريحة وواضحة لسوء قيادة وادارة جيل اليوم لكثير ..
ان لم يكن سائر اوجه مرافق وجوانب حياتنا اليوم
وحقيقة اجد مفسر ومبرر منطقي وقوي لحقيقة اخفاق هالجيل
لكن، اسمحي لي .. لعدم الاطالة، ..
ان اؤوجل، ان اذن المولى، فكرة طرح هالجانب من الموضوع
ختاما، ..
كلامنا هذا .. لا يعني انه هناك نماذج مثالية وواعدة في هالجيل
لكن .. احنا نتكلم عن العموم، .. ولانهم يعكسوا السمة السائدة
واللي نقيم من خلالها وضع جيل الويم
"احساس"، ..
الله محيك .. وجمعتك مباركة
.