يامن لقلب (ن)كـل ليـل(ن) ويومـي=كـن بمعاليقـه تـحـز الصقـيـلات
ويامـن لعيـن(ن) ساهـره ماتنومـي=تسهج وتسهرهـا جـروح المعانـات
تسهـر وترقـب عاليـات النجومـي=وان عارضت برق(ن) شلع بالثقيـلات
عزي لحـال(ن) طاولتـه الهمومـي=تصلاه نار الهم فـي كـل الاوقـات
الجوف كـن تهـب فيـه السمومـي=لاطرى علي من حالي الوقت مافـات
قمت اصفق الكفين واقعـد واقومـي=واقلب افكاري علـى كـل وجهـات
واصبحت في بر(ن) من الوجد اعومي=واضن بيدي لي من الموت سكـرات
والله يالوما خـوف بعـض العلومـي=اسـرار مابيـن النحايـف خفـيـات
لاهج مـن داري وانحـي واشومـي=عسانـي اسلـى بالديـار البعـيـدات
لـو سلـم اهلهـا مايوافـق سلومـي=لكن لهـا لمعـذب الـروح سجـات
للي همومه مثـل حـدب الرجومـي=لابد ماتغـدي مـن السجـه اشتـات
لو قالـو انـي ناسيـن سلـم قومـي=ماهمنـي لـو يشتمـت كـل شمـات
والله مـا اقـول للايمـي لاتلـومـي=ولاضقت من راع العلـوم الهزيـلات
اسـج ساعـه كنـي اسـج دومــي=وانسى القديم بسجه الخمس ساعـات
اصوم في يومي عن الهـم صومـي=والعين لا امسى الليل من طوعها تبات
لا واهنـي الباشـق اللـي يحومـي=مايمنعـه عنهـا جنـود الـجـوزات
لا اسدل جناحـه واختلـط بالغيومـي=كنه لها من سرعتـه شـوت ينشـات
ماهو بالانسان الضعيـف الزعومـي=اليا زعم لـه مـرة(ن) جـظ مـرات
لو فتل عضـوده ضعيـف العزومـي=جـداه فـي ضيقـه عبايـر وونـات
وللـي حياتـه كـل ابوهـا همومي ـ=اغلى هديه هـي وفاتـه لـي مـات