وهُنا تأكدت أن الإبداع له مواطن
واني في ضفاف إحداها
صــعب لا منــــك فشلت وصـــعب لا منك لقيت
ان مـن يكـره نجاحك يدري انك مـا نجحت
امس ضقـــت ورحـــت اقلب ذكرياتي وانتهيت
عند صورة طفل صوته مثل صوتي لا انجرحت
وش مثـل ؟! لا والله الا هذا انا يــــوم ابتديت
انطق حـروف تلعثم في لساني لا مدحت
هذا انا يـوم الحــياة في نظـــرتي عشرين بيت
ومسجدين ومدرسة من طين كم فيها اصطبحت
هذا انا واصبــحت اتمتم هــذا انا حتـــى بغيت
اختنق بس القدر عـيا على موتي وطحت
وصاح صوت الطفل فيني انت من وين ارتميت
قلت انا المستقبل اللي فيه كم همت وطمحت
امس كنت ابيـــــك تكبر بس والله لـــــــو دريت
إني اللي عشت لاجله .. مت عندك واسترحت
لـو دريت ان الزمــــان يجــــر رجلـــى مـاعديت
ولـو دريت ان البــحور بلا مـواني مـا سبحت
كــان دربك لي طويــــل وكـــل ماشفتك هويت
قلت لك كـبوة جـواد وماكبيت الا جمحت
ليـــه تسمعنــي وتمشى اه ليتـــك مامشيت
واه ليتـك من كثر عثرات الايــام انتصـحت
ضاعت احلامي وظل الحزن فيني واهدتيت
للطريق اللي يوديني على دمعي ورحت
يـا الحزن ليتـك مثل دمــعي وتنزل لارقيت
بس اعرفك لومسحت الدمع تبقى ما انمسحت
كان حلمي في وجود انسان يبكي لابكيت
وصار حلمي في وجود انسان يفرح لافرحت
كنت اشوف الناس مثلي كل ماجعت وضميت
ومـا دريت ان الاوادم ناس فوق وناس تحت
اه يااول ذكرياتي خذني في حضنك نسيت
لأسالك عن وجه ابوي اللي معه ياما سرحت
خذني في حضنك بغفى ياآآه مبطي ماغفيت
وان لمحت دموع عيني سو نفسك مـا لمحت
خذني بحضنك وبعثر في جروحي وان قضيت
هز لي كتفي وقل عيب تبكي لو سمحت
اضحك وعلم زماني من انا ومن وين جيت
طق باب الحزن واصرخ في لامني فتحت
وضمني يمك وكمل ضحكتك لامن بكيت
ودي اذكر كيف كانت ضحكتي لامن فرحت..
لـ / فهـد المـساعد