وينك ترى قلبي تقطع من الشوق
وينك تعبت من السهر والكآبة
ماني مصدق(كل مطرود ملحوق)
من يوم طال الانتظار وعذابه
اشتاق لك شوق على الواقع يفوق
شوق الغريب اللي فقد له قرابة
ويحن لك قلبي من الشوق ويتوق
يعصى لو ترده شروط الرقابة
شوقي يغني لي على كل طاروق
وحزني يسامر بي لحون الربابة
اسهر مع أطيافك على منتهى الذوق
واعيش حلم تكتسيه الغرابة
حريتي ضاعت وقيدت بسبوق
كل الدروب امست بعيني تشابه
حب..وفرح..وأحزان..وجروح..وحروق
ودمع يكدر صفوتي بإنسكابه..
عليك احس اني بلا راي مسيوق
اثر الغلا يكسر جسور الصلابة
يثور بك همي وينزاح ويروق
ويرجح عذابي لين يوفي نصابه
ليل الشقاء عتم..به رعود..وبروق
وعواصف تحجب بياض السحابة
وريح يخلي قاسي القلب مفتوق
حتى تضيع من السؤال الإجابة
سرقتني والحب سارق ومسروق
وآسرتني لو مابراسي طلابة
من جد محتاجك..قطع قلبي الشوق
تعال مليت السهر والكآبة ..؟
...