[ميــ قمر14ــشو]

السلام عليكم ورحمة الله وبركاته ,,,


أول شي ودي أوضح شغلة ,,, موضوعي ماهو قصة ولاهو حكاية صارت مع ناس ,,, الموضوع اللي ودي أطرحه هو نقاش حول أكثر من نقطة بأوضحها لكم بالتفصيل تحت شوي


طبعا كلنا نعرف إن ظاهرة وجود السواقين في بيوت العائلات انتشرت وأصبحت شي عادي ,,, إذ لا يكاد يخلو بيت من السواق ,,, وطبعا الأكثرية يجيبون السواقين لأنهم يحتاجونهم بالتأكيد ,,, والبعض يجيبونهم فشخرة وهذولا مالنا دخل فيهم ,,,

وكما نعرف أن الأسباب التي تحوجنا للسواق هي بأن دوامات العيال أو الزوجة غير متفق مع دوام الأب ,,, فيصير الضرورة تحتم عليهم بأنهم يجيبون سواق يلبي حاجياتهم ويوصلهم لمشاويرهم ,,,

إلى هنا مافي مشكلة ولا في اختلاف ,,, بس المشكلة يا شباب ويا بنات هي المصايب اللي جالسين نسمع عنها من اغتصابات يسوونها سواقين ,,, ومن خطف وسرقات وما إلى ذلك من الجرائم البشعة التي تقشعر منها الأبدان ,,,

أنا بصراحة فكرت كثير بهالموضوع ولقيتله حل أشوف إنه الأفضل وودي تشاركوني رأيكم وتعلموني إنتوا تأيدون حلي ولا إذا عندكم حلول أخرى تطرحوها ,,, وأتمنى تناقشوني بكل صراحة وموضوعية ويكون النقاش جاد ومثمر ,,, يعني ما نبي زعل ولا نبي نمزح
<<<<< كنه جالس يتشرط

الحل اللي أنا أشوف إنه الأنسب هو:

السماح بقيادة المرأة للسيارات ,,,

لو نسمح للمرأة تسوق السيارة وتروح تلبي حاجياتها كان بنرتاح من أشياء كثيرة والله وبنمنع مفاسد كثيرة ,,, وبعض الأشياء اللي بنرتاح منها على سبيل المثال:

1- ما بنصير نعطي البزارين السيارات عشان يساعدونا بقضاء متطلباتنا دام الأم الله يطول عمرها موجودة وتقدر تسوق وتساعد ,,, وبالتأكيد سواقة الحريم أهدى من سواقة البزارين اللي معبين شوارعنا بكثير ,,,

2- بنرتاح من 99 % من السواقين ويمكن أكثر بعد ,,, وبنمنع حصول الخلوة والجرائم البشعة اللي نسمع عنها دايم ,,,

3- الأم أو الأخت الكبيرة بتكون حريصة على عيالها أكثر من السواقين ,,, وبالتالي مافي بزر بيقول انزل يا سواق وخلني أنا أسوق ويسكته بـ 10 ريالات أو ببخاري غداء ,,, وما بيكون في بنات يطلعون بدون علم أهلهم لأن الأهل هم اللي بيودونهم ويجيبونهم ,,,

صدقووني أنا من رأيي إن هذا حل رهيب جدا ,,, وبرأيي إن مافي أي سبب مقنع يمنع الحريم من السواقة ,,, بكل العالم الحريم يسوقون ولاهم مسويين مشاكل ,,, وش معنى عندنا بيصير مشاكل ؟؟؟؟


أتمنى مشاركتكم لي بآرائكم الجميلة ,,, وعندي سؤال ثاني ودي أطرحه عليكم وأبي الجواب بكل صدق وأمانة وبدون إحراج لو سمحتم ,,, واللي ينحرج لا يجاوب :

لو كنت أب وجتك بنتك وقالت لك : بابا السواق اغتصبني ((لا سمح الله)) ,,, وش بتكون ردة فعلك ؟؟؟ كيف بتاخذ حقك من السواق بدون لا تسوي شوشرة وفضيحة لنفسك ولبنتك ؟؟ وايش بتسوي لبنتك عشان ترد كرامتها اللي انجرحت ؟؟ وعشان تعالج نفسيتها من الصدمة القاسية اللي تعرضت لها ؟؟

ولو كنت زوج وحصل هالموقف مع زوجتك ((لا سمح الله)) ,,, كيف بتتصرف ؟؟؟




ملاحظة أخيرة :

أرجوكم لا تقولون لي اللي ساترة نفسها محد بيجيها ومن هالكلام ,,, لأنك ما تدري وش اللي يجيك ,,, واللي بيسوي جريمة ما بيقعد يدور هذي متسترة ولا هذي سافرة ,,, وكذلك احنا كثير سمعنا بأطفال بسن الزهور ما بعد بلغوا واغتصبوا من قبل سواقين <<< لا تقولولي الطفلة ما كانت متسترة بعد


أعتذر عن الإطالة في الموضوع ,,, وأتمنى منكم المشاركة وحصول الفائدة لنا وللجميع ,,,


أخوكم :

مشمش ,,,