السلام عليكم
كيف الحال ان شاء الله مبسوطين
يا جماعة ما تحسوا بطفش زايد عن اللزوم
اكيد حتقولو انو هدا عندو هموم كتيرة بس انا اقولكم لا.
يا جماعة انا اتوقع انو السبب من حالة الطفش هدي اللي اعاني منها ويعاني منها الكتير من الشباب ويمكن البنات(يا ريت وحدة تعقب على الكلام) انو الواحد يحس انو محد يسال عنه كانو هوا عايش في البلد لحالو.
طيب حتقولو والاصحاب والاحباب فين راحو . انا اقولكم انو الاصحاب والاحباب على العين والراس بس بصراحة ما يهتمو زي ما يهتمو الوالدين (ايش هدا ناوي يقلبها محاضرة دين)
يا جماعة صدقوني والله انو المثل المصري اللي يقول "ازا كبر ابنك خاويه"
صحيح وواقعي و مهو مشاهد على كتير من الاباء وغالبا الامهات.
طبعا انا عارف انو بعضكم حيقول انو ايوا المثل منطبق عليه بس انا اقولهم البسوا نضارات ترا انا قلت غالبيتكم مو كلكم.
يعني دحين الواحد لمن يحس انو احد يراقبو ويسال عنو اكيد انو حيحس انو انسان مهم وانو افعالو وحركاتو (وفي بعض الروايات حركتاتو ) حتغير مجرى التاريخ وبالتالي حيعمل حسابو لاي حاجة حيسويها.
طبعا بحكم جهلي في علم النفس او السيكولوجي (مسوي فيها مسقف بثيوت السين) ما اقدر افتيكم كيف انو متابعة الوالدين يسبب راحة نفسية و يروق المزاج (مو ببعض الاشياء الممنوعة).
الزبدة من كل الحشو هدا انو يا اولياء الامور حاليا ويا معشر الشباب والبنات اللي حيسيرو اباء وامهات مستقبلا الله يخليكم حطو الكلام هدا في حلقة ودانكم ازا عاوزين انو تحسو بالراحة النفسية ليكم ولبزورتكم حاليا ومستقبلا.
والسلام خير الختام.