رواية "الا ليت القدر" للكاتبه بقايا شتات..
رجعت من المدرسه..
وفتحت الباب الرئيسي للبيت..
: هاي مام..بروح ابدل ملابسي بسرعه وانزل..انتظروني على الغدا..
ومشت تبطلع الدرج..بس وقفتها صوخت امها..
: ريمااااس..وقفي..
ريماس دق قلبها خوف..ووقفت ...لفت على امها..وشافت العصبيه مرسومه على ملامحها..
: يس مامي..
لطيفه ..مشت ووقفت قدامها ومدت ايدها..
: ممكن تفسرين لي هذا ايش ؟؟
ريماس نزلت عيونها على ايد امه تطالع وش ممكن يكون فيها..وانصدمت وتغير لون وجهها وما عرفت وش تقول او بأيش ترد..
لطيفه: بسرعه..ابي اعرف كيف وصل لغرفتك..
ريماس حست انها لازم تدافع عن نفسها بس ماهي عارفه كيف: من اعطاك هذا ؟؟
لطيفه صرخت: انا سألتك جاوبي بسرعه..ايش جاب اليسقاره هذي لغرفتك !!
ريماس: هذي...مو مني..انا ما ادري كيف جات..شوفي من اللي يبي يتبلاني..
لطيفه مدت ايدها على ريماس واعطتها كف: بس ولا كلمه..ياخسارة التربيه والتعب فيك..حراك انتي تكونين بنتي..لو انها بنت شوارع ما سوت سواتك..انا كذا ربيتك..انا كذا علمتك..هذي ثمرة تعبي فيك..هذي نتيجة ثقتي فيك!!
ريماس امتلت عيونها دموع: ماما..والله هذا مو مني..
لطيفه باستحقار: لا تحلفين..لا تحلفين بالله كذب..انا ياريماس لما اعطيتك الحريه..لا تحسبيني غبي هاو ما افهم..انا تركتها لك..لاني توقعت عرفت اربي..واكيد ما فكر ان بيجي يوم وبنتي تصدمني.. بس يا خساره..خاب ظني فيك يا ريماس يا بنتي..
خاب ظني في بنتي الكبيره..اللي قلت لنفسي راح افتخر فيها..ونعم الاخلاق ياريماس..تدخني !!
ريماس ما عندها شي تقوله...بس ودها تبرر موقفها..في اللحظه هذي تمنت الارض تنشق وتبلعها..امها بجد كانت غير عن كل الامهات..كالنت مهتمه وحنونه وفاهمه وواعيه..تاركه مجال تتنفس بس موضحه لها الحدود..ومع ذلك خيبت رجاها..
ريماس برجاء: يمه تكفين سامحيني..
لطيفه غمضت عيونها ودمعتها سالت على خدها: اطلعي غرفتك..لا اشواف وجهك مره ثانيه..
ريماس: يمه تكفين اسمعيني بس..
لطيفه صرخت بصوت عالي: ريمااااااس..قلت لك..وجهك لا اشوفه مره ثانيه..وصدقيتي لو فكرتي تنزلين ما راح تشوفين خير مني..اتوقع سكت لك بما فيه الكفايه..بسرعه انقلعــــي عن وجهــــي..
ريماس طلعت بسرعه على الدرج..ودخلت غرفتها وقفلت الباب على نفسها..
وهي تبكي حسره وندم..وقهر وآه...يا صغر وجهها وهي طاحت من عين امها الي كانت تشوفها بعيونها كبيره..عينها بتظلم كسوره كل ما فكرت ترفعها..مستحيل تجدد الثقه اللي انجرحت بينها وبين امها حتى لو فكرت تتغير..بتظل ولا شي بعين امها..اللي كانت رافعه وعازه شانها..
دخلت رهام البيت لسه وصلت من المدرسه...شافت امها واقفه عند الدرج وتطالعه..
: هاي مامي..انا جيت..
استغربت ان امها ما لفت ولا ردت عليها...قربت منها
: يمـــه !!
لطيفه الحسره والقهر والغصه والالم كلها اكلت قلبها.. مازالت تحس انه حلم ودها تصحى منه بأسرع وقت ..هذي ثمرة تربيتها !! معقول ما عرفت تربي ..هذا اخر التعب ..بنت تدخن !! وتمنت ان السالفه تكون متوقفه على دخان وبس..ونزلت دموعها ونزل راسها بالارض..
رهام وقفت قدام امها وشافت دمعتها..ودق قلبها..
وبخوف: يمه ....تبكين !!
لطيفه طالعت رهام وتسأل نفسها ممكن رهام تكون مثل اختها ؟؟
رهام دمعت عيونها: يمه تكفين ردي علي..ايش فيك..وش صاير؟؟
لطيفه: مافي شي...بسرعه روحي بدلي ماباقي شي ويوصل ابوك.."ومسحت دموعها وتركتها"
رهام ما ارتاح قلبها..حاسه ان صاير شي وكبير بعد..امها تبكي !!
بسرعه طلعت فوق وراحت لغرفة ريماس ..حاولت تفتخ الباب بس كان مقفل..دقته..
: ريمو...ريمو افتحي بسرعه..
ريماس سمعت صوت رهام زاد صوت بكاها..
رهام ضربت الباب بقوه: ريمو افتحي بسرعه..امي تحت تبكي ليش ؟؟
ريماس فتحت الباب وبسرعه رمت نفسها بحضن رهام..وتبكي بصوت يقطع القلب..
رهام ما عاد تتحمل اكثر ..زاد خوفها واختفى الدم من وجهها.. حاولت تبعد عن ريماس
: ريماس..وش فيكم تكلمي ؟؟
ريماس: امي ...امي عرفت ان ادخن..
رهام كأن ضربه جات على راسها ..وصارت مثل الغبيه تردد الكلام..
: امي انا ؟؟؟ عرفت انك تدخني..
ريماس ما تكلمت بس دموعها تكفي انها تثبت كل شي..
رهام نزلت دموعها وبأستحقار طالعت اختها: كله منك.. انتي اللي جبتي البلا لنفسك..نصحتك كثير..وفهمتك..بس كنتي مصره تمشين رايك وافكارك الغبيه..وهذي النهايه.."رفعت اصبعها بتهديد بوجه ريماس" لو حصل لامي شي..انتي المسؤوله..وراح تدفعين ثمن كل دمعه نزلت منها ..امي يا ريماس سوت المستحيل عشانا .مستعده تضحي بروحها عشان بناتها..ما تطاله بهالدنيا..الا انا وانتي..وانتي خيبتي ظنها..ونزلتي راسها..وكسرتي في نفسها اشياء مستحيل تتصلح...للاسف انك بنت لطيفه .."وطلعت وتركتها "
تركت ريماس تعاني من الحسره ..والندم..وتأنيب الضمير..تتمنى لو الدقايق والساعات ترجع وتعدل كل شي ...هي كل اللي فيه وسوته عشان ضاري..بس السبب مو ضاري...السبب مدى..لو مدى ما طلعت في حياتها ما كان أي شي من هذا كله..بس لازم مدى تدفع الثمن معاها..مستحيل تخليها تتهنى بحياتها..وهي تعاني لحالها..لازم احد يشاركها معاناتها..
&&&&&&&&&&&&&&&&&&&&&&&&
في بيت مرام..
جلسة قهوه وسواليف ..
مشاعل:والله ابتهال ناقصتنا..
مرام: المشكله صعبه جيتها هنا ..من يوصلها دايم..
مشاعل فاتحه سيرة ابتهال قاصده: الا على طاري ابتهال..ما قلت لك..اني كلمت ابتهال عن عبد الله اخوي..
مرام تحمست: جد !!! وايش ردت عليك.؟؟
مشاعل: في البدايه ما قالت شي..بعدين قالت انا اعتبره مثل اخوي سلطان..
مرام زعلت شوي: معليش ربي يعوضهم خير..
مشاعل: ان شا الله..الا عزام اخوك ما فكر يخطب..
مرام بعدم اهتمام: ما ادري عنه..ما اتوقع انه يفكر بالزواج..
مشاعل: ليه !! ايش ناقصه ما شا الله..ضابط آآآد الدونيا..وكل بنت تتمناه..انتوا اسألوه..يمكن يبي ومستحي..
مرام بدت تفكر: تتوقعين نسأله ؟؟ يارب يقتنع لان امي بتموت على ما تشوفه معرس..وانا نفس الشي ..متحمسه لزواجه..قبل كم سنه كنا دايم نجيب له طاري الزواج وهو كان رافض..لكن الحين برجع المح له.
مشاعل: تبين نصيحتي..اخذوا له ابتهال..والله لو يلف الدنيا ما راح تلاقون له احسن منها..
مرام في البدايه انصدمت من الفكره بعدين تحمست لها: والله لو ابتهال توافق على اخوي...ان بطير من الوناسه...بجد تناسب عزام اخوي..وخصوصا ان عارفتها وعارفه اخلاقها..
مشاعل ابتسمت براحه: اجل روحي على طول لامك وكلميها..ابتهال بنت ما تتفوت..بسرعه لا تطير منكم ترى الخطاب طوابير عند بابهم..
مرام دخلت الفكره براسها وبتحاول تقنع اخوها فيها...
&&&&&&&&&&&&&&&&&&&