صابني حبكم ارحموا ياناس
ذيك الأيام ماني بناسيها
ذقت مر العزاير بغير قياس
دمعة العين لولاك ما سخيها
بس انا حب والحب مابه باس
سكة (ن) كل الاجيال تمشيها
اكتم السر واخشى من البلاس
وام وجهين والله مادانيها
رغبتي في غنوج(ن) تقض الرأس
ليتها تطلب البيع واشريها
حيث فيها من الفن خمس أجناس
درة(ن) من طمع ما يخليها
درة(ن) لبسوها الحرير لباس
ليت عيني دوامن تراعيها
حملوها الجواهر وعقد الماس
ساطع(ن) برقبتها وأياديها
عن هواها طيور الهوى فلاس
بالشوارع قليل (ن) تخطيها
دونها الباب والقفل والحراس
حذروها وأنا ميت(ن) فيها
كلما قلت ابسلم من الهوجاس
مال ميزان قلبي بطاريها
خدها ورد وعيونها نعاس
باحسن اوصاف ربي مسويها