تعبت عيوني تنتظر بالمسافات
طالت وطالت ياهوى دون حاجه
لو تعتب ايامي على الصبر لحظات
الليل قفى وانكسر لي سراجه
ياملهم(ن) نبضي على عزف الابيات
ترى الزمن ناسي وتعكر مزاجه
لي جفن ساهر بعد فرقاك مابات
وجرح(ن) صعيب ياحبيبي علاجه
كنت اتخيل طيفك اليوم ساعات
والقلب يعلن من غلاك ابتهاجه
كن العقل شارد تمرد على الذات
والورد ملّ الحين ضيق الزجاجه
يبي تشمه ياهوى الروح لحظات
وغصنه تضمه لا يزيد اعوجاجه
وانثر عطورك بالغلا والمسرات
على الطريق اللي حوانا فجاجه
ماظن حلمي صادق بكل مافات
دام الخيال الحين ضحك وسماجه
تذكر وش اللي قلت قبل المسافات
(اصبر .. وباكر يا الحبيب نتواجه)!