كل عام والجميع بخير وصحه وسلامه عيد سعيد ومبارك بمناسبة حلول عيد الاضحى المبارك
وارجوا ان ينال النص اعجابكم وهو من جديدي
ياصاحبي لاعاد تنظر لعيني = انا حزين ودمعتي غصب هلت
تهزني الذكرى بشوق وحنيني = والنفس من كثر التوجاد ملت
يالله تعافيني ولا تبتليني = لاما جيوش الضيق حالي تولت
وجدي وجود اللي بليا عويني = من حيلته من ضك الايام قلت
عطيب رجل ولا يحرك يديني = محاجره بدموع غبنه تملت
غزوه عدوانه وشلوا الثميني = رديان لاغلى ماقناه استحلت
دروا بربعه مالحضن غايبيني = ذيدانهم بارض المغيرين فلت
القوم واجد والجماعه ثنيني = وساعة منيتهم على الفور حلت
ان عودوا ربعه وهم سالميني = فارزاقهم بيد الاجانيب ولت
واليا ذبحوهم من يراعي الحزيني = روحه على روحه لفرقاه صلت
كانه حجاب الدار ماضي السنيني = ياما نفوسٍ من ملاقاه ذلت
واليوم بالحسره يجر الونيني = نار الغبينه فالمعاليق كلت
ذي حالتي لاغاب مني ضنيني = رشي همي فالشرايين دلت
الصبر من طول الليالي يليني = اضنى عروقٍ من طبوعه تحلت
فعسى يسوقه نبض شوقه يجيني = يرد فرحت قلب عنه تخلت