|
كـلٍ يعـود لاصـل جـده ومربـاه
راعي الشرف يشرَف والانذال يهبون
الفرع من عوده شرابـه ومسقـاه
والحنظلة مرّة ولو تشـرب مـزون
الطيـب كايـد والمناعيـر تقـواه
والهون هيّن تدنع النفـس وتهـون
ناس على كسب المراجـل مضـرّاه
وناس على كسب الفشيلة يضَـرّون
هذا على وضح النقـا كـل ممشـاه
وهـذا إذا شافـوه ربعـه يصـدون
لا تامن الخوان لو زخـرف حكـاه
من خان بك مره يبي باكـر يخـون
وافطن ترى زول الرجاجيـل تـواه
كم واحدٍ يعجبك زولـه وهـو دون
ياطيب الشارات مـن يـوم منشـاه
احذر عدوك لا يغدرك على هـون
ترى عـدوك غايتـه فيـك ومنـاه
يزرع بصدرك من قنا رمحه طعـون
واللي رضع لبـوة عـدوك توقـاه
الجرو ولد اللبـوة اللـي تعرفـون
للطير يا الصقار بالريـش مغـواه
الجاهل اللي باكثر الريـش مفتـون
للحـر والشبـوط ماكـر ومجنـاه
والفرق بالافعال لو هـم يطيـرون