صاير تبي تبعد ولاتدري اشلون
وصاير على اتفه شي ودك تفارق؟؟
تخطي وتجرح..تقتل الحلم وتمون
والدمع في عيني من الوجد حارق
خليتني علك لوكالة يقولون
ومثلك على بدع الاشاعات خارق
شفني من الألام مازلت مغبون
ومالاح من وجه المسرات بارق
ياقاتلي والطيب بادلته طعون
وحالي غدا في بحر الأحزان غارق
كان الجفا مبدأ ضميرك ولاتهون
ماشكلت عندي مع الوقت فارق
في كون كنت وكانوا الناس في كون
ونور الغلا مابيننا كان شارق
ومن صرت بأوهام المطافيق مسجون
ماعادني باب المواعيد طارق
طبع الغدر لاقال شكراّ وممنون
لاتحسب إنه يب يمسكك بيارق
شكلك تبي تبعد ولاتدري اشلون؟؟
فارق مدام إنك تبي البعد فارق!!