:: :: ::
التفت علي قال : فيه طبيب مغربي بنروح له
مارديت عليه عيوني مورمه وشكلي مرة غلط ... دخلنا عند الدكتور بعد ماوصلنا بسيارة كانت مع مهند .. طبعا ماادري انه استأجر لأن هذي اول مرة اخرج من الفندق وبدل مااروح للمطار وارجع لاهلي رحت للعيادة ويدي شكلها مكسورة ...
دخلت معاه عند الدكتور وسلم عليه مهند قال انا صاحب عبدالفتاح صابر .. وقعد يكلمه عنه عرفت انه زميله بالدراسه في لندن وانه هذاك مغربي عايش بفرنسا ..
سألني الدكتور وقلت له يدي تألمني . وطالعت بمهند شويه وكملت طحت على الشنطه ..
كان مهند يناظر بالأرض ورفع نظره لي على طول وبسرعه صد للدكتور قال : ياليت تسوي لها اشعه يادكتور
رد عليه الدكتور وهو يكتب : طبعاً نعمل لها اشعه بس الأهم ماتكونش حامل
طالعني مهند قال : لا لا مو حامل ..
اخذتني الممرضة ودخلتني غرفة الاشعة وبعد ساعتين طلعت من العيادة ويدي مجبسه .. قال لنا الدكتور كسر خفيف ولازم اجلس بالجبس من اسبوعين لثلاثة اسابيع ..
في السيارة ساكتين مشى مهند بالسيارة ولف بي في الشوارع بصراحه احسني مخنوقه ماابغى ارجع للفندق .. بنفس الوقت ماابغى قربه ولاابغاه يسوي لي معروف .. ياليت اللي بجنبي الحين واحد من اخوالي ولا لمى ولا أي احد غير مهند ..
قال : كيف الألم الحين
: .............
: انا قلت للدكتور يعطيك مسكن .. التفت وقال : نتعشى برا ولا ترجعين ترتاحين
كنت اناظر مع الشباك .. ومارديت عليه .. دموعي تنزل بغزارة .. مهند شرخني .. قتل فيني اشياء بضربه لي واهانته .. كسر يدي هذا اول الغيث .. وش بعد على قولة لمى ..؟
تذكرت جميلة وكابوس جميلة ..
: ديمه ..
: اش تبغى ... قلتها بصوت مبحوح وبائس ومقهور
: الله يكسر يدي ان مديتها عليك مرة ثانيه
سكت ماعلقت على كلامه .. يعتذر . .؟ مااعتقد اني راح اسامحه ولا اغفر له .. مهند الا يبغاني انصاع له وادور رضاه .. مافهم اني مو من النوع اللي يجي بالقوة .. ماتعودت على القسوة من زمان .. كنت ارفض حركات جميلة معاي واسلوبها بس مااقدر اواجهها لأنها اقوى مني .. بس الحين مهند جميلة ثانية لايمكن اسمح له يتمادى وارجع ديمه اليتيمه المكسورة اللي مالها احد ..
هالمرة لازم اوقفه عند حده ولازم انتقم منه بدون مااضره .. بس ارجع حقي منه
اخذت بلحظتها عهد على نفسي مااسمح له يقرب مني لو يعتذر مليون مرة الا اذا اثبت انه يستحقني وجدير بديمه .. لايمكن اخليه يتجاوز حدوده معاي بأي حال من الأحوال كذا رباني خالي ناصر كان دايماً يقول لاتسكتين عن حقك خليك شجاعه وحقك مايضيع .. خلي اللي يتعامل مع ديمه يخاف منها بقدر مايحبها .. ولاتصيرين سهله مهما كان ..
اليوم مهند فوقني وذكرني بكلام خالي اللي نسيته من قبل لايخطبني مهند .. لكن خلاص وقت الضعف انتهى
التفت عليه وقلت بهدوء : ممكن ترجعني للفندق ترى مو مرتاحه الحين
طالعني وياليتني ماشفت عيونه .. دموع .. ! آخر شي تمنيت اشوفها بعيون مهند
الرجولة اللي قدامي تبكي والقوة تضعف والشموخ اللي في عيونه انكسر .. ليه يامهند ..؟ ليه تخليني اشوفك .. ؟ مااحب اشوف الرجال يبكي ..! مهما كان احس الرجال هو مصدر القوة والبكا ضعف .. حتى لو كان ضعف لمدة ثواني اسمه ضعف ..
قال : برجعك واسوي اللي تبغينه من اليوم ورايح ... انا مااستاهلك ..
ماعلقت على كلامه احسني ابغى استفرغ .. حسيت ان جسمي يرتجف وراسي يلف فيني .. ودموعي تنزل اكثر واكثر واكثر ..
دقايق وكنا عند الفندق .. طالعته بتأكد هالمرة اني اللي شفته بعيونه دموع ولا من كثرة دموعي صار يتهيأ لي اني شفت في عيون مهند دموع .. التفت لي على طول كأنه ينتظرني اقول شي اوووه الحمد لله ماشفت بعيونه دموع زي قبل شوي .. تأكدت ان مهند قوي ويقدر يكبت ويداري ويتحمل .. اكيد هو مهموم بس مايبين ولا يعبر بالدموع والبكا مثلي ..
قلت اتحجج بعد ماطالعت بعيونه : ممكن تخليني لوحدي ..؟
: لا مو ممكن بنزل معاك اساعدك يدك لاتحركينها مو كويس ..
طنشته ونزلت ورحت قبله الين وصلت باب الجناح قعدت انتظره الين وصلني وفتح لي الباب ..
على طول دخلت بسرعه ورميت الحجاب حقي على التسريحه بدون اهتمام ورميت نفسي على السرير ... نفسي ابكي اكثر بس والله تعبت .. نفسيتي تعبانه وانا مليت بجد مليت .. وبكا قرفني .. وشكلي تشوه انطمست معالم وجهي من كثر البكا .. عيوني منفخة وخشمي احمر ومورم .. وشفايفي احسها حمرا ومنفوخه .. حتى اذاني صايرة حمرا ..
جلس مهند عندي ومسك يدي اليمين وبسرعه سحبتها منه .. قال : ديمه بخليك الليلة ماراح اكلمك بس بكرة لي معاك كلام طويل .. خلينا نصفي النفوس ونبدا صفحة جديدة ..
مارديت عليه ومااعطاني فرصة اصلاً لأنه سحب نفسه وخرج برا ..
يومين ثلاثه .. اسبوع .. مافتح معاي أي موضوع وماكنت اشوفه اصلاً الا قليل كان يجي ويسألني اكلت ولا لا وانا اهز راسي ولا اقول مالي نفس .. ويسألني كيف يدي واذا احس فيها بألم او لا .. كنت في البداية احس بألم بس بعد اربعه ايام حسيته خف والحين اختفى الحمد لله .. بس الجبس يضايقني احسه مقيدني لكن يالله هانت صبرت على اللي اقوى من الكسر وتحمل الجبس .. باقي اسبوع ولا اسبوعين وافكه المشكله انو باين انا ماراح نرجع الا بعد ماافك الجبس .. الله يعين بس ..!
:: ::
يـــــــــــــــتبـــــــــــع
:: ::