اشكي عذابي للرموش المظاليل = ويضحك على شكواي ناعس هدبها
ويقول لي شفت الجمال المحاميل = لامن رغت ترغي غصب من تعبها
ياللي تجر الصوت خل المواويل = جنب مرابعها .. وجنب عربها
وش عاد .. لو قربت منك المعاميل = دامك تبهرها وغيرك شربها
لصار ما تردم عليك الغرابيل = ونار المحبه مستعر بك لهبها
لا تفتن السالي بسحر الاقاويل = وجنب عيوني لا تطول عتبها
واغنم حياتك في الذكر والتهاليل = تكسب حياتن كلنا نحلم ابها
وان زان في وقت الربيع المحاويل = والبل طربها شخص يتبع طربها
فـلا جيت روضن خظبته الهماليل = والطافحة فزيت تبغا تحلبها
وذكرت فضل الله منشي المخاييل = وذكرت غلطاتك وقمت تحسبها
وعفت الحليب وعفت حتى التعاليل = وفاضت عيونك غصب قبل تغصبها
وعفت العيون ام الجفون المكاحيل = بشر عيونك خير في منقلبها
قلت اشكرك يا رمش سودن مظاليل = لك فضة البوح وألنا.. ذهبها