تابع>>
تلعثمت الكلمات في فمها ومن القهر : انت حقير
سعد رد عليها بكف خلاها تسكت ودموعها تنزل : مابي اسمع منك ولا كلمه ولا تطلعين من هالغرفه فااهمه
طلع وصفق الباب وراه تركها منهاره وتجمع بجروحها وكرامتها اللي انهانت
ندمت على اليوم اللي فكرت فيه انها تطلع مع حسين لأنه اهو السبب بكل اللي صار لها..
كرهته من كثر ما يتصل عليها ولا تركها بحالها من جد وقح..
سمعت جوالها يرن قامت بسرعه ودها تسمع صوت اختها عشان تشكي حالها لها
تغيرت ملامح وجهها لما شافت الرقم ردت بصوت كله صياح وعصبيه
مشاعل بعصبيه: وش تبي انت وش تبي
حسين بخوف: شعووله وش فيك تبكين
مشاعل بعصبيه اكثر: قلتلك وش تبي مني انا كل اللي فيه بسببك
حسين مو فاهم شي من اللي جالس ينقال : وش تقولين وش سببه وش سويت انا؟؟!@
مشاعل بصياح: انا تزوجت بالغصب والسبب انت يالتني ما طلعت معاك ياليت كان انا بحال غير حالي
حسين بدى يستوعب:تزوجتي!!
مشاعل بصراخ: ايه تزوجت من ذاك اليوم الزفت النحس اللي طلعت فيه معاك وتزوجني هذااا اللي ما عنده احساس ولا دم
حسين بصدمه: تزوجك على طول !!
مشاعل بدت تهدى: ايه تزوجني وانا معاه
حسين : يعني رحتي من يدي
مشاعل مو رايقه لأفلامه: رحت والا ما رحت خلاص ياحسين انساني انا متزوجه الحين خلاص انسى كل اللي بيني وبينك
حسين بصوت مخنوق: بهالسهوله تقولين انساني وانسى كل اللي بيننا انا يا مشاعل احبك
مشاعل :................
حسين بعصبيه: وشلون تقولين لي انساني وليش ما تردين وين كلامك لي قبل وين حبك لي كل هذا نسيتيه بهالسهوله
مشاعل كانت ترد عليه بسكوتها اللي يزيد عصبيه حسين عمرها ما سمعته معصب بهالدرجه تأكدت انه كلامه كله صدق وانه ما كان يلعب معاها وكان حبه لها صادق..
حسين بحزن : تكفين يا مشاعل لا تهدين اللي بيني وبينك بهالسهوله انا بتحدى الكل عشان اوصلك تكفين يا مشاعل
مشاعل اول مره تحس بالذنب لما تترك واحد تعودت انها تتركهم بدون أي احساس وبسهوله
يمكن لانها كانت متأكده ان حبهم مجرد كلام اول مره تحس بصدق مشاعر شخص بالنسبه لها وهالشي ضايقها وحسسها بأنها ما تستاهل الحب من أي شخص ..
حسين تعب من سكوتها وعرف ان سكوتها دليل رفضها له تكلم اخر كلمه لعله يرد جزء من كرامتها اللي انهانت...
حسين بجديه غريبه : خلاص يا مشاعل مو انا اللي خسرتك انتي اللي خسرتيني انا كنت مستعد احارب هالكون كله عشانك بس صرتي صدق ما تستاهلين الحب اللي كنت احمله بقلبي لك وانا الحين حسيت بقيمه اميره اللي ضيعتها من يدي عشان وحده مثلك وحده ما تستاهل بس اااخ وش يفيد الندم الحين لو ترضى اميره ترجع لي لأولع لها اصابعي شمع بس عشان ترضى
انسي انك عرفتيني وامسحي اسم حسين من قاموس حياتك
وسكر السماعه عشان ما يسمع ردها..
شالت السماعه بصعوبه من اذنها تتقبل واقعها الجديد ..
خلاص حسين وطلع من حياتها وما بقى لها الا سعد تتمسك بأي امل انها تبعد عنه عشانه وعشانها لان حياتهم مع بعض راح تكون كلها احزان في احزان..
قطع افكارها دخله سعد بقوووه للغرفه..
جلست ترتجف من شافت ملامح وجهه اكيد سمعها وهالمره راح تكون نهايتها على يده ومافي احد ممكن يحميها من غضبه البيت اللي كانت فيه اهانتها اهون عليها من اهانتها في بيت ما تملك فيه ولا شي..
سعد راح للسرير اللي اهي كانت جالسه عليه وسحب غترته من عليه وصل للباب وقبل ما يطلع..
لف عليها بجديه قال: جهزي نفسك اليوم بنسافر
طلع وخبط الباب بقوه..
مشاعل دار في عقلها مليون فكره معقوله بيوديني شهر عسل والحين بعد وين بروح
مشاعل "ههههههه مجنونه انتي أي شهر عسل الله يخليك انا مو وجه شهر عسل الله يستر ما يكون ورى هالسفره شي بس وجهه يأكد انه سمعني يارب استر علي لو سمعني ما اتوقع بكون عايشه لحد الحين"
جلست حاضنه مفرشها مثل طفله ضايعه لحد ماراحت في النوم..
&&&&&&&&&في الصاله&&
حط الغتره على كتفه وجلس مع امه اللي جالسه تتقهوى...
ام سعد واهي تصب له فنجال قهوه: وين مرتك؟؟!@
سعد واهو يتنهد: تركتها في الغرفه
ام سعد بعصبيه: وليش يعني ما تبي تنزل تشوفني والا تجلس معي والا ايش
سعد ماله خلق: يمه الله يهديك بتطفشين منها بس خليها على الاقل تغير ملابسها
كمل : يمه انا بسافر اليوم
ام سعد بدهشه: وين بتروح؟؟
سعد: عبد الله يبيني اروح واشوف فرع الشركه اللي هناك خلاص بنصفي كل شي في الدمام عشان بنحصر شغلنا في الرياض بس
ام سعد بستغراب:ليش تسكر فرع ابوك هذاك اهو اللي ماسكه الله يرحمه ليش تسكرونه
سعد بضيقه: يمه حال الشركه ما يسر لا عدو ولا صديق ومن خساره لخساره ولازم نحاول نقلل الخساير على قد ما نقدر لحد ما نشوف حل لكل المشاكل اللي تجينا وما نعرف مصدرها
ام سعد بضيق: خلاص شف اللي فيه خير سوه وكم بتجلس من يوم؟؟
سعد : يعني ثلاث ايام اربعه بالكثير وراجع ان شاء الله
ام سعد: الله يستر عليك ياولدي انتبه لاتسرع
سعد واهو يحب راسها: ان شاء الله تامرين على شي
ام سعد: وين بتروح بعد؟!!@
سعد: عندي موعد مهم مع الشباب وماراح اتأخر مع السلامه
dيتبع>>>>>>>>>