|
(سلسلة) حكـاوى هنــداوى
:z15:
أخوانى الأعزاء أقدم لكم هذه السلسلة من الحكاوى الهنداوية فى حلقات متوالية ..وعذراً انها بالعامية لأن بطلها الفلاح الفصيح هنداوى لا يتكلم الفصحى بطلاقة وإن كان يتحدث فى كل شئ..!! والموضوع جد الجد..وإن كان يأخذ طابع الهزل :wed a3: ..فمثلما يقال شر البلية ما يضحك..!! أرجو أن تحوذ أعجابكم..وتعينونى على استكمال باقى الحلقات.. :wed24: إن كان فى العمر بقية حكـاوى هنـداوى السلطة فى خدمة الشعب ..ولم تكن يوماً أداةً للقهر..والديمقراطية الحقة هى أن يُحكم الشعب بالشعب ..وللشعب..لا لمصلحة الفرد..!! أو فئة معينة..؟؟ وربما هذا ماجعلنا نرفض الملكية ونظام الطبقية..وهذا أيضاً ما جعلنا نثور على الظلم والطغيان ..والفساد واستعباد العباد. فما يحدث الآن فى هذا الزمان نوع آخر من الإستبداد والإستغلال..والإستخفاف بعقول الناس..نوع آخر من التعميه والبلطجة..وفرض الرأى بالقوة..وبالمال ..وبالإحتيال فى الكثير من الأحيان..!! وإليكم قصة الفلاح الفصيح (هنداوى) عندما سأله أحد مراسلى الصحف عن أبن بلدته(فرحات البنهاوى) فأجاب قائلاً : - إهيييه..!! بقى أنتم ما تعرفوش فرحات باشا البنهاوى..؟!!ماسمعتوش أبداً عنه..؟!! أنتم مش من البلددى..؟!!باينكم مش م البلددى..!! عشان كده منتوش عارفين فرحات باشا. واستطرد قائلاً - دون أن يسأله أحد- : - دا عين أعيان بلدنا..لأ مركزنا..!! دا عضو مجلس الشعب عن الدايره بتاعتنا بقاله ييجي خمس ست مرات.. - ........................................؟! - لا لا..!! راجل البر والتقوى أيه..؟! إنتم باينكم فاكرينها زى الأفلام..!! هوا مش محتاج لكل ده..!!ولا يحتاج لدعايه للإنتخابات ولا لمؤتمرات خالص..!! دا كمان مش محتاج لنا ولا لأصواتنا..!! مهى رايحاله ريحاله..!! دا كمان بياخد أصوات جدودنا وجدود جدودنا إللى ماتوا وشبعوا موت ..وأسماء عيالنا إللى لسه منفطموش..!! المهم إن الكشوف تتملى أسماء..علشان المظاريف تتملى أوراق.. أوراق الإنتخابات..و بنكنوت كمان..!! وبعدين الأوراق تتملى بمعرفتهم هما..ولا يبهدلونا أحنا فى الحر ولا دياوله..!! -..........................؟! - مين همه..؟ إهييه..طبعاً ..أصل أنتم مش من هنا..!! دول الباشا المأمور والبيه الضابط وسعادة المستشار والعمده والغفره والفتوات بتوع البنهاوى باشا..!! - .........................!! - لا.. لا..أنا قصدى فرحات البنهاوى باشا..لأ.. أبوه عم مصطفى البنهاوى ماكنش باشا ولا حاجه..دا كان الله يرحمه كلاف مواشى فى الزريبه بتاعة العمده إللى فات.. -.................................................؟ آآآآآآه ..سألتنى أمال أبنه جاب الفلوس دى كلها منين..!! ماهو أصل فرحات باشا ده لا مؤاخذه.. كان حرامى مواشى..يهجم على أيوها زريبه فى عز الضهر..ولا حدش يقدر يقوله تلت التلاته كام..!! ههه مع أنها سهله ومش محتاجه حساب..أى والله..لكن الكل كان بيخاف منه..حكمن هوا كان جته..لأ متبصلوش دلوقتى لما كبر وعجّز..أيام لما كان شباب كان طول بعرض..وأيده دى تفصل تلاته زى حضراتكو كده..و لا مؤاخذه..أصلكم سفيفين شويه..لأ الحقيقه ..خالص..الصراحه حلوه..!! المهم مطولش عليكم ..كان بيمسك أجدعها نفر فى البلد ما يسبهوش إلا متكوم على الأرض..مافيهوش حته سليمه ..دا إذا مطلّعش روحه..!! إنما الحق يتقال ..أنه راجل طيب..ماهو الكدب خيبه..!! أى واحد يقصده فى شكلّه ولا تار بايت.. أو حاجه مسروقه ..مكنش يتأخر عنه..وبعدين يبقى يأخد الحلاوه.. -...............................................؟! - لا.. ما البوليس موجود وكل حاجه..واتقبض عليه كتير وهوا لسه صغير..لكن مكنش حد يقدر يشهد عليه..وكان بيتحبس له يوم وإلا اتنين ..بالكتير أوى شهر ..ويطلع لنا تانى..فمين عبيط إبن عبيطه..هيروح يشهد عليه..؟!! وإلا يكنش مجنون يعنى..!! بعدين هوا فضل لحد ما اتصاحب على البشوات الظباط وبقم سمن على عسل أبيض ..وبقه يروح يسهر معاهم ..وياخد معاه حاجات لزوم السهره..!! - .............................؟ - لا يأخى والعياذ بالله.. ماكنش بياخد غير شوية حشيش و بانجو..مخدرات أيه يا أخى..؟! هيا حصلت..!! وبعدين هما كان ناقصهم حاجه..؟! ما كل حاجه كانت تحت إيديهم..نصها يتقيد فى الدفاتر والنص التانى يمزجوا بيه نفسهم.. وبعدين لما يحبوا يبينوا الهمه فى الشغل.. يلموا شوية العيال إللى بيبيعو الصنف على ناصية الشوارع.. يقعدولهم سنه وإلا اتنين فى السجن -على الأقل يكونو ضمنوا أكله ونومه -..وبعدين يطلعوا تانى أشد م الأول.. ويكون طلع ألف غيرهم..!! ياعم أحنا مالنا ..خلينا فى موضوعنا..ماتخلناش نعِك فى الكلام..!! - ..........................؟! - بصمات أيه.. وفيش أيه إللى أنت جى تقول عليه..؟!! أنت عارف العسكرى بتاع الفيش بيقبض أد أيه..؟! أنت أديله بس ربع جنيه ..يحط بصمته هوا مكانك.. بدل ماتتعك أيدك بلك.. ومتتطلعش إلا بالجاز..!! - .............................................؟! - صفيحة سوابق أيه يا بيه..!! هوا حد فاكر هوا أكل أيه امبارح ..؟! دى حاجات بقالها ياما..والورق كلته الفيران من زمان.. وبعدين دا كان ف الأول .. وبعد كده ماعدش فرحات باشا بيعمل حاجه بأيده..!!راح اسنورد شوية فتوات مانعرفش جابهم منين...؟! هوا بس يشاور وهما إللى بيقوموا بالشغل كله..!! لحد ما بقى هوا الكل فى الكل فى النحيادى.. والنواحى إللى حواليها.. -.....................................؟ - ماتعرفش أيه يا بيه إللى طلع فى دماغه حكاية الإنتخابات دى..؟! مع أنه مكنش ناقصه حاجه..!!والشغل كان ماشى تمام وعال العال.. وكل سنه بيشترى فى أراضى.. طبعاً مش من هنا..!! لأن الأراضى إللى هنا هوا خدها كده عينى عينك بوضع اليد..لكن من النواحى إللى جنبنا ..وولاده فى أحسن الوظايف.. إللى وكيل نيابه.. واللى ظابط.. واللى دكتور.. وإللى مهندس.. وإللى متجوزه أبن البيه المأمور..واللى متجوزه العمده الجديد.. يعنى بقه مناسب الحكومه.. والحكومه مبسوطه منه آخر انبساط.. لأن محدش بيقدر يفتح بقه ويقول بم..!! وهيا عايزه أيه أكتر من كده..؟! وبعدين هوا مبيزعلهاش فى أيوها حاجه..!! وبيوافق على كل حاجه.. و مؤدب أخر أدب ..عمرنا مسمعناله صوت فى المجلس..!! مش زى الشويه المعارضين - الله يخرب بيتهم - ..كل شويه واقفين يزعقوا..مش مخليين حد من زمايلهم يرتاح شويه من دوشة العيال وأم العيال وينام..!! أهو كل واحد فيه من بلاويه إللى مكفيه.. ثم نظر لهم فجأة بإزدراء وقد احتقن وجهة ونفرت العروق على جانبى رقبته وصرخ فيهم مستنكراً: - وبعدين بقه يا أستاذ أنت وهوه..؟! أنتم بتخلونى ألبخ فى الكلام شويه..ودا مش حلو..إننا نعيب فى الناس الكمل دول.. دولهما كبرات البلد..هما والوزرا والبشوات الظباط والمحافظين ولعيبة الكورة والممثلين والرقصات..!! بصراحة دول ناس ذوق ذوق ..مايتخيروش عن حضراتكم..أى والله..!! - ......................................؟! أنتم لسه عايزين منى أيه بقه يأخوانا..؟!خلونى أروح أجرى بقة على أكل عيشى..يعنى لا مؤاخذه كده ..هتنفعونى يعنى..وألا هتنفعونى..؟! - ............................................... - الأنتخابات إللى فاتت..؟! والله يابيه ماعرفنا إن كان فيه انتخابات.. إلا لما سمعنا ضرب نار كتير قى البلد..!! وماحدش فينا اتصجر يطلع بره بيته..قلنا جايز فيه عيلتين بيصفوا الخلافات إللى بينهم..!! ولما لقينا الموضوع طوّل وفيه زغاريت نسوان.. قلنا جايز فيه فرح فى بيت العمده ولا حاجه..!! بعدها بيومين عرفنا إن البنهاوى باشا نجح فى الإنتخابات..لخامس مره ورا بعض..!! قمنا كلنا فرحنا إن ربنا نجاه ونصره على إللى عداه ..مع إن مكنش فيه حد من البلد نازل قصاده.. طب وكان لزومها أيه بقى الإنتخابات و المصاريف ع الفاضى..؟! مش كنا إحنا أولى بالفلوس دى..؟! وإلا أيه يا حضرات..؟! -..................................؟! - لأ..مافيش حاجة زى دى حصلت عندنا ..والحمد لله.. لكن طراطيش كلام سمعناه عن الدايره إللى جنبنا..!! لما فيه واحد تانى من الناس إللى بالك فيهم..؟! إللى دقنهم طويله ومدلدله..كان مرشح نفسه ضد كبير البلد.. وقامت عركه مبعدهاش عركه.. والدم كان فيها للركب.. والصناديق إنحرقت وإترمت فى الترعه.. وعادوا الإنتخابات من تانى..!! إنما والحق يا بيه ..فى المره التانيه ماحدش سمعلهم صوت..؟!والأمن كان مستبد والحمد لله..!! وفجأة نظر إليهم متعجباً وكأنه يراهم لأول مره وسألهم: - أنما أنتم مين..؟! وبتسألوا كل الأسئلة دى ليه..؟! -................................................ - آآآآآآآآه قلتلى بقه..!! أنتوا بتوع الجرانين إللى بتيجى عند الواد أسماعين البقال.. وبيعملها قراطيس لب وفول للعيال..!! والنبى يابيه تكلمولنا ريّسكوا..يبطل يجيب الحبر المضروب بتاعه ده علشان بيهبب هدوم العيال وبيطلع كده فى الأيدين عمال على بطال و بيتبت فيها وما بيطلعش منها ولا بالطبل البلدى ..!! - .............................................؟ - أحنا ما بنعرفش أيوتها أخبار .. إلا من إللى بيجيبوه لنا فى الراديو والتلفزيون بتاع الحج عب عال..إللى دايما بيفتحه لنا على خطاب الريس فى عيد العمال.. والناس كلها تسقف عشان المنحه..مع إننا ماحنش عمال..ولا بينوبنا منها سحتوت ولا ريال.. وسمعنا طراطيش كلام أنها اتلغت كمان..!! طب ليه يا بيه..؟! ماهى كانت بتفرج ع الموظفين الغلابه..وأكيد كانوا هيفرجوها علينا أحنا كمان..!! -...................................... - والناس الأمريكان مالنا بيهم..؟! دول ناس ملهمش أمان ..ممكن فى أى لحظه يبيعونا زى الخرفان.. ويخدونا لحم ويرمونا عضام.. والناس بتوع الشيشان ..متشفولهم حل وتحوشوا عنهم الروس ولاد المجوس دول..!! وألا يعنى الحكايه عافيه وألا هى عافيه..؟!واليهود مش أحنا أدنالهم قبل كده علقه مكلهاش حمار ف مطلع..؟! أمال طالعين فيها ليه اليومين دول..؟! ومافيش حد عارف يكلمهم..والعالم كله بيبوس أيديهم..عشان يراضيهم..وهما راسهم وألف سيف ماهم طالعين من فلسطين..يعنى البيت بيت أبونا والغرب بيطردونا..هما يقربوا لفرحات باشا البنهاوى ولا أيه يا بيه..؟! -.........................؟ - أنا محسوبك هنداوى.. وصابر على البلاوى ربنا يعافينا ويعافيك والكل كليله.. -.................... - أنت بتكتب أيه..؟! طب أنا أسمى مكتوب..؟! -...!! - طيب..!! انتظرونا فى الحلقة الجايه |
جِئتُ هُنَّا لِـ أسْتَّمتِع وَمَّا زِلتُ أُتَابِع ... لِـ التثبيِّتْ |
حكاوى هنداوى (2) تبدل الحال مع أخينا (هنداوى ) منذ ذلك اليوم الذى نشر فيه حديثه مع مراسلى الصحف فى أحدى جرائد المعارضة.. وقرأه بعض المثقفين من أبناء القرية - فى تلك الجرائد التى تأتى عند (أبو اسماعين) البقال- وأشادو به..!! وعرفه (هنداوى) فى الحال على الرغم من عدم ذكر أسمه فى المقال .. كما سبق واتفق معهم – ظناً منه أنه سيأمن شر بلطجية الباشا (فرحات البنهاوى) وأنه لن يقع فى قبضة أيدى وأرجل وعصى الخفراء التابعين للعمدة زوج بنت فرحات باشا البنهاوى..!!- فشعر كما لو أنه من المناضلين الوطنين ومن محررى البلاد من الإستعمار وتقمص دور الثوار الكبار..وأصبح يتحدث - بادئ الأمر فى الخفاء- فى كل شىء وعن أى شىء فى جلسته اليومية ساعة المغربية على المصطبة القبلية فى داره الطينية.. حتى أنه ذات يوما هتف قائلاً : - الإستقلال التام أو الموت الزوءام ..!! ...على الرغم من أنه لا يعرف ماذا يعنيه الزوءام..؟! ..إلى أن تناقلت أخباره عن طريق الجواسيس والمخبرين .. وتم اعتقاله عدة مرات .. وقام بلطجية فرحات باشا والخفراء بسحله وضربه بالشوم على رأسه حتى أصيب بالتربنة ..إلا أنه لم يتوقف عن الكلام حتى فى الملأ .. وظن الناس أنه أصيب بلوثة عقلية.. ويأس منه العمده وأعوان فرحات باشا.. فتركوه لحال سبيله.. بعد أن شاع عنه أنه أصبح من مجاذيب القرية.. ولم يعد أحد يلقى لحديثه بالا ً.. إلا القلة القليلة الذين ضاق بهم أيضاً الحال..!! .. دعونا نذهب الآن ونتنصت على أخونا (هنداوى) وهو جالس فى الإستراحة.. على المصطبة ساعى العصارى - هو وبعض الأهالى- يتحدث بصراحة..؟! - يأخونا أحنا لازم نعمل حاجه .. هنفضل ساكتين لأمتى..؟! لحد ما الدور ييجى علينا..؟! والدوده تأكل أراضينا..!! وتخرب بيوتنا.. أحنا لازم نقاوم الدوده فى كل حته..!! قاطعه أحد الفلاحين النبهاء وسأله بصوت عال: - أنت بتخرف بتقول أيه يا هنداوى.. دودة أيه وهبل أيه .. هو أحنا حتى فكرنا نزرع قطن خالص..؟! ما الدوده كلته من زمان وبقالنا سنين يامه عايشين فى خراب..!! تأفف هنداوى ونظر إليه بإزدراء وقال له بنفاذ صبر: - أسكت ياد يا عوضين ..ماهو اللى ما يعرفش يقول عدس..!! ياد ماهو كله منفد على بعضه.. ماهما إللى عايزنّا نعيش دايماً محتاجين .. ومادين لهم أدينا الأتنين ..هما إللى جابو لنا الدوده.. وإللى بتعمله الدوده فى أراضينا ..بيعملوه هما فينا..؟! ثم اردف قائلاً وهو ينظر إليه معاتباً ويضربه على رأسه : - يا واد أفهم ومتجبلناش مصيبه وتخلينا نعك فى الكلام..!! ... بان على (عوضين) الجد وهو يحك رأسه .. و إن كان لم يظهر على وجه أى من ملامح الفهم ..!! استطرد هنداوى قائلاً: - المهم يا أخونا نرجع لمرجعونا..أحنا لازم يكون لنا صوت ونخلى كبرات البلد يسمعولنا..ونطالب بحقوقنا وحقوق ولادنا..!! ...أصوات همهمة وتساؤل من الجموع القليلة..!! فأشار إليهم هنداوى بيديه مهدئأ وقال مفسراً: أحنا لازم نطالب بصرف التقاوى والكيماوى من الجمعية..لكن بلاش المبيد خليه لهم..!! كمنى سمعت طراطيش كلام أنه مستورد من عند اليهود (الله يخرب بيتهم فى كل زمان ومكان) ودول أولاد ملاعين ..أكيد مدبرين لنا مغرز متين..ولا حاطين لنا فيه إشعاع..علشان يجيبلنا المرض والعياذ بالله. ...علت أصوات الفلاحين بالإستعاذه من الشيطان الرجيم وقال بعضهم: - يا سابل الستر يارب..ألطف بينا يا لطيف!! وقف أحد الفلاحين الجالسين على الأرض وسأل: - طب ما نطلب من فرحات باشا يكلم لنا الوزير يجبلنا رش نضيف..!! ضحك (هنداوى) كثيراً حتى بانت أسنانه المخلوعة – من أثر الضرب الذى تلاقاه فى السابق على أيدى بلطجية (فرحات باشا) وخفراء العمدة- وكاد يسقط على الأرض من كثرة الغلب وقال: - أهييييه..!! أنت بينك مش فى الدنيادى ولا بينك مش من النحيادى..أنت اتهبشت فى مخك ياد ياسماعين..؟! يعنى أنت مش عارف مين إللى بيستورد المبيد من اليهود..!! وبعدين هوا فين فرحات باشا ده .. هوه حد فينا شافه من سنين..!! وكمان سمعت طراطيش كلام من التلفزيون بتاع قهوة الحاج عبد العال.. إن الإنتخابات خلاص على الأبواب .. وأكيد هوه مشغول فى ترتيبها مع الكبار..!! قاطعه أحدهم مرة أخرى قائلاً: - لكن أنا سمعت من الواد علوان البواب بتاع سراية الباشا فرحات أن كمال بيه أبنه هوه إللى هينزل فالإنتخابات السنادى .. حكمن فرحات باشا صحته ماعدتش مساعداه..أصله ماعدش بيسمع كويس.. ولسانه تقل وفيه ناس شافوه فى التلفزيون بيقولو أنه عنده شلل والعياذ بالله.. وماعدش حتى بيقدر يرفع ايده فى المجلس..!! ..أسقط فى يد (هنداوى) وذم شفتيه ورفع حاجبيه فى استغراب وقال فى الحال: - الكلام ده بجد ياد يا حسنين..؟! ..ابتسم( حسنين) بفخر عند سماع أسمه.. لكنه نظر حوله فى خوف .. وهز رأسه مجيباً بإيماءه..!! .. فمصمص (هنداوى) شفتيه وقال بنبرة يائسة: - ما أسخم من سيدى إلا إبن سيدى..!! ياعنى الإبن هيطلع من جلبية أبوه..؟! ..واستطرد قائلاً فى أسى: - ربنا يصبر أصحاب البلاوى .. ويجعله عامر. إلى اللقاء فى الحلقة القادمة من حكاوى هنداوى إن شاء الله..وربنا يستر |
استاذى
أشرف محمد كمال للابداع عنوان ولرونق حرفك ضوء لا ينتهي انا من المتابعين دمت بكل الخير اختك نقطة العطر |
حكاوى هنداوى (3) ...جلس (هنداوى) ساعة العصارى تحت الشجرة مع( بسنت) الجاموسه .. يرتاحان ويأخذان القيلولة.. بعدما تعبا من كثرة اللف والدوران فى الساقية.. وقرر أن يصنع كوباً من الشاى علشان يضبط دماغة ويبتدى يحلى الكلام .. فجمع أعواد الحطب وأوقد النار.. وقال موجهاً حديثه لـ(بسنت): - يعنى انت فكرك ليه كمال بيه أبن فرحات باشا.. اختار يعمل فرحه فى عيد العمال..؟! يمكن علشان الأنتخابات على الأبواب..!! ولا يكنش عشان يفرجها على الناس الغلابه ويهيصوا وياكلو لحمه ويدعوله إن ربنا ينجح مقصده ويديله على قد نيته وينصره على أعاديه. ...نفرت الجاموسه وأرادت النهوض..فاستوقفها (هنداوى) قائلاً : - بس..بس خلاص متزعليش نفسك ..والله انا ماكان قصدى أزعلك..؟!ماهو اكيد هيدبح دبايح يامه فى الفرح.. وهيعمل فرح من بتوع الف ليله وليله وهيقيم الأفراح والليالى الملاح..يعنى هو هيدفع حاجه من جيب أبوه..!! ماهو كل كبرات البلد هينقطوه وهيقوموا بالواجب هو حد فيهم يصجر ما يروحش الفرح ويقدم فروض الولاء والطاعة.. دا كان يروح ورا الشمس..؟! ...هزت الجاموسه رأسها وكأنها تتعجب مما يقول ثم وكأنها تتوعده.. فبان عليه الجد وقال وهو يرشف الشاى بتلذذ ويرفع حاجبيه: - أيوه معاكى حق .. برضه الواحد مش مفروض يعك فى الكلام.. دول هما كبرات البلد ويخرب بيت اللى يزعلهم ولا يجيب سيرتهم بأيوتها كلام..!! واستطرد قائلا : - بس يعنى أيه لزوم المصاريف الكتيره دى وبعزقه الفلوس على الفاضى مش كان أولى بيه.. يديها صدقه للغلابه.. يفكرهم بأيام زمان بتاعة منحه عيد العمال..أهى كانت بتفرج على الناس.. ولا يديهم شويه رز ولا كيلتين قمح..أهوه أى حاجه تنفع والسلام..!! ..ورشف رشفة كبيرة من الشاى ثانية وقال: - ولا يكنش هيجيب البتاع ده اللى بيقولو عليه جاتوه ..!! حكمن أنا ماليش فيه..!! ..مابحبوش كده لله ف لله..؟! بيموع نفسى كده ..وبيخلينى قرفان..!! يمكن عشان الواحد مش متعود عليه..؟! مع أنى بشوفهم بياكلوه يامه فى الأفلام اللى بتيجى فى التلفزيون عند قهوة الواد عبدالعال..ولا بيجرالهم أيوها حاجه..؟! ثم ضحك فجأة..حتى بانت أسنانه المخلوعة وقال: - أنا قاعد بكلمك فى أيه..تلاقيكى ولا فاهمه حاجه..؟! .. فهزت الجاموسه رأسها فى غضب وأرادت أن تركض مبتعده فجذبها من الحبل وقال محدثاً أياها : - خلاص خلاص متتحمقيش كده.. مأنت زى حلاتى يعنى كنت شفتى الجاتوه فين..؟! وفجأة سمعا دوى طلقات الرصاص فى الهواء.. فهمّ (هنداوى) مسرعاً وهو يجر الجاموسه قائلاً : - يالـّه بينا يا بسنت دا زمان الحفله بدأت..خلينا نلحق ندوق اللحمه..!! ثم استدرك معتذراً: - لا مؤاخذه من غير زعل يعنى..!! قابله فى الطريق( سعداوى) أحد بلطجية (فرحات باشا البنهاوى) .. فارتعدت فرائصة حينما تذكر الضرب الذى تلقاه فى العام الماضى على يديه .. وحاول الإبتعاد عن طريقه لكنه استوقفه قائلاً: - أنت رايح فين ياد يا هنداوى..؟! تلعثمت الكلمات فى فمه ونطق بصوت مبحوح : - أنا رايح فرح كمال بيه..؟! فقال (سعداوى) بصوت جهورى: - ودى أيه اللى فى أيدك دى يا هنداوى!! حاول أخفائها بجسده الضئيل حتى لا يراها (سعداوى) قائلاً فى توسل: - دى الجاموسه اللى حيلتى..!! ضحك (سعداوى) وفرك يديه وقال فى تهكم: - ودى جايبها تنقط بيها كمال بيه..؟! أسقط فى يد هنداوى.. وكاد يسقط مغشياً عليه وتحشرج صوته ولم يستطع النطق.. فقد سبق السيف العزل ..ونفذ السهم. ...مد (سعداوى) يديه القويتين وجذب الحبل من يد (هنداوى) وهو مستميت عليه وقال ساخراً: - هديه مقبوله منك يا هنداوى وعقبال ما نجيلك فى الأفراح..!! وسار مبتعدا وهو يجر(بسنت) وهى تحاول رفسه وركله وهو يجذبها بعنف وقسوه.. بينما تهاوى (هنداوى) على الأرض ذاهلاً ..وظل هكذا إلى أن غربت الشمس..!! ...فرحت القرية جميعها وأكلت اللحم.. إلا (هنداوى)..؟! فلم يذق طعمه.. أنما صار يجرى فى شوارع القرية .. يهتف قائلا: - آآآخر الكلام ..أخدونا لحم ورمونا عضام..!! - آآآخر الكلام ..أخدونا لحم ورمونا عضام..!! |
حكـاوى هنـداوى (4) ..أختفى (هنداوى) من القرية بعد حادثة اغتيال الجاموسه.. وظن البعض أنه هرب من البلد وآخرين توقعوا أن يكون نزيلاً بمستشفى المجانين.. إلا أن هذا المسكين لم يكن هنا أو هناك..؟! وسريعا ماتناسى الجميع أخبار (هنداوى) وسر إختفائه وانشغلوا فى السعى وراء لقمة عيش تسد أفواه أولادهم الجائعة.. باستثناء طبعاً أولاد (هنداوى)..(مصراوى) و(عرباوى) و إبنته (سوريا) الذين أخذوا يبحثون جادين عن أبيهم وعائلهم الوحيد.. فسألوا عنه فى المستشفيات وأقسام البوليس.. بل وفى القرى المجاورة إلا أنهم لم يعرفوا له طريق جره..؟! ..فعلقوا صورته وهو يرتدى الجبة والقفطان ويربط رأسه بالمنديل (ابو أويه).. فى كل المساجد وعلى الحيطان.. وأعمدة الأناره.. حتى ظن بعض السذج والذين لا يعرفون القراءة من أهل القرية ..أن (هنداوى) قد رشح نفسه فى الإنتخابات أمام كبير البلد الجديد (كمال باشا البنهاوى)..وأخذو يضربون كفاً بكف..!! ...أما (هنداوى) فلا يتذكر ماذا حدث له فى ذلك اليوم.. فآخر ما يتذكره أنه كان يسير فى طرقات القرية متوجها إلى حقله كعادته بعد شروق الشمس .. و فجأةً تلقى ضربة على أم رأسه جعلته يرى النجوم فى عز الظهر..أو ربما كانت تلك النجوم على كتف أحدهم..؟! ..وبعد فترة ليست بالوجيزة أفاق.. فوجد نفسه ملقى على وجهه فى أحد تلك الغرف الأسمنتية سيئة التهوية حيث رائحة العفن والرطوبة مستشرية..أو ربما كانت رائحة أشياء أخرى اكتشفها فيما بعد..؟! صرخ (هنداوى) وهو يدق على الباب الحديدى الصدئ : - ياأخونا ياللى هنا..!! ياجاى ياهو..حد يعبرنا ..!! ويفهمنى أنا ايه اللى جابنى هنا..؟!! وما من مجيب..طال به الإنتظار ..حتى قرصه الجوع والعطش وضربه اليأس وتملكه الملل فأخذ يستصرخهم بصوت عال: - يا هلاله ياللى هنا.. يا مسلمين يا موحدين ..!! حد يشوف لنا لقمه ولا شربة ميه..أنا مادقتش الزاد من صبحية ربنا..؟! طال به الإنتظار ..وأحس بأن ذاك المغص لم يعد من الجوع وفقط..؟! فناداهم وما من مجيب أيضا فأختار ركنا قصياً وأفرغ فيه همومه.. واكتشف عندها أنه لم يكن اول من اكتشف ذلك الملجأ..!! أخذ (هنداوى) يحدث نفسه قائلاً: - الله تفتكر أنت فين ياد يا هنداوى..؟! ده لا هوا دوار العمده ولا سجن النقطة ولا حتى أودة الكرار فى سراية فرحات باشا..!! أنت بينك اتخطفت زى الناس بتوع العراق..؟! ثم أستطرد قائلاً: - طب اللى خطفونى هيعملوا بيا ايه..؟! دانا لا حيلتى سحتوت ولا جنيه..!! دا حتى الجاموسه اللى حيلتى..خدوها..؟! ثم نظر حوله متلفتاً فى خوف قائلا: - خدوها ولاد الحلال ..ربنا يسامحهم..!! فُـُتح الباب فجأه ودخل رجل يرتدى ملابس مدنية وجذبه من ملابسه ..وقال له بلهجة أمره: - تعالى كلم ساعدة الباشا..!! وأردف ذلك بصفعة على قفاه..فظن عندها (هنداوى) بأن هذا أحد بلطجية (فرحات باشا البنهاوى)..لكنه سريعا ما خاب توقعة عندما وجد نفسه فى أحد المكاتب التى يبدو عليها أنها حكوميه .. ووجد هناك شاباً فى العشرينات من سن أصغر اولاده يجلس على أحد المقاعد الجلدية الدواره وهو مولياً إليه ظهره وممسكا فى يده مضرباً للذباب: - أنت عايز تقلب نظام الحكم ليه ياد يا هنداوى..؟! أسقط فى يد (هنداوى) وأرتجفت أوصاله وتلعثمت كلماته وقال فى دهشة بتردد: - أنا ياباشا..؟! نظام الحححكم..!!! قاطعة ذاك الشاب قائلاً : - أنت هتستعبط زى كل اللى بيجوا هنا وهتعملى فيها عبيط وماتعرفش اى حاجه..!! أجابه مستعطفا: - ياباشا انا ماعرفش أيتها حاجه والله..!! وحتى الجاموسه بتاعتى مش عايزها وأنا مسامح فرحات باشا خليه يتهنى بيها..؟! صفعة الضابط على وجهة- هنا فقط تأكد لديه الآن أن هذه الصفعة لضابط مدرب ..وأنه فى تحقيق أو فى مصيبة حقيقية- وهتف بنفاذ صبر: - جاموسة أيه وفرحات مين..أنا بكلمك عن التنظيم السرى إللى أنت زعيمه علشان تقلبوا نظام الحكم وكل المستندات والتسجيلات موجوده هنا بالصوت والصوره..دى قضية أمن دوله..؟! لطم (هنداوى) على خديه..وسقط على الآرض قائلا: - ياسنتك السوده يا هنداوى قضية أيه..؟! أمن دوله..!! دا أنا طول عمرى ياباشا ماشى جنب الحيط.. وكافى خيرى شرى وماليش فى السياسه .. دا أنا حتى بخاف أصلى الجمعة فى الجامع ليقولو عليه أرهابى..!! ومن كتر حبى فى مصر .. سميت أبنى البكرى مصراوى.. ولما جت النكسة سميت بنتى اللى ماتت وكسه لكن اهوه ربنا افتكرها وارتاحت وقعدت فى الجيش سبع سنين وحاربت مع اللى حاربو فى 73 ..ومن غيظى خنقت عسكرى أسرائيلى بأيديا دول ..دا حتى عضنى فى أيدي وسايبه لحد دلوقتى علامه ..!! ولما قالوا ياسلام.. قلت سلام سلام وماله..؟! مدام هنرجع كل اللى راح..مع إن اليهود طول عمرهم ملهمش أمان..!! وفضلت كل السنين دى راضى وقانع وصابر وبحمد ربنا وببوس ايدى وش وضهر أنى بلاقى لقمه أكولها.. وهدمه ألبسها.. وباب أقفله عليا آخر النهار.. ولحد دلوقتى كل شىء تطلبه منى الحكومه.. أقول آميين..!! دا حتى اليومين دول أنا ماعرفش مين هما الحكام ..؟! أنا ما اعرفش غير فرحات باشا البنهاوى ..وأن كنت زعلته فى حاجه أحب على راسه وأستسمحه دا هو كبيرنا برضه والعين ماتعلاش ع الحاجب.. ويعنى هيجيلنا حد احسن منه..؟!على رأى المثل جنى تعرفه أحسن من جنى ماتعرفوش..!!وجارك السو أصبر عليه ليرحل لتجيله مصيبه تاخده..!! وانتظرونا فى الحلقة الجايه إن كان للعمر بقيه |
السلام عليكم ورحمة الله وبركاته،،،
يعطيك العافيه ع الطرح المميز والقيم،، تقبل مروري مع خالص تحياتي،، ودمتم روبي |
حكـاوى هنداوى (5) استمرت التحقيقات مع (هنداوى) لعدة أسابيع لم يذق فيها طعم النوم..ومارس معه الضباط والمتطوعين من السادة المخبرين السريين.. أشد أنواع التعذيب والتنكيل- الغير خافية على أحد- حتى يظن المرء.. أنه فى سجن أبو غريب..!! أو أنه أحد الأسرى المصريين فى 67..إلى أن أضطر فى آخر الأمر.. وتحت وطأة التهديد وحتى لا يفقد أعز ما يملك..- حياته بالطبع..!!- الإعتراف بكل ما أملوه عليه.. وبأنه قائد التنظيم السرى لقلب نظام الحكم ..ومسؤول الجناح العسكرى..الذى كان يخطط للعديد من العمليات الإرهابيه فى طابا ونويبع ودهب والغردقة والأقصر وشرم الشيخ..وهنا اعترض (هنداوى): - لأ يا أخوانا كله.. إلا شرم الشيخ.. بلاش نغلط فى الناس الكبّاره دول..؟! هنا سرت دفعة جديده من الكهرباء..داخل جسده جعلته ينتفض فى قوه حتى كاد يطير عقله أو تسقط باقى أسنانه..!! فهتف صارخاً: - خلاص شرم ..شرم هى كانت بتاعة أبونا..؟! هدأت الأحوال بعد ذلك الإعتراف ..وانصلحت الأوضاع مع (هنداوى).. وبدأ يعتاد الوضع الجديد ويتأقلم معه - كعاده كل المصريين الذين يتكيفون مع كافة الظروف..؟!- وبعد فترة قليلة نقلوه إلى سجن أخر..أكثر إتساعا وأكثر زنازيناً وبدأ يتعرف على بعض النزلاء ويمارس هوايته.. إلا وهى الكلام..!! وفرح عندما وجد أحدهم يتكلم بلهجة مصريه..وسأله فى عفويه: - هو أنت كمان جبوك هنا..!! فنظر له الرجل بتعجب وسأله فى استغراب: - هو انت تعرفنى..!! أجابه (هنداوى) فى سرعة: - لأ ..بس مش البيه مصري..!! ضحك الرجل طويلاً..وقال بدهشه: - ماكل اللى هنا مصرييين..!! بان الجد على (هنداوى) وقال: - الله هما خطفوكوا انتم كمان..؟! اعتلت الرجل الدهشة الشديدة وقال له: - مين اللى خطفونا..؟! فاجابه بصوت خفيض..وهو يتلفت حواليه: - الجماعه اليهود إللى جابونا هنا و عاملين إن هما مصريين.. علشان يضحكوا علينا.. وعايزنا نقولهم أسرار البلد بس أنا لففتهم السبع لفات وماقدروش يخادو منى ولا عقاد نافع..!! ضحك الرجل كثيراُ حتى تساقطت الدموع من عينيه وقال: - معاك حق دول أسخم من اليهود..؟! ...لم يعى عقل (هنداوى) الأمر جيداً ويستوعبه ..إلا حينما وجد كل من (عوضين) و(حسنين) و(إسماعين) وأباه و(الحج عبد العال) وآخرين من أهل القرية.. لم يأت ذكرهم على لسانه..!! حتى (علوان) بواب سراية (فرحات باشا)..!! وكذلك مراسلى الصحف الذين اجروا الحوار معه ..فى نفس السجن..؟! هنا فرح (هنداوى) فرحاً شديداً - عندما وجدهم الواحد تلو الآخر وتجمعوا فى حلقة حوله كلٍ يحتضن الآخر.. كمن التقى عزيزأ فى الغربة بعد أمد طويل- وقال لهم: - الله الله دا الحبايب كلهم متجمعين..عند النبى..أنتم عارفين مين اللى ناقصنا..؟! نظر كلٍ منهم إلى الآخرين بدهشة وسألوا جميعاً: - ميين..؟! فقال ضاحكاً..حتى بان فمه بلا أسنان أماميه: - بشنت الجاموشه..!! :wed a3: |
حكـاوى هنـداوى (6) تعّرف (هنداوى) فى المعتقل - إن جاز لنا أن نسميه كذلك..؟! وليس الأسم الجديد الأكثر تهذيباً وديموقراطية ..السجن- على العديد من الشخصيات التى تأثر بها ..و وسعت من مداركه ومفاهيمه.. وثقفته برغم قلة تعليمه.. كما أثر أيضا فيها..!! لما يتمتع به من ذكاء فطرى وطيبة.. و روح مرحة .. حتى فى أحلك الظروف والمواقف..؟! قابل (هنداوى) الأستاذ (عبد الستار مختار)..وهو من أحد الكتاب الكبار ..الذين تم اعتقالهم مؤخراً بسبب كونه من أبرز المعارضين..والرافضين..!! قال له (هنداوى) حينما رآه لأول مره: - إنما أنا يابيه مأعرفش شفتك فين قبل كده..؟! وشك مش غريب عليه..!! واستطرد قائلا وهو يحك رأسه مفكراًً: - أنت تعرف فرحات باشا البنهاوى..!! ضحك الرجل ..من سذاجة (هنداوى) وابتسم فى ود قائلاً: - لأ يا سيدى ..أنا مأعرفش مين هو فرحات باشا ده..!! وبعدين مش الباشاويه اتلغت خلاص..؟! ابتسم (هنداوى) ابتسامة عريضة وقال: - أهييه ..!! ياعنى أنت ماتعرفش فرحات باشا..؟! أمال أنا شفتك فين قبل كده..؟! أجابه الرجل فى تواضع : - ياسيدى جايز تكون شوفت صورتى فى الجرايد..!! قاطعه على الفور: - أيوه إسمالله عليك ..أنا بقول كده ..شفت صورتك فى الجرانين اللى بتيجى عند أبو اسماعين البقال.. ثم أردف قائلاً: - ماهو هنا..هو و أسماعين كمان..!! عاود الرجل الإبتسام وسأله فى اهتمام: - وأنتو أيه إللى جابكو هنا..؟! أجابه متعجباً بأشارة من كتفيه ويديه: -والله مانعرف يابيه..؟! أحنا لقيناهم لمّونا هنا كلنا بربطة المعلم..!! وقال أيه..إن إحنا عاوزين نقلب نظام الحكم..!! هنا ضحك الرجل كثيراً حتى أوجعه صدره من كثره الضحك وقال ساخراً: - أنتم كمان..!! بان على( هنداوى) الدهشة الشديدة وسأله فى خوف: - الله هو أنت برضوا..من بتوع قلب الحكم..!! أجابه الرجل وهو مايزال يضحك: - لأ أحنا من بتوع عدله..!! لم يظهر على (هنداوى) أى مظهر من مظاهر الفهم وسأله فى استغراب: - لأ والصدق يا بيه.. أنت قبضوا عليك ليه..؟! احترم الرجل قله ثقافة (هنداوى) ..وقال له مبسطاً: - علشان قلت لأ..كفايه ..حرام..!! رفع( هنداوى) حاجبيه..حتى صنعا رقم ثمانيه وثمانين وقال بعفويه: - الله ..وهو اللى يقول كفايه حرام.. يبقى قليل الأدب..؟! طب ماكلنا بنقولهم كل يوم عمال على بطال..ولا كأننا بندن فى مالطه!! ثم استطرد متسائلاً: - ..ولا يكونش كلمة لأ ..هى اللى زعلتهم..!! اجابه الرجل مفكراً: - والله برضه يمكن يكون معاك حق..!! أبتسم (هنداوى) فى سعاده لأشادته به وقال معقباً: - طيب مأنت غلطان يابيه..؟! ماتقولهم أيوه..!! دا حتى كلمة أيوه بتريح برضه..؟! وخلى إللى فى النفوس ..جوه محبوس .. لغاية ما ينزاح الكابوس .. ويجعله عامر..!! |
السلام عليكم ورحمة الله
اشرف محمد كمال .. رائعه من رائع وصلت معاك الى نهاية 2 سأتابع .. وانت تابع ارق تحيه |
| الساعة الآن 09:50 AM. |