السلام عليكم ورحمة الله وبركاته
هذه القصيده مهداه الى مقام سيدي صاحب السمو الملكي الامير سعود بن حمود بن سعود بن عبدالعزيز ال سعود يحفظه الله ويرعاه
وابو حمود لو اكتب فيه اكثر من هذه القصيده لن ولن اوفي له حقه اللي علي

يا سيد الجود للأمجاد ماريّه=ودام القصايد تميزها معانيها
فزعتك ياراعي اليمنا الرهاويه=ماكنها ألا السحايب من مناشيها
ترعد عطاياك للنفس الشقاويه=ويمطر كرم كفك الجزله وتسقيها
فزعت لي وانت فزعاتك غناويه=من طيب راسك معاريفك توفّيها
ضاري على الجود وأطباعك طبيعيه=من خلقتك كل جزله دوم تعطيها
ياراهي الكف نفسك دوم مرضيه=على المكارم تقدمها مباديها
والشكر ما هو بسلعة سوق مشريه=الشكر كلمه ومضمون الوفاء فيها
أشكرك ياللي مواقيفك بطوليه=أغرقتني بالمكارم من علاويها
يا سيدي شوفتك للنفس عيديه=يا سعود الامجاد فأولها وتاليها
إمقابلك يعطي الارواح حريه=وعن ضيقة الوقت يمحى ما يعنيها
وأكبر شرف دام نفسي بالوفاء حيه=إني عرفتك ونفسي فيك اهنيها
يفخربك الطيب صبحيه وعصريه=وتشهد لك الناس حاضرها وماضيها
أبوك بالخير وقفاته حماسيه=وفعايله سيرة التاريخ ترويها
وأفعال جدانك العطره حقيقيه=تسمو وتاريخها الثابت يسميها
ولو مثلك أثنين فديار السعوديه=ما شفت لك ناس تشكي من بلاويها

وسلامتكم
شعر سطام بن سلطان بن ماجد بن فهيد