في صدى الحرمان شفت أحلا سراب= ياسرابً شاقني في منظره
إنتي مثل الشمس في وقت الغياب= هل؟ اطول الشمس!! واقدر أسره
بالقصيدة وصفك أعجب كل شاب= ياطعونه يافتونه ياقهره
وأنا صفحة من ورق باقي الكتاب= وكل صفحات الكتاب مبعثره
ولو كتب لك كل شعار الاعجاب= كلهم ماطالوا لو منك شعره
يا سؤال المعجزة! مالك جواب= رحم الله امرئً عرف اقدره
مثلنا ماينظر لفوق السحاب= ياشجر عالي ولا طلنا ثمره
ولو عرفت إني ما اطولك ياعذاب= مثلي ما يرميك أصلاً بحجره
ولو شعورى خالطه غير الصواب= أنزعه وأطاه تحت الكندره
لي حياةً عشتها بين الذياب= رغم إن الجوع فيهم لاخره
ماكلوني! تصدقي! صرنا صحاب= وأعرف إن الذيب! قد رافق مره
والقوافل ما أوقفه! نبح الكلاب= والقدر مايمنعه من يحذره
والحمامه جوزوها أقبح غراب= قلده في المشي.. والمشي! أخسره
ياترى؟ من فاز بك بين الشباب= ومنهو المحظوظ بك يا أسره
الحقيقة ما تهيبنا الصعاب= أصعده دايم ولا أنزل! بحفره
مير لون الرقعة من لون الثياب= والعذر والعفو عند المقدره
يا حلاة الوصف لك والوصف طاب= شمس كل الكون معروف قمره
والقمر لو تعرفي عند الغياب= رافق النجمات وأعطاك ظهره
هي ضريبة مال! وللمنصب حساب= أو جواري.. أو شعورك دمره
أو نعامه راسها تحت التراب= أسف! وللشمس حق المعذره
أكسفي يا شمس خجلة! للعتاب= منك أنا المكسوف وأرجو المغفره
وأخسفي بالبدر لين يقول تاب= ويعترف منهو فرض بالسيطره
وإن نورك دون وجهة في حجاب= وإكتماله لا زعلتي! مصخره
مظلمً وجهة عبوسً بكتئاب= لين تضحك به! نجومً مسفره
وأشرقي يا شمس وأعطينا الجواب= من؟ قدر ينظر ووجهك يجهره
بس ليت البدر! يرجع للصواب= كل ليلة مع نجومً تسهره
ياحكاية شاعرً عاشق سراب= شيخةً يزهى القوافي منظره